சென்னை, ஆக. 13 –
கோவையில் கல்லூரி மாணவன் அமுதன் கொலையில் காவல் துறை ஏன் இவ்வளவு அலட்சியமாக நடந்து கொள்கிறது என்றும், கண்டிப்பாக இந்தக் கொலைக்கு நீதி வேண்டும் என்றும் எதிர்க்கட்சித் தலைவர்
உதயநிதி ஸ்டாலின் அவர்கள் சட்டப்பேரவையில் நேற்று கவன ஈர்ப்புத் தீர்மானம் கொண்டு வந்து உரையாற்றுகையில் குறிப்பிட்டார்.
கோவை, ஒத்தக்கால் மண்டபம் பகுதி தனியார் பொறியியல் கல்லூரியில், மூன்றாம் ஆண்டு படித்து வந்த மாணவர் அமுதன், 20 பேர் கொண்ட கும்பலால், அதுவும் அவருடன் படிக்கின்ற மாணவர்களாலேயே அடித்து கொல்லப்பட்டுள்ள சம்பவம் குறித்து, சட்டப்பேரவையில், எதிர்க்கட்சித் தலைவர்
உதயநிதி ஸ்டாலின் ஆற்றிய உரை வருமாறு:–
‘‘பேரவைத் தலைவர் அவர்களே,
இன்றைக்கு தமிழ்நாடே அதிர்ச்சி அடைகின்ற அளவுக்கு, நேற்று முன்தினம் ஒரு சம்பவம் கோவையில் நடந்திருக்கிறது. கோவை ஒத்தக்கால் மண்டபம் பகுதியில் இருக்கின்ற ஒரு தனியார் பொறியியல் கல்லூரியில், மூன்றாம் ஆண்டு படித்து வந்த மாணவர்
அமுதன். நேற்று 20 பேர் கொண்ட கும்பலால், அதுவும் அவருடன் படிக்கின்ற மாணவர்களாலேயே அடித்துக் கொல்லப்பட்டுள்ளார். இதை ஏதோ ஒரு தனிநபர் சம்பவமாக, நாம் பார்க்க முடியாது. இதற்கு அரசு பொறுப்பேற்க வேண்டும்.
ஏனென்றால், வழக்கு விசாரணைக்காக மாணவர் அமுதனை, நேற்று முன்தினம் கோவை, செட்டிப்பாளையம் போலீசார் வரச்சொல்லியிருக்கிறார்கள். அப்போது, மாணவர்கள் மத்தியில் போதைப்பொருள் விற்கிற சிலரைப் பற்றி அமுதனிடம் காவல்துறையினர் விசாரித்துள்ளார்கள். தகவல் வாங்கியிருக்கிறார்கள்.
அந்தத் தகவலை இரகசியமாக வைத்து குற்றவாளிகளைப் பிடித்து, போதைப் பொருட்களைப் பறிமுதல் செய்ய வேண்டிய காவல்துறை, போதைப்பொருள் விற்ற நபர்களை அழைத்து, புகார் கொடுத்தவர் பற்றிய தகவலைச் சொல்லியிருக்கிறார்கள். அந்தக் கோபத்தில்தான் மாணவர் அமுதனை அந்தக்
கும்பல் அடித்துக் கொலை செய்துவிட்டதாக அமுதனின் பெற்றோர், ஊடகங்களில் பேட்டி கொடுத்திருக்கிறார்கள்.
காவல்துறை ஏன் இவ்வளவு அலட்சியமாக நடந்து கொள்கிறது என்று இந்த அரசு விளக்கம் கொடுக்க வேண்டும். இனியும் இதுபோன்ற சம்பவங்கள் நடக்காமல், இந்த அரசு பார்த்துக் கொள்ள வேண்டும். மாணவர் அமுதனின் கொலைக்குக் கண்டிப்பாக நீதி கிடைக்க வேண்டும்.’’
இவ்வாறு சட்டப் பேரவையில், கோவை சம்பவம் குறித்து, எதிர்க்கட்சித் தலைவர் உதயநிதி ஸ்டாலின் பேசினார்.