ஆனால் அந்த நம்பிக்கையை உச்சநீதிமன்றம் இறுதித் தீர்ப்பை அளிக்கும் வரையில் மட்டுமல்ல, அதன் பிறகு கூட அம்மாநிலம் நமக்கு அளிக்கவில்லை.
“பேச்சுவார்த்தை” என்ற அத்தியாயத்தை
உச்சநீதிமன்றம் முடித்து வைத்துள்ளது!
எனவேதான் “பேச்சுவார்த்தை” என்ற அத்தியாயம் ஏற்கனவே உச்சநீதிமன்ற இறுதித் தீர்ப்பால் முடித்து வைக்கப்பட்டு விட்டது என்பதைத்தான் இந்த மன்றத்தில் பதிவு செய்ய விரும்புகிறேன்.
இனி காவிரி மேலாண்மை ஆணையம் சொல்வதை இரு மாநில நல்லுறவுகள் அடிப்படையில் கர்நாடகம் கேட்க வேண்டும் என தமிழ்நாட்டு விவசாயிகளும் எதிர்பார்க்கிறார்கள். இங்கு இருக்கும் ஆளுங்கட்சியும், எதிர் வரிசையில் உள்ள பிரதான எதிர்கட்சி உள்ளிட்ட அனைத்துக் கட்சிகளும் கருதுகின்றன.
இந்தச் சூழ்நிலையில் “பேச்சுவார்த்தை” எனப் புறப்படுவது, நமக்குள்ள காவிரி நதிநீர் உரிமையை மீண்டும் பேச்சுவார்த்தை வரம்பிற்குள் கொண்டு வருவதாகும். அது நம் விவசாயிகளுக்கும் நல்லதில்லை. நாம் பெற்ற உரிமைகளுக்கும் நல்லதல்ல என்பதை தெரிவித்துக் கொள்கிறேன்.
மேகதாது அணை:
மூன்று நிபந்தனைகள்!
காவிரி நீர் போல் இன்னொரு அச்சுறுத்தல் மேகதாது அணை. இந்த அணையைக் கட்ட இதுவரை ஒன்றிய அரசு அனுமதி கொடுக்கவில்லை. இங்கே ஆட்சிப் பொறுப்பில் இருந்த திராவிட முன்னேற்றக் கழகமாக இருந்தாலும், அ.தி.மு.க.வாக இருந்தாலும் காவிரிப் பிரச்சினையில் சட்டரீதியாக தமிழ்நாட்டின் உரிமையை பாதுகாக்கவே போராடி வந்திருக்கிறோம். த.வெ.க. அரசும் அந்த திசையில்தான் பயணிக்கும் என நம்புகிறேன்.
மேகதாது அணைக் கட்டுவதற்கு இன்று நேற்றல்ல, முத்தமிழறிஞர் கலைஞர் அவர்கள் முதலமைச்சராக இருந்த காலத்திலிருந்து எதிர்த்து வந்திருக்கிறோம். இதே அவையில் தீர்மானங்களை நிறைவேற்றியிருக்கிறோம்.
இவ்வளவுக்கும் பிறகு கர்நாடக மாநிலம் மேகதாது அணை கட்ட “விரிவான திட்ட அறிக்கை” தயாரிக்கலாம் என 2018-இல் ஒன்றிய நீர்வளத்துறை அணையம் அனுமதியளித்தது. ஆனால் அது Blanket Permission அல்ல. மூன்று நிபந்தனைகளை விதித்தது. 22.11.2018 கடிதத்தை எடுத்து படித்துப் பார்த்தால் உங்களுக்கு எல்லாம் தெரியும்.
முதல் நிபந்தனை: தமிழ்நாடு அரசின் நிபந்தனைகளை DPR தயாரிக்கும் போது பரிசீலனையில் கர்நாடகம் எடுத்துக் கொள்ள வேண்டும்.
