#Title

தமிழ்நாட்டில் தனியார் போட்டித் தேர்வு பயிற்சி மையங்களை ஒழுங்குபடுத்துவது குறித்து எடுத்த நடவடிக்கை என்ன? மக்களவையில் – ஆ.மணி எம்.பி. கேள்வி!

புதுடெல்லி, ஆக.8–

தமிழ்நாட்டில் செயல்பட்டு வரும் தனியார் போட்டித் தேர்வு பயிற்சி மையங்களின் செயல்பாடு மற்றும் அவற்றை ஒழுங்குபடுத்தும் நடவடிக்கைகள் குறித்து மத்திய அரசு ஆய்வு மேற்கொண்டுள்ளதா?

மேலும், பயிற்சி மையங்களில் வசூலிக்கப்படும் கட்டணங்களில் வெளிப்படைத்தன்மை, கற்பித்தலின் தரம், மாணவர்களின் பாதுகாப்பு மற்றும் நிர்வாகப் பொறுப்புணர்வை உறுதி செய்ய ஒன்றிய அரசு மேற்கொள்ளவுள்ள நடவடிக்கைகள் குறித்தும் விளக்கம் கோரியுள்ளார்.

அதேபோல், தமிழகத்தின் கிராமப்புறங்கள் மற்றும் கல்வியில் பின்தங்கிய மாவட்டங்களைச் சேர்ந்த மாணவர்கள், குறிப்பாக தர்மபுரி மாவட்ட மாணவர்கள், தரமான மற்றும் மலிவு கட்டணத்தில் போட்டித் தேர்வு பயிற்சி பெறும் வகையில், டிஜிட்டல் கற்றல் தளங்கள், பள்ளி அடிப்படையிலான வழிகாட்டுதல் மற்றும் அரசு ஆதரவுடன் செயல்படும் பயிற்சி திட்டங்களை விரிவுபடுத்த அரசு திட்ட மிட்டுள்ளதா என்றும், அவ்வாறு இருந்தால் அதன் விவரங்களை தெரிவிக்குமாறும்,

கடந்த மூன்று ஆண்டுகளில் தமிழகத்தில் செயல்படும் தனியார் போட்டித் தேர்வு பயிற்சி மையங்கள் தொடர்பாக அதிகப்படியான கல்விச் சுமை, தவறாக வழிநடத்தும் விளம்பரங்கள், முறைகேடான செயல்பாடுகள், மாணவர் நலனில் குறைபாடுகள் உள்ளிட்ட புகார்கள் பெறப்பட்டுள்ளனவா என்றும், அவ்வாறு பெறப்பட்டிருந்தால் அவற்றின் விவரங்கள் மற்றும் அதன் மீது எடுக்கப்பட்ட நடவடிக்கைகள் குறித்தும் விளக்கம் அளிக்குமாறு வலியுறுத்தியுள்ளார்.

மேலும்,பொருளாதாரத்தில் நலிவடைந்த பிரிவினர் (EWS), பட்டியலினத்தவர் (SC), பழங்குடியினர் (ST) மற்றும் பிற பின்தங்கிய சமூகங்களைச் சேர்ந்த மாணவர்கள் தரமான போட்டித் தேர்வு பயிற்சி மற்றும் தொழில் வழிகாட்டுதலை சமமான முறையில் பெறுவதை உறுதி செய்ய ஒன்றிய அரசு இதுவரை மேற்கொண்டுள்ள மற்றும் எதிர்காலத்தில் மேற்கொள்ள உள்ள நடவடிக்கைகள் குறித்தும் ஒன்றிய கல்வி அமைச்சர் சுகந்தா மஜும்தாரிடம் மக்களவையில் ஆ.மணி எம்.பி. கேள்வி எழுப்பியுள்ளார்.