புதுடெல்லி, ஆக.12–
திராவிட முன்னேற்றக் கழக, மேலவை உறுப்பினர் எஸ்.ஆர். சிவலிங்கம் 10 ஆகஸ்ட் 2026 அன்று மாநிலங்களவையில் மின்சாரக் கட்டண உயர்வை சமநிலைப்படுத்தவும், மின்சார இழப்பினை தவிர்த்திடவும், இடையூறு இல்லாத மின்சாரத்தை பயனீட்டாளர்களுக்கு தொடர்ந்து வழங்கவும், ஒன்றிய அரசிடம் ஏதேனும் திட்டங்கள் உள்ளதா? அதன் விவரங்களை உறுப்பினர்களுக்கு தெரிவிக்க இயலுமா? என்றும்; ஒன்றிய அரசின் எரிசக்தித் துறை இணையமைச்சர் சிரிபத் நாயக் அவர்களிடம் விரிவான கேள்வியை எழுப்பினார்.
இதற்கு ஒன்றிய அரசின் எரிசக்தித் துறை இணையமைச்சர் அவர்கள் அளித்த பதில் வருமாறு:-
மின்சாரக் சட்டம் 2003ன் படி மின்சாரக் கட்டணம், தேசிய மின்சாரக் கொள்கையின்படி மின்சார ஒழுங்கு முறை ஆணையத்தின் உதவியுடனும், அந்தந்த மாநில அரசுகளால் நிர்ணயிக்கப்படுகிறது என்றும், மின்சார கொள்முதல் செலவு, மின்சாரத்தை கடத்தும் செலவு, மின்சாரத்தை வழங்கிடும் செலவு ஆகியவற்றின் அடிப்படையில் மின்சாரக் கட்டணம் நிர்ணயக்கப்படுகிறது என்றும், சீரமைக்கப்பட்ட மின்சாரம் வழங்கும் திட்டத்தின் ஒரு பகுதியாக மிக குறைந்த செலவில், மின்சாரம் தயாரிக்க நிலக்கரியை பெற்று தரும் திட்டம் உருவாக்கப்பட்டுள்ளது என்றும் இணையமைச்சர் மாநிலங்களவையில் தெரிவித்தார்.
மேலும் தேசிய மின்சாரக் கொள்கை 2026ன் படி, மின்சாரக் கொள்முதல் விலையைக் குறைக்க அனைத்து முயற்சிகளும் எடுக்கப்பட்டுள்ளதாகவும் மாநில மின்சார ஒழுங்குமுறை ஆணையத்தின் உதவியுடன் மின்சாரக் கட்டணம் நிர்ணயிக்கப்படுகிறது என்றும் தொடர்ந்து மின்சாரம் கிடைத்திட அனைத்து முயற்சிகளும் எடுக்கப்படுகிறது என்றும், சீரமைக்கப் பட்ட மின்சாரம் வழங்கும் திட்டத்தின்படி மின்சாரத்துறையில் சீர்திருத்தங்கள் மேற்கொள்ளப்படுகிறது என்றும் கடன் உதவி அளிக்கும் திட்டங்கள் செயல்படுத்தப்பட்டு வருகிறது என்றும், வழிகாட்டும் நெறிமுறைகள் வகுக்கப்பட்டுள்ளன என்றும், 874 ஜிகாவாட் அளவிற்கு மின்சார உற்பத்தியை பெருக்க தேவையான திட்டங்கள் செயல்படுத்தப்படும் என்றும் 3,15,000 மெகாவாட் அளவிற்கு அனல் மின் சக்தியும், 16,448 மெகா வாட் அளவிற்கு புனல் மின்சக்தியும், 8000 மெகா வாட் அளவிற்கு அணுமின் சக்தியும் உற்பத்திக்கான திட்டங்கள் தயார் நிலையில் உள்ளது என்றும்,1,46,720 மெகா வாட் அளவிற்கு புதுப்பிக்க தக்க எரிசக்தியும் பெறப்படும் என்று ஒன்றிய அரசின் எரிசக்தித் துறை இணையமைச்சர் சிரிபத் நாயக் அவர்கள் மாநிலங்களவையில் தி.மு.க. மேலவை உறுப்பினர் எஸ்.ஆர்.சிவலிங்கம் எழுப்பிய கேள்விக்கு விரிவான பதிலை அளித்துள்ளார்.