இரண்டவது நிபந்தனை: மத்திய மின்சார வாரியம், சம்பந்தப்பட்ட மாநிலத்தில் உள்ள காவிரி மேலாண்மை ஆணைய அலகு ஆகியவற்றுடன் கலந்து ஆலோசித்து இந்த DPR தயாரிக்க வேண்டும்
மூன்றாவது நிபந்தனை: இப்படி கர்நாடகம் தயாரிக்கும் “விரிவான திட்ட அறிக்கை”யை பரிசீலனை செய்வதற்கு, காவிரி மேலாண்மை ஆணையத்தின் ஒப்புதல் முக்கியம். அதாவது இந்த ஒப்புதல் “Pre requisite” (முன்கூட்டிய தேவை) எனத் தெளிவுபடுத்தப்பட்டுள்ளது.
நிபந்தனைகளுடன் DPR தயாரிக்க அனுமதி வழங்கப்பட்டுள்ளதாலும், ஒன்றிய நீர்வளத்துறை ஆணையம் ஒரு Expert Body என்பதாலும், இப்போதைக்கு உச்சநீதிமன்றம் தலையிட விரும்பவில்லை எனக் கூறியது.
அது மட்டுமின்றி, இந்த நிபந்தனைகளை மீறி மேகதாது அணைக்கட்ட DPR தயாரிக்கப்பட்டால், “Parties would be at liberty to take such steps as permissible in law” என்ற ஒரு rider உடன்தான் உச்சநீதிமன்றம் தமிழ்நாட்டின் கோரிக்கையின் மீது Directions கொடுக்க மறுத்துள்ளதே தவிர,
தமிழ்நாடு சார்பில் சரியான முகாந்தி ரங்களை வைத்து வாதாடவில்லை என்றோ, தமிழ்நாட்டின் கோரிக்கையில் நியாயமில்லை என்றோ கூறவில்லை என்பதை தெரிவித்துக் கொள்கிறேன்.
கர்நாடகம் தயாரித்த DPR உச்சநீதிமன்ற வழிகாட்டுதலின்படி இல்லை என்பதால், அதையே ஒன்றிய நீர்வளத்துறை ஆணையம் கர்நாடக அரசுக்கு திருப்பி அனுப்பி விட்டது.
கர்நாடக அரசின் கரத்தை
வலுப்படுத்த வேண்டாம்!
திராவிட முன்னேற்றக் கழக ஆட்சியில் இருந்த வரை மேகதாது அணை கட்ட விரிவான திட்ட அறிக்கை அனுமதிக்கப்படவில்லை என்பதுதான் நிலைமை.
அதனால்தான் தேர்தலுக்கு முன்பு, அதாவது கடந்த 4.3.2026 அன்று மேகதாது அணை பிரச்சினையில் நடுவர் மன்றம் அமைக்க வேண்டும் எனக் கோரிக்கை வைத்தோம்.
இந்த அரசு கொண்டு வந்த தீர்மானத்திலும் அதை திருத்தமாக எதிர்கட்சித் தலைவர் அவர்கள் அளித்து, அதுவும் ஏற்றுக் கொள்ளப்பட்டு, ஒருமனதாக நிறைவேற்றப்பட்டுள்ளது.
ஆகவே மேகதாது அணை தொடர்பாக தமிழ்நாடு அரசின் மனு தள்ளுபடி செய்யப்பட்டு விட்டது என்றெல்லாம் பேசி, கர்நாடக அரசின் கரத்தை வலுப்படுத்த வேண்டாம்.
எப்போது கர்நாடக அரசு DPR தயாரிக்க முன்வந்தாலும், தி.மு.க. ஆட்சியில் பெறப்பட்ட உச்சநீதிமன்றத் தீர்ப்பை கடைப்பிடித்தே ஆக வேண்டும். இதுதான் சட்ட நியதி என்று கூறிக்கொள்ள விரும்புகிறேன்.
