புதுடெல்லி, ஆகஸ்ட் 11-–
தென் சென்னை மக்களவை உறுப்பினர் டாக்டர் தமிழச்சி தங்கபாண்டியன், வெளிநாடுகளுக்கு எடுத்துச் செல்லப்பட்ட இந்திய பழங்கால கலைப்பொருட்கள் மற்றும் தொல்பொருட்களை மீட்டு வருவது, கோஹினூர் வைரம், அமராவதி பளிங்குச் சிற்பங்கள் உள்ளிட்ட இந்திய பாரம்பரியப் பொருட்களை மீட்பதற்கான நடவடிக்கைகள் மற்றும் வெளிநாட்டு அருங்காட்சியகங்களில் உள்ள இந்திய தொல்
பொருட்கள் குறித்த விவரங்கள் தொடர்பாக மக்களவையில் கேள்வி எழுப்பினார்.
இந்திய பொக்கிஷங்கள்
மீட்கப்பட்டுள்ளதா?
அதாவது, கடந்த இரண்டு நூற்றாண்டுகளில் அமெரிக்கா, ஆஸ்திரேலியா, இங்கிலாந்து மற்றும் நெதர்லாந்து ஆகிய நாடுகளிலிருந்து திருடப்பட்ட 610 கலைப்பொருட்கள் மீட்கப்பட்டுள்ளனவா? அப்படியானால் அதன் விவரங்கள் என்ன? கோஹினூர் வைரம், அமராவதி பளிங்குச் சிற்பங்கள் மற்றும் இடைக்காலத்தைச் சேர்ந்த பல்வேறு சிற்பங்கள், சிலைகள், கல்வெட்டுகள் போன்ற பழங்காலப் பொக்கிஷங்கள் இன்னும் வெளிநாடுகளில் இருந்து இந்தியாவுக்கு மீட்டுக் கொண்டுவரப்படாமல் உள்ளனவா? அவற்றின் விவரங்கள் மற்றும் அதற்கான காரணங்கள் என்ன? மேலும், இந்தியாவில் இருந்து திருடப்பட்டு வெளிநாடுகளில் உள்ள அருங்காட்சியகங்களில் வைக்கப்பட்டுள்ள, இன்னும் மீட்கப்படாத தொல்பொருட்களின் பட்டியல் மற்றும் அவற்றின் தற்போதைய நிலை குறித்த தரவுகள் மத்திய அரசு மற்றும் இந்திய தொல்லியல் துறையிடம் (ASI) உள்ளதா? என்று கேள்வி எழுப்பினார்.
இதற்கு மத்திய கலாசாரம் மற்றும் சுற்றுலாத்துறை அமைச்சர் கஜேந்திர சிங் ஷெகாவத் எழுத்துப்பூர்வமாக பதில் அளித்தார்.
அந்தப் பதிலில் :-
அமெரிக்கா, ஆஸ்திரேலியா, இங்கிலாந்து மற்றும் நெதர்லாந்து ஆகிய நான்கு நாடுகளிலிருந்து இதுவரை மொத்தம் 662 இந்திய தொல்பொருட்கள் மீட்கப்பட்டுள்ளன. இதில் அதிகபட்சமாக அமெரிக்காவிலிருந்து 589 தொல் பொருட்கள் மீட்கப்
பட்டுள்ளன. ஆஸ்திரேலியாவிலிருந்து 51, இங்கிலாந்திலிருந்து 21, நெதர்லாந்திலிருந்து 1 தொல் பொருள் என மொத்தம் 662 தொல்பொருட்கள் மீட்கப்பட்டுள்ளதாக மத்திய அரசு தெரிவித்துள்ளது.
காலனித்துவ காலத்தில் இந்தியாவிலிருந்து வெளிநாடுகளுக்கு எடுத்துச் செல்லப்பட்ட பொருட்களை மீட்பது தொடர்பான விவகாரங்களை மத்திய அரசு பல்வேறு தளங்களில் தொடர்ந்து எழுப்பி வருகிறது. அவற்றை மீட்ப தற்கான நடவடிக்கைகள், ஒவ்வொரு பொருளையும் தனித்தனியாக பரிசீலித்து, பொருந்தக்கூடிய தேசிய மற்றும் சர்வதேசசட்டங்கள் மற்றும் உடன்படிக்கைகளின் அடிப்படையில் மேற்கொள்ளப்படுகின்றன. சம்பந்தப்பட்ட நாடுகள் மற்றும் அரசுகளுக்கு இடையேயான பரஸ்பர புரிதல் மற்றும்ஒத்துழைப்பின் மூலம் இத்தகைய பொருட்களை மீட்கும் நடவடிக்கைகள் மேற்கொள்ளப்படுவதாக தெரிவிக்கப்பட்டுள்ளது.
முழுமையான பட்டியல்
அரசிடம் இல்லை!
அதேநேரத்தில், கோஹினூர் வைரம், அமராவதி பளிங்குச் சிற்பங்கள் உள்ளிட்ட பொருட்களை மீட்பது தொடர்பாக எழுப்பப்பட்ட கேள்விக்கான பதிலை மத்திய அரசு தனது பதிலில் குறிப்பிடவில்லை. காலனித்துவ காலத்தில் வெளிநாடுகளுக்கு எடுத்துச் செல்லப்பட்ட பொருட்களை மீட்பது ஒவ்வொரு வழக்கின் அடிப்படையில் மேற்கொள்ளப்படுவதாக மட்டுமே தெரிவிக்கப்பட்டுள்ளது.
