புதுடெல்லி, ஆக. 10 –
தமிழக அரசின் 2026–27 பொது பட்ஜெட் மற்றும் வேளாண் பட்ஜெட் குறித்து கடும் கண்டனத்தை தெரிவித்து சு.கல்யாணசுந்தரம் எம்.பி அறிக்கை வெளி யிட்டுள்ளார்.
அவர் வெளியிட்டுள்ள அறி்க்கை வருமாறு தமிழக அரசின் 2026–27 பொது பட்ஜெட் மற்றும் வேளாண் பட்ஜெட் குறித்து எதிர்க்கட்சிகள் கடும் விமர்சனங்களை முன்வைத்துள்ளன. மக்களின் அன்றாட வாழ்வாதாரம், விவசாயம், வேலைவாய்ப்பு, நீர்வள மேலாண்மை, சுகாதாரம் மற்றும் உள்ளாட்சி ஜனநாயகத்தை வலுப்படுத்தும் புதிய தொலைநோக்கு திட்டங்கள் இல்லாமல், அறிவிப்புகள் மட்டுமே இடம்பெற்றுள்ளன.
எதிர்க்கட்சிகளின் கருத்துப்படி, முந்தைய அரசின் பல மக்கள் நலத் திட்டங்கள் பெயர் மாற்றத்துடன் மீண்டும் அறிவிக்கப்பட்டுள்ளன. புதிய திட்டங்கள் மிகக் குறைவாக இருப்பதோடு, அறிவிக்கப்பட்ட திட்டங்களுக்கு செயல்படுத்தும் காலக்கெடு, மாவட்ட வாரியான செயல் திட்டம் மற்றும் போதுமான நிதி ஒதுக்கீடு குறித்த தெளிவான விளக்கமும் இல்லை என்று கூறப்படுகிறது.
புதுப்பிக்கத்தக்க எரிசக்தியில் முன்னோடியாக திகழ வேண்டிய தமிழகத்தில், வீட்டு மேற்கூரை சூரிய மின்சாரம், விவசாய சோலார் பம்புகள், அரசு அலுவலகங்களில் சூரிய மின்சார பயன்பாடு போன்றவற்றை விரிவுபடுத்தும் வலுவான கொள்கை அறிவிப்புகள்இடம்பெறவில்லை.
மழைநீர் சேகரிப்பு, ஏரி–குளங்கள் புனரமைப்பு, நிலத்தடி நீர் பாதுகாப்பு மற்றும் நீர்வள மேலாண்மைக்கான மாநில அளவிலான புதிய திட்டங்கள் இல்லாதது எதிர்கால நீர் பாதுகாப்புக்கு பாதிப்பை ஏற்படுத்தும்.
உள்ளாட்சி அமைப்புகள் மற்றும் கூட்டுறவு சங்கங்களுக்கான தேர்தல்கள் குறித்து பட்ஜெட்டில் எந்தவிதமான தெளிவான அறிவிப்போ அல்லது காலக்கெடுவோ இடம்பெறாதது ஜனநாயக நடைமுறைகள் குறித்து கேள்விகளை எழுப்பும் வகையில் உள்ளது.
‘தாய்மாமன்’ திட்டத் தின் கீழ் தங்க மோதிரம் வழங்கும் அறிவிப்பினால், அரசு மருத்துவமனைகளில் அதிகரித்து வரும் பிரசவங்க ளுக்கு ஏற்ப மகப்பேறு மருத்துவர்கள், குழந்தை கள் நல மருத்துவர்கள், செவிலியர்கள், படுக்கைகள், மருந்துகள் மற்றும் மருத்துவ உபகரணங்கள் போதுமான அளவில் அதிகரிக்கப்பட வேண்டியது அவசியம் என்றும் வலியுறுத்தப்பட்டுள்ளது. தாய்–சேய் நலனுக்கான மருத்துவக் கட்டமைப்பை வலுப்படுத்தாமல் வெறும் பரிசுத் திட்டங்கள் மட்டும் போதாது அதற்குரிய வசதிகளையும் இந்த அரசு ஏற்படுத்த வேண்டும்.
காவிரி டெல்டா மாவட்டங்களில் உள்ள ஆறுகள், வாய்க்கால்கள், ஏரிகள் மற்றும் குளங்களில் தேங்கியுள்ள வண்டல் மண்ணை விவசாயிகள் தங்கள் பயன்பாட்டிற்கு 1 அடி வரை தங்களது சொந்த செலவில் அகற்றி கொள்ள அனுமதி அளித்தால், அரசுக்கு வருமான இழப்பு ஏற்படாது. நிலத்தடி நீரும் உயரும்.
வேளாண் பட்ஜெட்டிலும் டெல்டா விவசாயி களுக்கான வறட்சி நிவாரணம், நெல் கொள்முதல் விலை உயர்வு, பாசன மேம்பாடு, சிறு மற்றும் குறு விவசாயிகளுக்கான கடன் சலுகைகள் போன்ற முக்கிய கோரிக்கைகளுக்கு உரிய தீர்வு அளிக்கப்படவில்லை.
காவிரி டெல்டா மாவட்டங்களில் விளையும் நெற்பயிர்களை மழைக்காலங்களில் சேமித்திட கூடுதலாக சேமிப்புக்கிடங்குகள் ஏற்படுத்தாததால் நெற்பயிர்கள் சேதமடைந்து உணவு பற்றாக்குறை ஏற்படும் அபாயம் உள்ளது. இந்த பட்ஜெட்டில் நெல் சேமிப்பு கிடங்குகள் அமைப்பதற்கான எந்தவிதமான அறிவிப்பும் இல்லாததால் விவசாயிகள் ஏமாற்றம் அடைந்துள்ளனர்.
மேலும், ஏழை பெண்களுக்கு இலவச ஆடுகள் வழங்கும் திட்டம் பட்ஜெட்டில் அறிவிக்கப்பட்டிருந்தாலும், அதை மாநிலம் முழுவதும் நடைமுறைப்படுத்துவதற்கான நிர்வாக வழிகாட்டுதல்கள், பயனாளிகள் தேர்வு முறை, நிதி ஒதுக்கீடு, மாவட்ட வாரியான இலக்கு மற்றும் செயல்படுத்தும் கால அட்டவணை குறித்து தெளிவான விளக்கம் இல்லை. இதனால், இந்தத் திட்டம் நடைமுறையில் முழுமையாக செயல் படுத்தப்படுமா என்ற சந்தேகம் எழுகிறது.வெறும் அறிவிப்பாக மட்டுமே முடிவடையாமல், வெளிப்படையான செயல்திட்டத்துடன் அரசு செயல்பட வேண்டும்.
“பட்ஜெட்டில் அறிவிப்புகளை வெளியிடுவது மட்டும் போதாது; ஒவ்வொரு திட்டமும் மக்களை சென்றடையும் வகையில் நிதி, காலக்கெடு, நிர்வாகப் பொறுப்பு மற்றும் கண்காணிப்பு அமைப்புடன் செயல்படுத்தப்பட வேண்டும். இல்லையெனில் இந்த பட்ஜெட் அறிவிப்புகளின் தொகுப்பாக மட்டுமே இருந்து விடும்”
இவ்வாறு மாநிலங்களவை உறுப்பினர் சு.கல்யாணசுந்தரம் அறிக்கை வெளியிட்டுள்ளார்.