தேர்தல் ஜனநாயக வரலாற்றில் தமிழ்நாடு சட்டமன்றம் புகழ் மிக்கது. நூற்றாண்டு கண்ட இச்சட்டமன்றத்தின் உறுப்பினர்களாக நாம் எல்லாம் இருப்பது பெருமைமிக்கது.
நான் இந்த அவையின் உறுப்பினராக முதலில் நுழைந்த 2001-ஆம் ஆண்டிலிருந்து இன்றுவரை, இச்சட்டமன்ற உறுப்பினர் என்பதை நாட்டின் எந்த மூலை முடுக்கிற்குப் போனாலும், பெருமிதத்துடன் கூறிக்கொள்ள முடிகிறது.
அத்தகையை சிறப்பு வாய்ந்த சட்டமன்றத்தில், குறிப்பாக இந்த 17-ஆவது சட்டமன்றத்தில் சீனியர்களான நாங்கள் இடம் பெற்றிருக்கிறோம் என்றால், எண்ணற்ற இளைஞர்களும் வந்திருப்பது நம் ஜனநாயகத்தின் இளமையைக் காட்டுகிறது.
இளமையான ஜனநாயகம் - துடிப்புமிகு ஜனநாயகமாக இருக்க, ஆரோக்கியமான விவாதத்திற்காக, கருத்துமிக்க கலந்துரையாடலுக்காக நமக்கு எல்லாம் சட்டமன்ற விதிகளைத் தொகுத்து தந்திருக்கிறார்கள்.
நம்மையெல்லாம் வழிநடத்திச் செல்வதற்காக பேரவைத் தலைவர் அவர்கள் இங்கே இருக்கிறார்கள். அந்த விதிகளிலேயே, தனிப்பட்ட குற்றச்சாட்டுகளோ அல்லது அவதூறான வார்த்தைகளோ இருக்கக் கூடாது என்பது ஒரு விதி. நீதி விசாரணையில் இருக்கும் எப்பொருளின் மீதும் கருத்தை சொல்லவோ அல்லது அப்பொருள் பற்றிக் குறிப்பிடவோ கூடாது. பேரவைக்கு ஒவ்வாத பயன்படுத்தக்கூடாத சொற்களை பயன்படுத்தக் கூடாது.
செய்தித்தாள் அடிப்படையாக வைத்து, பேரவைத் தலைவரின் அனுமதியின்றி பேசக்கூடாது. இவை வெறும் சாம்பிள்கள். நாம் அனைவரும் சட்டமன்ற உறுப்பினராக பொறுப்பேற்ற தினத்திலேயே இச்சட்டப் பேரவையின் விதிகள் அடங்கிய புத்தகம் கொடுக்கப்படும். அப்படியொரு புத்தகம் இங்கே இளைஞர்களாக அமர்ந்திருக்கும் உறுப்பினர்கள் கைகளுக்கும் வந்து சேர்ந்திருக்கும்.
அந்த 292 விதிகள் கொண்ட “தமிழ்நாடு சட்டமன்றப் பேரவை விதிகள்” தான் நமக்கு எல்லாம் இங்கு இருக்கும் தலைவர். அதன்கீழ்தான் பேரவைத் தலைவர் நம்மையெல்லாம் வழிநடத்திச் செல்கிறார்.
ஆகவே மூத்த உறுப்பினர் என்ற முறையில் நான் சொல்லிக் கொள்வது, இது பாரம்பரியமிக்க சட்டமன்றம்.
அதன் பழம்பெருமையை, ஜனநாயகத்தைத் தாங்கி நிற்கும் அந்த தூணை, ஆரோக்கியமான விவாதங்கள் மூலம் முன்னெடுத்து, வெளி உலகில் புகழ் சேர்க்க வேண்டும் என்று கேட்டு அமைகிறேன்.
இவ்வாறு முன்னாள் முதல்வர் ஓ.பன்னீர்செல்வம் அவர்கள் பேசினார்.