புதுடெல்லி, ஆக.9–
தமிழ்நாட்டில் பெண்களுக்கான ஆயுஷ் மருத்துவச் சேவைகளின் முன்னேற்றம், தாய்–சேய் நலம், இரத்தச்சோகை தடுப்பு, இளம்பெண்கள் நலம், மாதவிடாய் நிறைவு கால பரா மரிப்பு உள்ளிட்ட சேவைகள் குறித்து காஞ்சிபுரம் நாடாளுமன்ற உறுப்பினர் க.செல்வம் மக்களவையில் எழுப்பிய கேள்விக்கு, ஒன்றிய ஆயுஷ் அமைச்சகம் முக்கிய தகவல்களை தெரிவித்துள்ளது.
க.செல்வம் எழுப்பிய
கேள்விக்கு, ஒன்றிய ஆயுஷ் துறை இணை அமைச்சர் பிரதாப்ராவ் ஜாதவ் 07.08.2026 அன்று அளித்த பதிலில், தமிழ்நாட்டில் பெண்களுக்கான ஆயுஷ் மருத்துவ சேவைகள் பல்வேறு திட்டங்களின் மூலம் செயல்படுத்தப்பட்டு வருவதாக தெரிவித்தார்.
தமிழகத்தில் 650 ஆயுஷ்
நலவாழ்வு மையங்கள்!
தேசிய ஆயுஷ் இயக்கத்தின் கீழ் தமிழ்நாட்டில் 650 ஆயுஷ் சுகாதார மற்றும் நலவாழ்வு மையங்கள் செயல்பட்டு வருகின்றன. இம்மையங்கள் மூலம் தொலை மருத்துவம் உள்ளிட்ட டிஜிட்டல் சுகாதார சேவைகள், சுகாதார விழிப்புணர்வு முகாம்கள், யோகா பயிற்சிகள், நலவாழ்வு நடவடிக்கைகள் மற்றும் நோய் தடுப்பு சுகாதாரத் திட்டங்கள் செயல்படுத்தப்பட்டு வருகின்றன.
மேலும், கிராமப்புற மாவட்டங்களில் 94 இணை ஆயுஷ் மருத்துவப் பிரிவு களும், கிராமப்புற கடலோர மாவட்டங்களில் 40 பிரிவுகளும், நகர்ப்புற கடலோர மாவட்டங்களில் 16 பிரிவுகளும் செயல்பட்டு வருகின்றன.
3.47 லட்சம் பெண்கள்
பயனடைந்துள்ளனர்!
தமிழ்நாட்டில் கடந்த மூன்று ஆண்டுகளில், தாய்–சேய் நலம், இரத்தச்சோகை மேலாண்மை, இளம்பெண்கள் நலம், மாதவிடாய் நிறைவு கால பராமரிப்பு மற்றும் நலவாழ்வு தொடர்பான ஆயுஷ் சேவைகளை 3,47,112 பெண்கள் பெற்றுள்ளனர்.
சித்த மருத்துவத்தின் ‘மகப்பேறு சஞ்சீவி’ திட்டத்தின் கீழ்மட்டும் கடந்த ஆண்டில் 1,27,084 கர்ப்பிணிப் பெண்கள் பயனடைந்துள்ளனர்.
யோகா – இயற்கை மருத்துவத்திலும் பெண்களுக்கு சிறப்பு கவனம்
பெண்களின் கர்ப்ப கால மற்றும் பிரசவத்திற்குப் பிந்தைய பராமரிப்பு, வாழ்க்கை முறை மாற்றம், மன அழுத்த மேலாண்மை, ஊட்டச்சத்து ஆலோசனை மற்றும் மனநலத்தை மேம்படுத்தும் வகையில் யோகா மற்றும் இயற்கை மருத்துவத் திட்டங்கள் செயல்படுத்தப்பட்டு வருகின்றன.
கடந்த ஆண்டில் மட்டும் 1,31,160 பெண்கள் கர்ப்ப கால மற்றும் பிரசவத்திற்குப் பிந்தைய யோகா மற்றும் இயற்கை மருத்துவத் திட்டங்களின் மூலம் பயனடைந்துள்ளதாக ஒன்றிய அரசு தெரிவித்துள்ளது.
காஞ்சிபுரம் மாவட்டத்தில்
3,726 பெண்கள் பயன்
‘மகப்பேறு சஞ்சீவி’ திட்டத்தின் கீழ் காஞ்சிபுரம் மாவட்டத்தில் கடந்த மூன்று ஆண்டுகளில் 3,726 பெண்கள் பயனடைந்துள்ளனர். 2023–24ஆம் ஆண்டில் 1,507 பேரும், 2024–25 ஆம் ஆண்டில் 2,080 பேரும், 2025–26ஆம் ஆண்டில் 139 பேரும் பயனடைந்துள்ளனர்.
பெண்களின் உடல் மற்றும் மனநலம், ஊட்டச்சத்து, நோய் தடுப்பு மற்றும் முழுமையான நலவாழ்வை மேம்படுத்தும் வகையில் ஆயுஷ் மருத்துவச் சேவைகளை தமிழ்நாட்டில் மேலும் ஒருங்கிணைத்து வலுப்படுத்த நடவடிக்கைகள் மேற்கொள்ளப்பட்டு வருவதாக ஒன்றிய அரசு தெரிவித்துள்ளது.
பெண்களின் நலனுக்காக நாடாளுமன்றத்தில் காஞ்சிபுரம் தொகுதி மக்களவை உறுப்பினர் க.செல்வம் தொடர்ந்து கேள்விகளை எழுப்பி, ஒன்றிய அரசின் கவனத்தை ஈர்த்து வருவதன் தொடர்ச்சியாக இந்த முக்கிய தகவல்கள் வெளியாகியுள்ளன.