#Title

போதைப்பொருளைத் தடுக்காத த.வெ.க. ஆட்சியில் கோவை மாவட்டம், ‘கொலை மான்செஸ்டராக’ மாறிவருகிறது! கோவை தெற்கு மாவட்டச் செயலாளர் தளபதி முருகேசன் அறிக்கை!

கோவை, ஆக. 15–

போதைப்பொருளை தடுக்காத த.வெ.க. ஆட்சியில் தொழில் துறையில் தென்னிந்தியாவின் மான்செஸ்டர் என்று பெயர் பெற்ற கோவை மாவட்டம் கொலை மான்செஸ்டராக மாறிவருகிறது என்று கோவை தெற்கு மாவட்ட செயலாளர் தளபதி முருகேசன் அறிக்கை விடுத் துள்ளார்.

இதுகுறித்து அவரது அறிக்கை வருமாறு:-

தமிழ்நாட்டில் திராவிட முன்னேற்றக் கழக தலைவர் முத்துவேல் கருணாநிதி ஸ்டாலின் அவர்களின் தலைமையில் நடைபெற்ற திராவிட மாடல் ஆட்சியில் கல்லூரி மாணவர்களுக்கிடையே ஏற்பட்டு வரும் போதைப்பொருள் கலாச்சாரத்தை தடுப்பதற்காக மாணவர்கள் தங்கும் விடுதிகளில் அடிக்கடி சோதனை நடத்தி போதைப் பொருள் புழக்கத்தை தடுத்து கைது செய்து நடவடிக்கை எடுத்து வந்ததால் போதைப் பொருள் கலாச்சாரம் கட்டுக்குள் இருந்து வந்தது. அதன் பிறகு, தற்போது அமைந்துள்ள, த.வெ.க. கூட்டணி ஆட்சியில் போதைப் பொருள் ஒழிப்போம் என்று மராத்தான் ஓட்டம்,உறுதி மொழி எடுத்தல் போன்ற நிகழ்வுகள் சம்பிரதாயத்திற்காக நடத்திவிட்டு, போதைப் பொருள் ஒழிப்பில் அக்கறை செலுத்தாத, காரணத்தால், நகர பகுதிகளில் நடைபெற்று வந்த கஞ்சா விற்பனை, தற்போது கிராமங்கள் வரைக்கும் பரவி, இளைஞர்கள் முதல் கல்லூரி மாணவர்கள், பள்ளி மாணவர்கள் வரை அனைவரும்கஞ்சா உள்ளிட்ட போதை பொருட்களுக்கு அடிமையாகியுள்ளனர். அதனால் கோவை மாவட்ட பகுதியில் கொலைகள் சர்வ சாதாரணமாக நடைபெற்று வருகிறது.

கடந்த ஒரு மாதத்தில் மட்டும், கோவை தெற்கு மாவட்ட பகுதியில், கொடூரமான முறையில் 3 படுகொலைகள் நடந்துள்ளன.

கடந்த ஜூலை மாதம் 28 ஆம் தேதி கிணத்துக்கடவு காமராஜர் நகர் பகுதியில் ஒரு பெண்ணை குத்தி கொலை செய்து அவரது உடலை, தந்தை மகன் இருவரும் சேர்ந்து கோடங்கிபாளையம் சாலைக்கு எடுத்து சென்று ஒரு தோட்டத்தில் வைத்து எரித்தனர்.

அதேபோல் கடந்த வாரம் 6 ஆம் தேதியன்று கிணத்துக்கடவு சிக்கலாம் பாளையம் பகுதியில் கஞ்சா மற்றும் மது போதையில் 16 வயது சிறுவன் உள்பட இரண்டு பேர் சேர்ந்து அஷ்வின் என்கிற இளைஞரை கத்தியால் கழுத்தை அறுத்து சுத்தியால் அடித்து கொடூரமான முறையில் கொலை செய்து ரீல்ஸ் வெளியிட்டனர்.

கடந்த 2 நாட்களுக்கு முன்பு மலுமிச்சம்பட்டி பகுதியில் கல்லூரி மாணவர் ஒருவரை சக கல்லூரி சீனியர் மாணவர்கள் அடித்து கொலை செய்துள்ளனர். இந்த கொலைகள் அனைத்தும் கஞ்சா மற்றும் மது போதையில் நடந்துள்ளது. போதைப் பழக்கத்திற்கு அடிமையான மாணவர்கள், சினிமா பாணியில்சர்வ சாதாரணமாக கொலைசெய்து வருகின்றனர்.

இதற்கெல்லாம் காரணம், தற்போது நடைபெற்று வரும், த.வெ.க. கூட்டணி அரசுதான். அவர்கள், போதை பொருள் ஒழிப்பில் முழு கவனம் செலுத்தாததால் இளைஞர்கள் மற்றும் மாணவர்கள் போதைக்கு அடிமையாகி கொலைகாரர்களாக மாறி வருகின்றனர். இதனால் தொழில் துறையில் தென்னிந்தியாவின் மான்செஸ்டர் என்று பெயர் பெற்ற கோவை மாவட்டம், கொலை மான்செஸ்டராக மாறிவருவது மிகுந்த மன வேதனை அளிக்கிறது. எனவே தூக்கத்தில் இருக்கும் த.வெ.க.கூட்டணி அரசு இனிமேலாவது விழித்துக் கொண்டு இளைஞர்கள் மற்றும் மாணவர்களின் நலனில் அக்கறை கொண்டு போதைபொருள் ஒழிப்பில் தீவிரம்காட்ட வேண்டும் என்று தனதுஅறிக்கையில் தெரிவித்துள்ளார்.