மதுரை, ஆக.10–
லஞ்ச புகார் தொடர்பாக நீதிமன்றம் உத்தரவு பிறப்பித்தே அதிகாரிகள் மீது நடவடிக்கை எடுக்கவில்லை. இதில் வாட்ஸ் அப்பில் புகார் வந்து என்ன நடவடிக்கை எடுக்க போகிறீர்கள், மக்களை ஏமாற்ற வேண்டாம் என லஞ்ச ஒழிப்புத்துறைக்கு உயர்நீதிமன்ற துறை கிளை கடும் கண்டனம் தெரிவித்துள்ளது.
ராமநாதபுரத்தை சேர்ந்த கலந்தர் ஆசிக், உயர்நீதிமன்ற மதுரை கிளையில் தாக்கல் செய்த மனு: ராமநாதபுரம் மாவட்டம் தொண்டி பேரூராட்சியில் நல திட்டப்பணி களுக்கான நிதியை பேரூராட்சி தலைவர் முறைகேடு செய்துள்ளார்.
பொய்யான வரவு, செலவு கணக்குகளை பேரூராட்சி மன்ற கூட்டத்தில் வைத்து அனுமதி பெற்றுள்ளார். தொண்டி பேரூராட்சியின் தலைவர் மற்றும் துணை தலைவர் இருவரும் பெண்கள் என்பதால் இவர்களின் குடும்ப உறுப்பினர்களின் தலையீடு அதிகம் இருப்பதே ஊழல்கள் அதிகம் நடைபெற காரணமாக உள்ளது. இதுகுறித்து உரிய ஆவணங்களுடன் லஞ்ச ஒழிப்புத்துறை மற்றும் பேரூராட்சி இணை இயக்குநரிடம் புகார் அளித்தும் இதுவரை எந்த நடவடிக்கையும் எடுக்கவில்லை.
எனவே, இதுதொடர்பாக நீதிமன்றத்தில் மனு தாக்கல் செய்தேன். மனு விசாரணையின் போது, பேரூராட்சிகளுக்கான இணை இயக்குநர் சம்பவம் குறித்து விசாரணை செய்து தொண்டி பேரூராட்சியில் செயல் அலுவலராக பணிபுரிந்த 6 செயல் அலுவலர்களுக்கு குற்ற குறிப்பாணை அனுப்பப்பட்டுள்ளது. மேலும் இதுகுறித்து லஞ்ச ஒழிப்புத்துறை விசாரணைக்காக லஞ்ச ஒழிப்பு கண்காணிப்பாளருக்கும் அறிக்கை அனுப்பப்பட்டுள்ளது என அறிக்கை தாக்கல் செய்தார்.
இதனை பதிவு செய்த நீதிமன்றம், பேரூராட்சி இயக்குநர் குறிப்பிட்டுள்ள 6 செயல் அலுவலர்கள் மீது லஞ்ச ஒழிப்பு போலீசார் விசாரணை மேற்கொண்டு நடவடிக்கை எடுக்க வேண்டும் என உத்தரவிட்டிருந்தது. ஆனால் இது வரை லஞ்ச ஒழிப்புத்துறை போலீசார் எவ்வித விசாரணையும் மேற்கொண்டு நடவடிக்கை எடுக்கவில்லை. எனவே, லஞ்ச ஒழிப்பு துறையின் தென் மண்டல காவல்துறை கண்காணிப்பாளர் மீது நீதிமன்ற அவமதிப்பின் கீழ் நடவடிக்கை எடுக்குமாறு உத்தரவிட வேண்டும்.
இவ்வாறு அதில் கூறியிருந்தார்.
இந்த மனுவை விசாரித்த நீதிபதி பி.புகழேந்தி, ‘‘நீதிமன்றம் உத்தரவு பிறப்பித்தும் இதுவரை ஏன் லஞ்ச ஒழிப்புத்துறை விசாரணை நடத்தவில்லை. இதுபோன்ற வழக்குகளில் ஒரு மாவட்டத்திற்கு ஒரு பேரூராட்சி செயல் அலுவலர் மீது வழக்கு போட்டாலே பேரூராட்சி முறைகேடுகள் தடுக்கப்படும். ஆனால் இதுவரை விசாரணையே செய்யவில்லை. லஞ்ச ஒழிப்புத்துறை அரசு அதிகாரிகள் மீது துறைரீதியான விசாரணையின் போது ஒவ்வொரு முறையும் சம்பந்தப்பட்ட துறையிலும் அனுமதி வாங்கவேண்டும் என்று கூறியே விசாரணையை தாமதம் செய்கிறீர்கள்.
இதனால் குற்றவாளிகள் தப்பித்து விடுகிறார்கள். நீங்கள் யாரை ஏமாற்ற இந்த வேலை செய்கிறீர்கள் எனத் தெரியவில்லை. லஞ்சத்தை ஒழிப்பதற்கு அரசு வாட்ஸ் அப் நம்பரை அறிமுகப்படுத்தி உள்ளது. அரசு ஊழியர்கள் லஞ்சம் கேட்டால் வாட்ஸ் அப்பில் புகார் கொடுக்கலாம் என தெரிவித்துள்ளார்கள். நீதிமன்றம் உத்தரவு பிறப்பித்தே நடவடிக்கை எடுக்கவில்லை. வாட்ஸ் அப்பில் புகார் வந்து என்ன நடவடிக்கை எடுக்கப் போகிறீர்கள். மக்களை ஏமாற்ற வேண்டாம். இந்த வழக்கில் லஞ்ச ஒழிப்புத் துறை தரப்பில் விரிவான பதில் மனு தாக்கல் செய்ய வேண்டும்’’ என உத்தரவிட்டு விசாரணையை தள்ளி வைத்தார்.