புதுச்சேரி, ஆக. 11 –
புதுச்சேரி காவல்துறைக்கு குடியரசுத் தலைவரின் ‘கலர்ஸ்’ விருது வழங்கும் நிகழ்ச்சியில் ஒன்றிய உள்துறை அமைச்சர் அமித்ஷா பங்கேற்ற நிலையில், தமிழ்த்தாய் வாழ்த்து பாடப்படாததற்கு தி.மு.க. அமைப்பாளர் இரா. சிவா கடும் கண்டனம் தெரிவித்துள்ளார்.
இது தொடர்பாக அவர் வெளியிட்டுள்ள அறிக்கையில், தமிழ்நாடு மற்றும் புதுச்சேரி மக்களின் உணர்வுகளோடு தொடர்புடைய தமிழ்த்தாய் வாழ்த்தை நிகழ்ச்சி யில் பாடாமல் புறக்கணித்திருப்பது கண்டனத்திற்குரியது என்று தெரிவித்துள்ளார்.
மேலும், நிகழ்ச்சியில் பாதுகாப்புப் பணியில் ஈடுபட்டிருந்த காவலர்கள் நீண்ட நேரம் பணியில் ஈடுபடுத்தப்பட்டதன் காரணமாக மயங்கி விழுந்த சம்பவம் குறித்தும் அவர் கவலை தெரிவித்துள்ளார். காவலர்களின் உடல்நலம் மற்றும் பணிச்சூழல் குறித்து உரிய கவனம் செலுத்தியிருக்க வேண்டும் என்றும் அவர் வலியுறுத்தியுள்ளார்.
ஒன்றிய உள்துறை அமைச்சர் பங்கேற்ற நிகழ்ச்சியை முன்னிட்டு புதுச்சேரியில் சாலைப் போக்கு வரத்தில் ஏற்பட்ட குளறுபடிகளால் பொதுமக்கள் கடும் சிரமத்திற்கு உள்ளானதாகவும் அவர் குற்றம் சாட்டியுள்ளார். போக்குவரத்தை ஒழுங்குபடுத்துவதற்கான முன்னேற்பாடுகள் முறையாக மேற்கொள்ளப்படாததாலும், அது
குறித்து பொது மக்களுக்கு போது மான விழிப்புணர்வு ஏற்படுத்தாததும், கடும் போக்குவரத்து நெரிசலில் மக்கள் பாதிக்கப்பட்டனர் என்று அவர் வேதனை தெரிவித்துள்ளார்.
மேலும், ஆளுநர் பதவியின் அரசியலமைப்புச் சார்பின்மை குறித்த கேள்வியையும் எழுப்பியுள்ள அவர், பா.ஜ.க. சார்பில் நடைபெற்ற நிகழ்ச்சியில் ஆளுநர் பங்கேற்றிருப்பது ஏற்புடையதல்ல என்றும் கண்டனம் தெரிவித்துள்ளார்.
மக்களின் உணர்வுகளையும், காவலர்களின் நலனையும், பொதுமக்களின் அன்றாடப் போக்குவரத்தையும் கருத்தில் கொண்டு அரசு உரிய நடவடிக்கைகளை மேற்கொள்ள வேண்டும் என தி.மு.க. அமைப்பாளர் இரா. சிவா வலியுறுத்தியுள்ளார்