மதுரை, ஆக.11–
பழனி கோயில் நிலத்தை முறைகேடாக பத்திரப் பதிவு செய்த வழக்கில் கைது செய்யப்பட்ட வழக்குரைஞர் அன்வர்தீன் மதுரை மத்திய சிறையில் திடீரென சனிக்கிழமை மரணமடைந்தார். இதையடுத்து சிறைக் காவலர்கள், உடல் கூறாய்வு செய்த மருத்துவர்களிடம் மதுரை மாவட்ட விரைவு நீதிமன்ற நீதிபதி ராஜபிரபு விசாரணை நடத்தினார்.
திண்டுக்கல் மாவட்டம், பழனியில் தண்டாயுதபாணி சுவாமி கோயில் கட்டுப்பாட்டில் உள்ள தண்டபாணி சுவாமிகள் அறக்கட்டளைக்குச் சொந்தமான 1.40 ஏக்கர் நிலத்தை முறைகேடாக தனி நபர்களுக்கு பத்திரப் பதிவு செய்ததாகத் தொடுக்கப்பட்ட வழக்கில், சார் பதிவாளர் ஜஸ்டின் மணிகண்டன், நிலத்தை விற்பனை செய்த த.முருகதாஸ், அந்த நிலத்தை வாங்கிய கா.வெள்ளைத்துரை, து.சேதுபதி உள்பட 11 பேர் மீது சி.பி. சி.ஐ.டி. போலீஸார் வழக்குப் பதிந்து விசாரித்து வருகின்றனர்.
இவர்களில் விழுப்புரத்தைச் சேர்ந்த முருகதாஸ் வெள்ளைத்துரை (60), சேதுபதி (67), இவர்களுக்கு உதவிய பழனி கவுண்டன்குளம்
பகுதியைச் சேர்ந்த வழக்குரைஞர் அஸ்வர்தீன் (65) ஆகிய 4 பேரையும் காவலில் எடுத்து சி.பி.சி.ஐ.டி. போலீஸார் கடந்த 3 நாள்களாக தீவிர விசாரணை மேற்கொண்டனர். இதையடுத்து. இவர்கள் மதுரை த்திய சிறை யில் அடைக்கப்பட்டனர்.
இந்த நிலையில், வழக்குரைஞர் அன்வர்தீனுக்கு வெள்ளிக்கிழமை இரவு திடீரென உடல்நலக் குறைவு ஏற்பட்டது. இதைத் தொடர்ந்து, சிறை வளாகத்தில் உள்ள மருத்துவமனையில் அவருக்கு முதலுதவி சிகிச்சை அளிக்கப்பட்டது. சனிக்கிழமை அதிகாலைமீண்டும் அவருக்கு உடல்நலக் குறைவு ஏற்பட்டதால், அவசர ஊர்தி மூலம் மதுரை அரசு ராஜாஜி மருத்துவமனைக்கு கொண்டு
செல்லப்பட்டார்.
அங்கு அவரைப் பரிசோதித்த மருத்துவர்கள் அவர் உயிரிழந்து விட்டதாகத் தெரிவித்தனர். இதையடுத்து, அவரது உடல் கூறாய்வுக்காக பிணவறைக்கு கொண்டு செல்லப்பட்டது.
இதுகுறித்து விசாரணை நடத்துவதற்காக, மதுரை மாவட்ட விரைவு நீதிமன்ற நீதிபதி ராஜபிரபு சனிக்கிழமை காலை 11 மணியளவில் அரசு மருத்துவமனையின் பிணவறைக்கு வந்தார். அங்கு அன்வர்தீனின் உடலில் ஏதேனும் காயங்கள் உள்ளனவா. அவர் இறப்புக்கான காரணம் என்ன என்பது குறித்து விசாரணை நடத்தினார். பின்னர், நீதிபதி ராஜபிரபு. மதுரை மத்திய சிறையிலும் விசாரணை நடத்தினார். அப்போது அன்வர்தீன் அடைக்கப்பட்டிருந்த அறை, அவருக்கு வழங்கப்பட்ட முதலுதவி சிகிச்சை குறித்தும் கேட்டறிந்தார்.
இதுகுறித்து அரசு ராஜாஜி மருத்துவமனையின் உறைவிட மருத்துவ அலுவலர் சரவணன் கூறியதாவது:–
பொதுவாக விசரணையில் இருக்கும் சிறைவாசி உயிரிழந்தால் உடல் கூறாய்வு பரிசோதனைப் பணிகளை பிற மாவட்டங்களைச் சேர்ந்த அரசு மருத்துவமனை மருத்துவர்கள் அடங்கிய குழுவினர் மேற்பார்வையில் செய்ய வேண்டும் என்ற உயர்நீதிமன்ற உத்தரவு உள்ளது.
இதன்படி, அன்வர்தீன் உடல் மதுரை, விருதுநகர், திண்டுக்கல் அரசு மருத்துவமனைகளின் சட்டம் சார்ந்த தடயவியல் மருத்துவர்கள் அடங்கிய குழுவினர் மேற்பார்வையில் கூறாய்வு செய்யப்பட்டது. மேலும்,இந்தக் கூறாய்வு முழுவதும் வீடியோவாகப் பதிவு செய்யப்பட்டது.
முன்னதாக, அன்வர்தீன் முழு உடல் சி.டி. ஸ்கேன் பரிசோதனையும் செய்யப்பட்டது. மருத்துவமனைக்கு வரும் வழியில் அவர் இறந்ததால், உடல் உள் உறுப்புகள் ரசாயனப் பரிசோதனைக்கு அனுப்பப்படவுள்ளன. மேலும் கூறாய்வு குறித்த ஆய்வறிக்கை வந்தவுடன் இறப்புக்கான உண்மையான காரணம் தெரியவரும். கூறாய்வுக்குப் பிறகு அன்வர்தீன் உடல் அவரது உறவினர்களிடம் சனிக்கிழமை மாலை ஒப்படைக்கப்பட்டது என்றார் அவர்.