திருவள்ளூர், ஆக 09;-
திருவள்ளூர் மாவட்டம் பூந்தமல்லி நகராட்சியில் வளர்ச்சிப் பணிகள் தொடர்ந்து மந்தமடைந்து வருவதற்கு அதிகாரிகளின் ஒத்துழைப்பின் மையே முக்கியக் காரணம் என்றும், த.வெ.க. அரசு பொறுப்பேற்ற பிறகு உள்ளாட்சி அமைப்புகளின் செயல்பாடுகளில் தேவையற்ற தலையீடு அதிகரித்துள்ளதாகவும் நகர்மன்றக் கூட்டத்தில் திமுகவைச் சேர்ந்த உறுப்பினர்கள் கடும் அதிருப்தி தெரிவித்தனர்.
நகர்மன்றக் கூட்டத்தில் பேசிய உறுப்பினர்கள், பூந்தமல்லி நகர்மன்றத் தலைவர், துணைத் தலைவர் மற்றும் பெரும்பாலான கவுன்சிலர்கள் மக்களால் ஜனநாயக முறையில் தேர்ந்தெடுக்கப்பட்டவர்கள் என்றாலும், மக்களின் அடிப்படை தேவைகளை நிறைவேற்றுவதற்கான நிர்வாக ஒத்துழைப்பை அதிகாரிகள் வழங்கத் தவறி வருவதாக குற்றம்சாட்டினர். இதன் விளைவாக குடிநீர் வழங்கல், சாலை மேம்பாடு, மழைநீர் வடிகால், தெருவிளக்குகள், துப்புரவுப் பணிகள் உள்ளிட்ட பல்வேறு மக்கள் நலப் பணிகள் திட்டமிட்ட வேகத்தில் நடைபெறாமல் பாதிக்கப்பட்டுள்ளதாக அவர்கள் தெரிவித்தனர்.
மேலும், மக்களின் வரிப்பணத்தில் செயல்படும் நகராட்சியில் அதிகாரிகள் மக்கள் பிரதிநிதிகளின் கருத்துகளுக்கு உரிய முக்கியத்துவம் அளிக்கவில்லை என்றும், நகர்மன்றக் கூட்டங்களில் முக்கிய அதிகாரிகள் தொடர்ந்து பங்கேற்காதது நிர்வாக அலட்சியத்தை வெளிப்படுத்து வதாகவும் உறுப்பினர்கள் விமர்சித்த னர். மக்கள் முன்வைக்கும் அன்றாட பிரச்சினைகளுக்கு உடனடியாக தீர்வு காண வேண்டிய நிலையில், அதிகாரிகளின் இந்த அணுகுமுறை உள்ளாட்சி அமைப்புகளின் செயல்திறனை பாதிப்பதாக அவர்கள் தெரிவித்தனர்.
த.வெ.க. அரசு பொறுப்பேற்ற பிறகு, திமுக நிர்வாகம் உள்ள நகராட்சிகளில் வளர்ச்சிப் பணிகள் திட்டமிட்டு தாமதப்படுத்தப்படுகின்றன என்ற சந்தேகம் பொதுமக்களிடையே எழுந்துள்ளதாகவும், இதுபோன்ற நிலை தொடர்ந்தால் மக்களே நேரடியாக பாதிக்கப்படுவார்கள் என்றும் உறுப்பினர்கள் கூறினர். அரசியல் வேறுபாடுகளை காரணமாகக் கொண்டு உள்ளாட்சி நிர்வாகத்தின் செயல்பாடுகள் பாதிக்கப்படக் கூடாது; மக்களின் நலனே முதன்மையாக இருக்க வேண்டும் என்றும் அவர்கள் வலியுறுத்தினர்.