சென்னை, ஆக. 13 –
எப்.சி.ஆர்.ஏ. சட்டத் திருத்த மசோதாவை திரும்பப் பெற வேண்டும் என்ற தீர்மானத்தில் கழகம் சார்பில் வரவேற்று எஸ்.ஆஸ்டின் பேசியதாவது:–
பேரவைத் தலைவர் அவர்களே, ஒன்றிய அரசு கொண்டு வந்துள்ள ‘வெளிநாட்டு பங்களிப்பு (ஒழுங்குமுறை) திருத்த மசோதா, 2026-ஐ அதன் தற்போதைய வடிவில் திரும்பப் பெறுமாறு ஒன்றிய அரசை தமிழ்நாடு சட்டமன்றப் பேரவை ஒருமனதாக வலியுறுத்துகிறது’ என்ற அரசு கொண்டு வந்த தனித் தீர்மானத்தினை திராவிட முன்னேற்றக் கழகம் வரவேற்கிறது, ஆதரிக்கிறது.
இந்த மசோதா மிகவும் ஆபத்தான, புதிய அதிகாரங்களை உருவாக்குகிறது. இந்தத் திருத்த மசோதாவை திரும்பப் பெறக்கோரி, இந்த மசோதாவில் உள்ள பாதிப்புகளைக் குறித்து விளக்கமாகத் தெரிவித்து, சட்டமன்றத் தேர்தலுக்கு முன்பே 3-.4.-2026 அன்று எங்களுடைய தலைவர், திராவிட மாடல் அரசினுடைய நாயகர், முன்னாள் தமிழ்நாடு முதலமைச்சர் அண்ணன் ஸ்டாலின் அவர்கள், பிரதமர் நரேந்திர மோடி அவர்களுக்கு கடிதம் மூலம் வலியுறுத்தியுள்ளார்கள். அதுமட்டுமல்லாமல், தேர்தல் முடிந்தபிறகும்கூட தொடர்ந்து எங்களுடைய தலைவர் அவர்கள், எங்களுடைய நாடாளுமன்ற உறுப்பினர் பி. வில்சன் அவர்களுடைய தலைமையில் இந்தியா முழுவதுமுள்ள 16 சிறுபான்மை மதத் தலைவர்களை உள்ளடக்கிய Joint Action Forum on Minorities என்ற ஓர் அமைப்பை உருவாக்கினார்கள்.
அந்த அமைப்பு, பி. வில்சன், M.P. அவர்களுடைய தலைமையில், 6-.8.-2026 அன்று உள்துறை அமைச்சர் அமித் ஷா அவர்களைச் சந்தித்து, சுமார் ஒரு மணி நேரம் இந்தச் சட்டத் திருத்தத்தில் உள்ள பாதிப்புகளையெல்லாம் அவர்களிடத்தில் எடுத்துச் சொல்லி, இந்த மசோதாவைத் திரும்பப் பெற வேண்டுமென்று வலியுறுத்தியுள்ளார்கள்.
சிறுபான்மையின மக்கள்
மீது தாக்குதல்!
பேரவைத் தலைவர் அவர்களே, இந்தத் திருத்த மசோதா சிறுபான்மையினர் நடத்தக்கூடிய தொண்டு நிறுவனங்கள்மீது நடத்தப்படும் மிகப்பெரிய ஒரு தாக்குதலாகும். இந்தச் சட்டத்தில் உள்ள பிரிவு 16A (5)-ன்படி, தானாகவே முடிவுக்கு வருதல் என்ற ஒரு புதிய வரையறை கொண்டுவரப்பட்டுள்ளது. அதாவது, இந்த வரையறையின்படி, தொண்டு நிறுவனங்கள் FCRA licence-ஐ புதுப்பிக்க வில்லை என்றாலோ அல்லது அரசு FCRA licence-ஐ புதுப்பிக்க மறுத்தாலோ அல்லது நிர்வாக ரீதியாக ஏதாவது ஒரு தாமதம் ஏற்பட்டாலோ, சிறுபான்மை
யினர்கள் நடத்தக்கூடிய தொண்டு நிறுவனங்களின் உரிமை, தானாகவே இரத்து செய்யப்பட்டுவிடும். அதற்கான காரணம் சொல்லவேண்டிய எந்த அவசியமும் இந்தத் திருத்தச் சட்டத்தில் இல்லை. அவர்கள் என்ன தவறு செய்தார்கள் என்பதைக்கூட சொல்லாமல், அவர்களுடைய உரிமை முழுமையாக இந்தச் சட்டத் திருத்தத்தின் மூலமாக பறிக்கப்பட்டுவிடுகிறது.
இன்னும் ஒன்றிரண்டு பிரிவுகள் இந்தச் சட்டத்தில் இருக்கின்றன. இந்தச் சட்டத்தில் உள்ள பிரிவு 16A (3) மற்றும் (6)-ன்படி, நிர்ணயிக்கப்பட்ட அதிகார அமைப்பு என்ற புதிய அமைப்பு ஒன்று உருவாக்கப்பட்டிருக்கின்றது. அதற்கு ஒன்றிய அரசால் தனியாக ஓர் அதிகாரி நியமிக்கப்பட்டுள்ளார். சிறுபான்மை அமைப்புகள் நடத்தக்கூடிய தொண்டு நிறுவனங்களை மிரட்டு வதற்காக, அமலாக்கத் துறை போல செயல்பட இந்தப் புதிய அமைப்பு உருவாக்கப்பட்டுள்ளது என்று நாங்கள் கருதுகின்றோம். இந்த அமைப்பின்மூலமாக தொண்டு நிறுவனங்கள் நடத்தும் கிறித்துவ வேதாலயங்கள் உட்பட அனைத்து சொத்துகளையும் பறிமுதல் செய்ய முடியும். குறிப்பாக, பள்ளிகள், மருத்துவமனைகள், ஆதரவற்றோர் இல்லங்கள், நிலங்கள் உட்பட அனைத்தையும் அந்தக் குறிப்பிட்ட அதிகாரி அவரது கட்டுப்பாட்டிற்குள் கொண்டுவர முடியும்.
