புதுடெல்லி, ஆக. 12 –
திராவிட முன்னேற்றக் கழக, அரக்கோணம் நாடாளுமன்ற உறுப்பினர், டாக்டர் எஸ். ஜெகத்ரட்சகன் அவர்கள், ஆகஸ்ட் 10, 2026 அன்று மக்களவையில், செயற்கை நுண்ணறிவின் விரைவான வளர்ச்சிக்கு ஏற்ப தாராளக் கலைக் கல்வியில் தொழில்நுட்ப அறிவு, அறநெறி, படைப்பாற்றல் மற்றும் விமர்சனச் சிந்தனையை ஒருங்கிணைத் தல், உயர்கல்வி நிறுவ னங்களில் பல்துறை கல்வியை ஊக்குவித்தல் மற்றும் செயற்கை நுண்ணறிவு சார்ந்த பணிச்சூழலுக்கு மாணவர்களைத் தயார்படுத்த ஒன்றிய அரசு மேற்கொண்டுள்ள நடவடிக்கைகள் குறித்து கேள்வி எழுப்பினார்.
ஒன்றிய அரசின் கல்வித் துறை இணை அமைச்சர் டாக்டர் சுகந்த மஜும்தார் அவர்கள் அளித்த பதிலில், தேசிய கல்விக் கொள்கை 2020-ன் கீழ் முழுமையான, பல்துறை மற்றும் மாணவர்களை மையமாகக் கொண்ட உயர்கல்விக்கு முக்கியத்துவம் அளிக்கப்பட்டுள்ளதாக தெரிவித்தார். கலை, படைப்பாற்றல் மற்றும் பகுப்பாய்வுப் பாடங்களுடன் செயற்கை நுண்ணறிவு, பெருந்தரவு பகுப்பாய்வு மற்றும் இயந்திரக் கற்றல் போன்ற நவீன தொழில்நுட்பத் துறை களையும் ஒருங்கிணைத்து கற்பிக்க நடவடிக்கை மேற்கொள்ளப்பட்டு வருவதாக கூறினார்.
பல்கலைக்கழக மானியக் குழுவின் பல்துறை உயர்கல்வி வழிகாட்டுதல்களின் கீழ், 2023-24 அகில இந்திய உயர்கல்வி ஆய்வின்படி, 500-க்கும் மேற்பட்ட பல்கலைக்கழகங்களும் 5,000-க்கும் மேற்பட்ட இணைப்புக் கல்லூரிகளும் பல்துறை கல்வித் திட்டங்களை வழங்கி வருகின்றன. தேசிய கல்விக் கடன் கட்டமைப்பை 700-க்கும் மேற்பட்ட பல்கலைக்கழகங்களும் 7,500-க்கும் மேற்பட்ட இணைப்புக் கல்லூரிகளும் ஏற்றுக்கொண்டு ள்ளன. இதன்படி, தாராளக் கலை மாணவர்கள் உட்பட மாணவர்கள் தங்கள் படிப்புக்கான மொத்த கல்விக் கடன்களில் 50 சதவீதம் வரை வளர்ந்து வரும் தொழில்நுட்பங்கள் சார்ந்த திறன் பாடங்கள் மூலம் பெற முடியும்.
ஸ்வயம் இணையவழிக் கல்வித் தளத்தில் 140-க்கும் மேற்பட்ட இலவச செயற்கை நுண்ணறிவு சார்ந்த பாடங்கள் வழங்கப்பட்டு வருவதுடன், இதுவரை 50 லட்சத்திற்கும் அதிகமான மாணவர்கள் அவற்றில் சேர்ந்துள்ளனர். மேலும், செயற்கை நுண்ணறி
வுக்கான திறன் தயார்நிலைத் திட்டத்தின் மூலம் விமர்சனச் சிந்தனை, மின்னணு அறிவுத்திறன் மற்றும் தொழில்நுட்பம் சார்ந்த பணிச்சூழலுக்குத் தேவையான திறன்கள் மாணவர்களுக்கு வழங்கப்பட்டு வருகின்றன.
பிரதம மந்திரி உயர்கல்வி இயக்கத்தின் கீழ் மாநிலப் பல்கலைக்கழகங்கள் மற்றும் கல்லூரிகளின் தரத்தை மேம்படுத்த நிதியுதவி வழங்கப்பட்டு வருவதாகவும், பல்துறை கல்வி மற்றும் ஆராய்ச்சிப் பல்கலைக்கழகங்கள் திட்டத் தின் கீழ் 35 பல்கலைக்கழகங்களுக்கு தலா ரூ.100 கோடி ஒதுக்க ஒப்புதல் அளிக்கப்பட்டுள்ளதாகவும், ஒன்றிய அரசின் கல்வித் துறை மாண்புமிகு இணை அமைச்சர் டாக்டர் சுகந்த மஜும்தார் அவர்கள், டாக்டர் எஸ். ஜெகத்ரட்சகன் அவர்கள் எழுப்பிய கேள்விக்கு எழுத்துப்பூர்வமாக அளித்த பதிலில் தெரிவித்துள்ளார்.