புதுடெல்லி, ஆக. 14–
தமிழகத்தில் தேசிய உணவுப் பாதுகாப்புச் சட்டம் (NFSA), 2013 மற்றும் பொது விநியோகத் திட்டம் (PDS) செயல்படுத்தப்பட்டு வருவது குறித்து காஞ்சிபுரம் நாடாளுமன்ற உறுப்பினர் க. செல்வம் மக்களவையில் எழுப்பிய கேள்விக்கு ஒன்றிய நுகர்வோர் விவகாரங்கள், உணவு மற்றும் பொது விநியோக அமைச்சகம் பதிலளித்துள்ளது.
ஒன்றிய அரசின் பதிலின்படி, 16.07.2026 நிலவரப்படி தமிழகத்தில் 362.23 லட்சம் பயனாளிகள் தேசிய உணவுப் பாதுகாப்புச் சட்டத்தின் கீழ் இலவச உணவுத்தானியங்களைப் பெற்று வருகின்றனர். தமிழகத்திற்கு நிர்ணயிக்கப்பட்ட 364.70 லட்சம் பயனாளிகள் என்ற இலக்கில் இது குறிப்பிடத்தக்க
அளவாகும்.
மேலும், தமிழகத்தில் செயல்பட்டு வரும் நியாயவிலைக் கடைகளின் எண்ணிக்கை 2024ஆம் ஆண்டில் 34,805 ஆகவும், 2025ஆம் ஆண்டில் 34,890 ஆகவும் இருந்துள்ளது.
தமிழகத்திற்கு கடந்த மூன்று ஆண்டுகளில் ஆண்டுதோறும் 36.77 லட்சம் டன் உணவுத்தானியங்கள் ஒதுக்கீடு செய்யப்பட்டுள்ளதாக ஒன்றிய அரசு தெரிவித்துள்ளது.
பொது விநியோகத் திட்டத்தில் வெளிப்படைத்தன்மை மற்றும் செயல்திறனை மேம்படுத்தும் வகையில், ரேஷன் அட்டைகளின் 100% தரவுத்தள மயமாக்கல் மற்றும் ஆதார் இணைப்பு, ஆன்லைன் உணவுத்தானிய ஒதுக்கீடு, விநியோகச் சங்கிலி கணினிமயமாக்கல், e-PoSகருவிகள், உயிர்முறை அங்கீகாரம் உள்ளிட்ட பல்வேறு நடவடிக்கைகள் மேற்கொள்ளப்பட்டுள்ளன.
மேலும், ‘ஒரேநாடு – ஒரே குடும்ப அட்டை’ (ONORC) திட்டத்தின் மூலம் நாடு முழுவதும் ரேஷன் அட்டை எடுத்துச் செல்லும் வசதியும், SMART-PDS மற்றும் நிகழ்நேர தரவு கண்காணிப்பு உள்ளிட்ட நவீன தொழில்நுட்ப நடவடிக்கைகளும் செயல்படுத்தப்பட்டு வருகின்றன.
பயனாளிகளின் குறைகளை விரைவாகத் தீர்க்க ஒவ்வொரு மாவட்டத்திலும் மாவட்ட குறைதீர் அலுவலர் (DGRO) நியமிக்கப்படு வதற்கான ஏற்பாடுகள்செய்யப்பட்டுள்ளதுடன், தேசிய உணவுப் பாதுகாப்புச் சட்டத்தின் செயல்பாட்டைக் கண்காணிக்க மாநில உணவு ஆணையமும் அமைக்கப்பட்டுள்ளது.
மேலும், உணவுப் பாதுகாப்பை உறுதி செய்வதற்கும் திட்டத்தின் செயல்பாட்டை ஆழமாக மதிப்பிடுவதற்கும் 2025–26ஆம் ஆண்டில் பிரதமரின் கரீப் கல்யாண் அன்ன யோஜனா (PMGKAY)திட்டத்தின் ஒருங்கிணைந்த மதிப்பீட்டை ஒன்றிய அரசு மேற்கொண்டுள்ளதாகவும் தெரிவிக்கப்பட்டுள்ளது.