புதுடெல்லி, ஆக. 13 –
திராவிட முன்னேற்றக் கழக, அரக்கோணம் நாடாளுமன்ற உறுப்பினர், டாக்டர் எஸ்.ஜெகத்ரட்சகன் அவர்கள், நேற்று மக்களவையில், நிலையான வேளாண்மை, இயற்கை வேளாண்மை, மண் வளப் பாதுகாப்பு, நீர் சேமிப்பு மற்றும் பருவநிலைத் தாங்குதிறனை வலுப்படுத்த ஒன்றிய அரசு மேற்கொண்டுள்ள நடவடிக்கைகள் குறித்து கேள்வி எழுப்பினார்.
ஒன்றிய அரசின் வேளாண்மை மற்றும் விவசாயிகள் நலத்துறை இணை அமைச்சர் ராம்நாத் தாக்கூர் அவர்கள் அளித்த பதிலில், மண் வளப் பாதுகாப்பு, நீர் பயன்பாட்டுத் திறன், இயற்கை வேளாண்மை, வேளாண் காடு வளர்ப்பு மற்றும் பருவநிலையைத் தாங்கும் தொழில்நுட்பங்களுக்கு முக்கியத்துவம் அளிக்கப்பட்டு வருவதாக தெரிவித்தார். மண் வள அட்டைத் திட்டத்தின் கீழ் 26.18 கோடி அட்டைகள் வழங்கப்பட்டுள்ளதுடன், “ஒரு சொட்டு நீரில் அதிக பயிர்” திட்டத்தின் கீழ் 114.60 லட்சம் ஹெக்டேர் நுண்ணீர்ப்பாசனத்தின் கீழ் கொண்டுவரப்பட்டுள்ளது.
பரம்பரகத் கிருஷி விகாஸ் யோஜனா மூலம் 18.93 லட்சம் ஹெக்டேர் பரப்பில் 33.63 லட்சம் விவசாயிகளும், தேசிய இயற்கை வேளாண்மை இயக்கத்தின் கீழ் 11.81 லட்சம் ஹெக்டேர் பரப்பில் 24.69 லட்சம் விவசாயிகளும் பயனடைந்துள்ளனர். இயற்கை வேளாண்மைக்கு ஒரு ஏக்கருக்கு இரண்டு ஆண்டுகளுக்கு 4,000 ஊக்கத்தொகை வழங்கப்படுகிறது. வேளாண் காடு வளர்ப்புத் திட்டத்தின் கீழ் 826 நாற்றங்கால்கள் அமைக்கப்பட்டு, 1,062.18 லட்சம் நாற்றுகள் வளர்க்கப்பட்டுள்ளன. நிதி ஆயோக் மதிப்பீட்டின்படி, இயற்கை வேளாண்மையில் 75.85 சதவீத விவசாயிகள் முன்னேற்றம் ஏற்பட்டதாகவும், தேசிய இயற்கை வேளாண்மை இயக்கத்தின் கீழ் 90.1 சதவீத விவசாயிகள் இடுபொருள் செலவு குறைந்ததாக வும் தெரிவித்துள்ளனர். 2024-25ஆம் ஆண்டில் உணவு தானிய உற்பத்தி 357.73 மில்லியன் டன்னாகவும், தோட்டக்கலை உற்பத்தி 370.73 மில்லியன் டன்னாகவும் உயர்ந்துள்ளதாக, ஒன்றிய அரசின் வேளாண்மை மற்றும் விவசாயிகள் நலத்துறை இணை அமைச்சர் ராம்நாத் தாக்கூர் அவர்கள், டாக்டர் எஸ். ஜெகத்ரட்சகன் அவர்கள் எழுப்பிய கேள்விக்கு எழுத்துப்பூர்வமாக அளித்த பதிலில் தெரிவித்துள்ளார்.