புதுடெல்லி, ஆக. 11–
எல் நினோவின் விளைவுகளி லிருந்து மக்களைப் பாதுகாக்க என்னென்ன முன்னெச்சரிக்கை நடவடிக்கைகள் எடுக்கப்பட்டுள்ளன என ஒன்றிய அரசிடம் தி.மு.க. எம்.பி. கிரிராஜன் கேள்வி எழுப்பி உள்ளார்.
தி.மு.க. நாடாளுமன்ற உறுப்பினர் இரா.கிரி ராஜன் மழைக்கால கூட்டத்தொடரில் கலந்து கொண்டு ஒன்றிய அரசின் புவி அறிவியல் துறை அமைச்சரிடம் இந்தியாவின் பருவமழையின் மீது எல் நினோவின் தாக்கம் குறித்து கேள்விகளை எழுப்பி உள்ளார்.
அவற்றில், 2026–2027ஆம் ஆண்டில் இந்தியாவில் ஒரு வலுவான “சூப்பர் எல் நினோ” ஏற்பட வாய்ப்புள்ளதா? அதன் விளைவாக பருவமழை பொய்த்துப் போதல்,அசாதாரண வெப்பநிலை உயர்வு, மத்திய இந்தியாவில் வறட்சி, சென்னை உள்ளிட்ட கடலோரத் தமிழ்நாட்டில் அதிக வெள்ளப்பெருக்கு ஏற்படக்
கூடுமா? எல் நினோவின் விளைவுகளிலிருந்து மக்களைப் பாதுகாக்க என்ன முன்னெச்சரிக்கை நடவடிக்கைகள் எடுக்கப்பட்டுள்ளன? பயிர் விளைச்சல், உணவு விலைகள், எரிசக்தி தேவை, பொருளாதார இழப்புகள் ஆகியவற்றின் மீதான எல் நினோவின் விளைவுகளை குறைப்பதற்காக என்ன மாதிரியான முன்கூட்டிய தயார்நிலை மற்றும் தகவமைப்பு நடவடிக்கைகள் எடுக்கப்பட்டுள்ளன? என்ற கேள்விகளை எழுப்பினார்.
இந்த கேள்விகளுக்கு பதிலளித்துள்ள ஒன்றிய அரசின் அறிவியல், தொழில்நுட்பம், புவி அறிவியல் அமைச்சகத்தின் இணை அமைச்சர் ஜிதேந்திர சிங் அளித்துள்ள பதிலில், உலக வானிலை ஆய்வு நிறுவனத்தாலோ (WMO) அல்லது இந்திய வானிலை ஆய்வு துறையாலோ (IMD) “சூப்பர் எல் நினோ” என்று அழைக்கப்படும் அதிகாரப்பூர்வமாக எதையும் வரையறுக்கவில்லை என தெரிவித்துள்ளார். 2026ஆம் ஆண்டு தென்மேற்குப் பருவ மழைக் காலத்தில் எல் நினோ நிலைமைகள் உருவாகும் என்று இந்திய வானிலை ஆய்வுத் துறை கணித்துள்ளது; எல் நினோ நிலைமைகள் ஜூன் 2026–ல் பலவீனமாக இருந்து, ஜூலை 2026–ல் மிதமான நிலைகளுக்குத் தீவிர மடைந்துள்ளன என இணை அமைச்சர் பதிலளித்துள்ளார்.
2026 அக்டோபர்–டிசம்பர் பருவத்தில் எல் நினோ மேலும் வலுப்பெற்று, மிகவும் வலுவான நிலையை அடையக்கூடும் என்றாலும், அதன் தீவிரம் மற்றும் இந்திய பகுதிகள் மீதான தாக்கங்கள் ஆகியவை ஒன்றிணைந்த கடல்–வளிமண்டல நிலைமைகளின் வளர்ச்சியைப் பொறுத்தே அமைவதற்கு எல் நினோவும் அதன் ஒரு காரணியாக இருப்பதாக விளக்கம் அளித்துள்ளார்.
எல் நினோ மற்றும் பிற காலநிலை காரணிகளின் வளர்ச்சியை இந்திய வானிலை ஆய்வுத் துறை தொடர்ந்து கண்காணித்து, மத்திய மற்றும் மாநில அரசுகளுக்கு பருவகால மற்றும் மாதாந்திர முன்னறி விப்புகள், நீண்ட கால முன்னறிவிப்புகள், வானிலை ஆலோசனைகள் ஆகியவற்றை வெளியிடுகிறது என்றும்; பேரிடர் மேலாண்மை அதிகாரிகள், மாநில அரசுகள், மாவட்ட நிர்வாகங்கள் உள்ளிட்டோர் தயார்நிலை மற்றும் மீட்பு நடவடிக்கைகளுக்கு ஆதரவளிக்கும் வகையில் பயன்படுத்துவதற்காக, ஒரு வார அத்த காலத்துக்கு செல்லுபடியாகும் ‘பாதிப்பு அடிப்படையிலான முன்னறி
விப்புகள்’ மற்றும் இடர் அடிப்படையிலான எச்சரிக்கைகளை தினசரி தகவல் தொடர்பு வழிகள் மூலம் வெளியிடுகிறது என்றும் ஒன்றிய அரசு பதிலளித்துள்ளது.