தொண்டு நிறுவனங்கள்
பாதிக்கப்படும்!
இந்த மசோதாவில் மிகவும் கொடூரமான பகுதி என்னவென்றால், திருத்தத்திலே குறிப்பிடப்பட்டுள்ள பகுதி 16A (1) மற்றும் (2)-ன்படி, உரிமையாதல் என்ற ஒரு குறிப்பு அங்கே சொல்லப்பட்டிருக்கின்றது. அந்த உரிமையாதல் பிரிவின்படி தொண்டு நிறுவனத்தினு டைய சொத்துக்கள் வெளிநாட்டு நிதிகள் மூலமாகவோ அல்லது வெளிநாடு மற்றும் உள்நாட்டு நிதிகள் கலந்திருந்தாலும் சரி, இந்த FCRA திருத்த மசோதா நிறைவேறிய உடனேயே, உரிமைகளை இழக்கக்கூடிய தொண்டு நிறுவனங்களினு டைய முழு சொத்துக்களும் ஒன்றிய அரசினுடைய
கட்டுப்பாட்டிற்குள் போய்விடும். ஒன்றிய அரசால் நியமிக்கப்பட்டிருக்கும் அந்த அதிகாரி, அந்தச் சொத்துக்களை அரசுத் துறைக்கு மாற்றலாம் அல்லது விற்கலாம், விற்ற பணத்தை அரசின் தொகுப்பு நிதிக்கு, அதாவது Consolidated Fund என்ற நிதிக்கு கொண்டு செல்லப்படலாம். இதில் தொண்டு நிறுவனங்களின் உரிமை, முழுமையாகப் பாதிக்கப்படுவதை அரசினுடைய கவனத்திற்கு நான் கொண்டு வருகின்றேன்.
மேற்சொன்ன திருத்த விதிகளுடைய தாக்கத்தைப் பார்க்கின்றபொழுது, 50 ஆண்டுக்காலமாக நாம் கட்டிக் காத்த பள்ளிகள், மருத்துவமனைகள், முதியோர் மற்றும் ஆதரவற்றோர் இல்லங்கள் உள்ளிட்ட சமூகநல அமைப்புகள் அனைத்தும், ஒரே கையெழுத்தில் ஒன்றிய அரசினுடைய கைகளுக்குச் சென்றுவிடும். ஏழை மற்றும் கிராமப்புற மக்களுக்கு அவர்கள் பெற்றுவந்த சேவைகள் முற்றிலு மாக முடக்கப்பட்டுவிடும். இந்தச் சட்டத் திருத்த மசோதா என்பது சட்டத்தின் பெயரிலேயே, துப்பாக்கி முனையில் அடிக்கப்படும் மிகப்பெரிய கொள்ளை மட்டுமல்ல, இது ஒரு சட்டப்பூர்வமான திருட்டுமாகும் என்பதை இந்த அவைக்கு நான் தெரிவித்துக்கொள்ள கடமைப்பட்டிருக்கின்றேன்.
மேலும் இந்த மசோதா, இந்திய அரசியல் சாசனத்தின்அடிப்படை உரிமைகளை நேரடியாக மீறுகிறது. அரசியலமைப்பு உறுப்புரை 25-மத சுதந்திரம், அரசியலமைப்பு உறுப்புரை 26-மத விவகாரங்களை நிருவகிப்ப தற்கான சுதந்திரம், அரசியலமைப்பு உறுப்புரை 29 மற்றும் 30-சிறுபான்மையினரின் கல்வி உரிமைகள், அரசியலமைப்பு உறுப்புரை 300A- சொத்துரிமை என இவை அனைத்தையும் இந்த மசோதா புறக்கணித்திருக் கின்றது.
இந்தத் திருத்த மசோதா இயற்கை நீதிக்கு எதிராக உள்ளது மட்டுமல்ல, தொண்டு நிறுவனங்களைக் கேட்காமல், காரணம் சொல்லாமல், விசாரணை இல்லாமல், அவற்றின் சொத்துக்களைப் பறித்துக்கொள்வது என்பது அடிப்படை உரிமையையே மீறு வதாகும். திராவிட முன்னேற்றக் கழகம் எங்களுடைய தலைவருடைய தலைமையில், தொடர்ந்து இந்த மசோதாவை திரும்பப் பெறுவதற்கான அனைத்து முன்னெடுப்பு களையும் நாங்கள் எடுத்துக்கொண்டிருக்கின்றோம்.
எனவே, இன்றைக்கு இந்த மசோதாவை திரும்பப் பெறுவதற்கான தனித் தீர்மானத்தைக் இந்த அரசும் கொண்டுவந்திருக்கிறது. அரசு கொண்டு வந்துள்ள இந்தத் தீர்மானத்தை நாங்கள் வரவேற்பதோடு, இந்தத் தீர்மானத்தை ஒன்றிய அரசு திரும்பப் பெறுவதற்கான அனைத்துத் தொடர் நடவடிக்கைகளையும் இந்த அரசு மேற்கொள்ள வேண்டுமென்று கேட்டு, இந்தத் தீர்மானத்தை வரவேற்று நிறைவு செய்கிறேன்.
இவ்வாறு எஸ்.ஆஸ்டின் பேசினார்.