புதுடெல்லி. ஆக.9–
குழந்தைகளுக்கு சமச்சீர் உணவு, நுண்ணூட்டச் சத்து நிறைந்த உணவுகள், புரதச் சத்து மற்றும் ஊட்டச்சத்து குறித்த விழிப்புணர்வை மேம்படுத்த ஒன்றிய அரசு மேற்கொண்டு வரும் நடவடிக்கைகள் குறித்து மக்களவையில் வேலூர் நாடாளுமன்ற உறுப்பினர் டி.எம். கதிர் ஆனந்த் கேள்வி எழுப்பினார்.
குழந்தைகளின் ஆரோக்கியமான வளர்ச்சி, உடல் நலம் மற்றும் அறிவாற்றல் மேம்பாட்டிற்கு சத்தான உணவுகள் எளிதில் கிடைப்பதையும், அவை அனைவருக்கும் அணுகக்கூடியதாகவும் மலிவானதாகவும் இருப்பதையும் உறுதி செய்வது அவசியம். இது தொடர்பாக மத்திய அரசு மேற்கொண்டு வரும் நடவடிக்கைகள் குறித்து டி.எம்.கதிர் ஆனந்த் எழுப்பிய கேள்வி முக்கியத்துவம் வாய்ந்ததாக அமைந்துள்ளது.
இதற்கு, ஒன்றிய பெண்கள் மற்றும் குழந்தைகள் மேம்பாட்டுத் துறை இணை அமைச்சர் திருமதி சாவித்ரி தாக்கூர் அளித்த பதிலில், ‘மிஷன் சக்திவாய்ந்த அங்கன்வாடி மற்றும் போஷன் 2.0’ (Mission Saksham Anganwadi and Poshan 2.0) திட்டத்தின் கீழ் குழந்தைகள் உள்ளிட்ட அனைத்து பயனாளிகளுக்கும் கூடுதல் ஊட்டச்சத்து வழங்கப்பட்டு வருவதாகத் தெரிவித்தார்.
6 மாதம் முதல் 6 வயது வரையிலான குழந்தைகள், கர்ப்பிணிப் பெண்கள், பாலூட்டும் தாய்மார்கள் மற்றும் 14 முதல் 18 வயது வரையிலான வளர் இளம் பெண்களுக்கு வீட்டிற்கு எடுத்துச் செல்லும் உணவு (THR), காலை சிற்றுண்டி மற்றும் சூடான சமைத்த உணவு ஆகிய வடிவங்களில் கூடுதல் ஊட்டச்சத்து வழங்கப்படுகிறது.
சமச்சீர் உணவு முறைக்கு
முக்கியத்துவம்!
தேசிய உணவுப் பாதுகாப்புச் சட்டம், 2013-ன் அட்டவணை-II-ல் குறிப்
பிடப்பட்டுள்ள ஊட்டச்சத்து விதிமுறைகளின் அடிப்படையில் இந்த உணவுகள் வழங்கப்படுகின்றன.
2023 ஜனவரியில் திருத்தப்பட்ட புதிய ஊட்டச்சத்து விதிமுறைகள், கலோரி அளவை மட்டுமே அடிப்படையாகக் கொண்ட பழைய முறையைவிட, உணவின் அளவு மற்றும் தரம் இரண்டையும் உள்ளடக்கிய சமச்சீர் உணவு முறைக்கு முக்கியத்துவம் அளிக்கின்றன. இதில் தரமான புரதம், ஆரோக்கியமான கொழுப்புகள் மற்றும் கால்சியம், துத்தநாகம், இரும்புச் சத்து, ஃபோலேட், வைட்டமின் A, B6 மற்றும் B12 உள்ளிட்ட நுண்ணூட்ட ச்சத்துகள் இடம்பெறுகின்றன.
மேலும், கடுமையான ஊட்டச்சத்து குறைபாடு கொண்ட (SAM) 6 மாதம் முதல் 5 வயது வரையிலான குழந்தைகளுக்கு கூடுதல் ஊட்டச்சத்து உணவு வழங்கப்படுகிறது.
கூடுதல் ஊட்டச்சத்து உணவின் தரம், பல்வகைத் தன்மை மற்றும் குழந்தைகளின் ஏற்றுக்கொள்ளும் தன்மையை மேம்படுத்துவதற்காக மத்திய அரசு விரிவான வழிகாட்டுதல்களை வெளியிட்டுள்ளதாக அமைச்சர் தெரிவித்தார். அங்கன்வாடி பணியாளர்கள் மற்றும் பராமரிப்பாளர்களுக்கு ஊட்டச்சத்து மற்றும் சுகாதாரக் கல்வி வழங்குவதுடன், குழந்தைகளின் வயதுக்கு ஏற்ற துணை உணவு முறைகள் குறித்தும் ஆலோசனைகள் வழங்கப்படுகின்றன.