உலகம் முழுவதும் உள்ள பல அருங்காட்சியகங்கள் மற்றும் கலைக்
கூடங்களில் இந்திய தொல்பொருட்கள் உள்ளன. மேலும், தனிநபர்களிடமும் இத்தகைய பொருட்கள் உள்ளன. ஆனால், வெளிநாடுகளில் உள்ள இந்திய தொல்பொருட்கள் குறித்த முழுமையான பட்டியல் அரசிடம் இல்லை என்று மத்திய அரசு தெரிவித்துள்ளது.
வெளிநாட்டில் சட்ட
விரோதமாக ஏற்றுமதி செய்யப்பட்ட இந்தியாவைச் சேர்ந்த தொல்பொருள் இருப்பது குறித்து தகவல் கிடைக்கும்போது, அதை மீட்டுஇந்தியாவுக்கு கொண்டுவர சம்பந்தப்பட்ட நாட்டிலுள்ள இந்திய தூதரகம் அல்லது இந்தியத் தூதரகப் பணியகம் மூலம் தேவையான நடவடிக்கைகள் தொடங்கப்படுகின்றன..
இவ்வாறு பதில் தெரிவிக்கப்பட்டுள்ளது.
புதுடெல்லி ஆக..11–
“வேலூர் இன்னும் எத்தனை நாள் காத்திருக்க வேண்டும்?” என்று குறிப்பிட்டு வேலூர் விமான நிலைய தாமதம் குறித்து ஆகஸ்ட் 10 அன்று மக்களவையில் வேலூர் எம்.பி. டி. எம். கதிர் ஆனந்த் அவசர ஒத்திவைப்புத் தீர்மானம் அளித்தார்.
வேலூர் விமான நிலையத்தை வணிக ரீதியான விமான சேவைக்கு உடனடியாக கொண்டு வருவதில் தொடர்ந்து ஏற்பட்டுவரும் தாமதம் குறித்து, மக்களவையின் வழக்கமான அலுவல்களை ஒத்திவைத்து அவசரமாக விவாதிக்க வேண்டும் என்று வலியுறுத்தி, 10 ஆகஸ்ட் 2026 அன்று மக்களவையில் ஒத்திவைப்புத் தீர்மானம் (Adjournment Motion) கொண்டு வருவதற்கான அறிவிப்பை வேலூர் நாடாளுமன்ற உறுப்பினர் டி. எம். கதிர் ஆனந்த் அளித்துள்ளார்.
வேலூர் விமான நிலையத்தின் கட்டமைப்புப் பணிகள் பெருமளவில் நிறைவடைந்துள்ள நிலையிலும், உரிமம், பாதுகாப்பு அனுமதி மற்றும் செயல்பாட்டுத் தயார்நிலை போன்ற காரணங்களால் தொடர்ந்து வணிக விமான சேவை தொடங்கப்படாமல் இருப்பது குறித்து மத்திய அரசு உடனடியாக விளக்கம் அளிக்க வேண்டும் என அவர் வலியுறுத்தியுள்ளார்.
ஆகஸ்ட் 8, 2026 அன்று மத்திய சிவில் விமானப் போக்குவரத்துத் துறை அமைச்சர் கிஞ்சராப்பு ராம்மோகன் நாயுடு, வேலூர் விமான நிலையத்தின் மீதமுள்ள பணிகளை விரைவுபடுத்த அதிகாரிகளுக்கு அறிவுறுத்தியதுடன், அடுத்த ஆறு மாதங்களுக்குள் விமான நிலையம் பயன்பாட்டுக்கு வரும் என உறுதியளித்ததாக செய்திகள் வெளியாகியுள்ளன.
அமைச்சரின் நேரடி கவனத்தையும் நடவடிக்கையையும் வரவேற்ற கதிர் ஆனந்த் எம்.பி., இந்த உறுதி இம்முறை காலக்கெடு நிர்ணயிக்கப்பட்ட செயல் திட்டமாக மாற வேண்டும் என்று வலியுறுத்தினார்.
“வேலூர் விமான நிலைய விவகாரத்தில் மத்திய சிவில் விமானப் போக்குவரத்துத் துறை அமைச்சர் நேரடியாக கவனம் செலுத்தி, பணிகளை விரைவுபடுத்த அதிகாரிகளுக்கு அறிவுறுத்தியிருப்பதை நான் வரவேற்கிறேன். வேலூருக்கான எந்த நல்ல முயற்சியையும் நான் மனப்பூர்வமாக பாராட்டுகிறேன். ஆனால் வேலூர் மக்கள் பல ஆண்டுகளாக காலக்கெடுக்களையே கேட்டுக்கொண்டிருக்கிறார்கள். இனி எங்களுக்கு வேண்டியது இன்னொரு வாக்குறுதி அல்ல – உண்மையில் பறக்கும் விமானம்.”
இது இன்றுதொடங்கிய போராட்டமல்ல – தொடர்ச்சியான நாடாளுமன்ற முயற்சி
வேலூர் விமான நிலையத்திற்காக தற்போது அளிக்கப்பட்டுள்ள ஒத்திவைப்புத் தீர்மானம் திடீரென மேற்கொள்ளப்பட்ட நடவடிக்கை அல்ல என்றும், பல ஆண்டுகளாக நாடாளுமன்றத்தின் உள்ளேயும் வெளியேயும் தொடர்ந்து மேற்கொண்டு வரும் முயற்சியின் அடுத்த கட்டமே இது என்றும் கதிர் ஆனந்த் தெரிவித்துள்ளார்.