உப்பு – சர்க்கரையின் பயன்பாட்டை
குறைப்பதற்கான விழிப்புணர்வு!
இந்திய மருத்துவ ஆராய்ச்சி கவுன்சில் – தேசிய ஊட்டச்சத்து நிறுவனமான ICMR-NIN வெளியிட்டுள்ள இந்தியர்களுக் கான உணவு வழிகாட்டுதல்கள் – 2024-க்கு ஏற்ப, அன்றாட உணவில் சமையல் எண்ணெய், உப்பு மற்றும் சர்க்கரையின் பயன்பாட்டைக் குறைப்பத ற்கான விழிப்புணர்வு நடவடிக்கைகளும் மேற்கொள்ளப்பட்டு வருகின்றன.
மாநிலங்கள் மற்றும் யூனியன் பிரதேசங்கள், ICMR-NIN, வேளாண் பல்கலைக்கழகங்கள், உள்நாட்டு அறிவியல் கல்லூரிகள் உள்ளிட்ட ஊட்டச் சத்து நிபுணர்கள் மற்றும் தொழில்நுட்ப நிறுவனங்களின் ஆலோசனையைப் பெற்று, உள்ளூர் உணவுப் பழக்கவழக்கங்களுக்கு ஏற்ற வகையில் ஊட்டச்சத்து உணவுகளுக்கான சமையல் முறைகளை உருவாக்க அறிவுறுத்தப்பட்டுள்ளன.
உள்ளூர் உணவுப் பழக்கங்கள், கலாச்சார விருப்பங்கள் மற்றும் கிடைக்கக்கூடிய பாரம்பரிய உணவுப் பொருட்களின் அடிப்படையில் மாநிலங்கள் மற்றும் யூனியன் பிரதேசங்களுக்கு உணவு பட்டியல்கள் மற்றும் சமையல் முறைகளைத் தயாரிப்பதில் முழு நெகிழ்வுத்தன்மையும் வழங்கப்பட் டுள்ளது. சிறுதானியங்கள், பருப்பு வகைகள், காய்கறிகள், கொட்டைகள் உள்ளிட்ட உள்ளூரில் கிடைக்கும் ஊட்டச்சத்து நிறைந்த உணவுகள் இதில் இடம்பெறுகின்றன.
மேலும், ‘போஷன் 2.0’ திட்டத்தின் முக்கிய நடவடிக்கைகளில் ஒன்றாக சமூகப் பங்கேற்பு மற்றும் விழிப்புணர்வு பிரசார ங்கள் மேற்கொள்ளப்பட்டு வருகின்றன. நல்ல ஊட்டச்சத்து பழக்கங்களை உருவாக்குவதற்கு தொடர்ச்சி யான விழிப்புணர்வும், மக்களின் நடத்தை மாற்றத்திற்கான முயற்சிகளும் அவசியம் என்பதன் அடிப்படை யில், மாநிலங்கள் மற்றும் யூனியன் பிரதேசங்களில் ‘ஜன் அந்தோலன்’ நடவடிக்கைகள் நடத்தப்பட்டு வருகின்றன.
போஷன் மாஹ் மற்றும் போஷன் பக்வாடா ஆகிய காலகட்டங்களில் தொடர்ந்து விழிப்புணர்வு நிகழ்ச்சிகள் நடத்தப்படுகின்றன. 2018 முதல் 16 கட்டங்களாக நடைபெற்ற ‘ஜன் அந்தோலன்’ இயக்கங்களின் மூலம் இதுவரை 150 கோடிக்கும் அதிகமான விழிப்புணர்வு நடவடிக்கைகள் மேற்கொள்ளப்பட்டுள்ளதாக மத்தியஅரசு தெரிவித்துள்ளது.
மேலும், ஊட்டச்சத்து தொடர்பான நடைமுறைகளில் மாற்றத்தை ஏற்படுத்துவதில் சமூக அடிப்படையிலான நிகழ்ச்சிகள் (Community Based Events) முக்கிய பங்கு வகித்து வருகின்றன. ஒவ்வொரு அங்கன்வாடி பணியாளரும் மாதத்திற்கு இரண்டு சமூக அடிப்படையிலான நிகழ்ச்சிகளை நடத்த வேண்டும் என அறிவுறுத்தப்பட்டுள்ளனர். 2022 ஏப்ரல் முதல் 2026 ஜூன் வரை சுமார் 10.5 கோடி சமூக அடிப்படையிலான நிகழ்ச்சிகள் போஷன் டிராக்கரில் பதிவாகியுள்ளதாக ஒன்றிய அரசு தெரிவித்துள்ளது.