தென்காசி, ஆக. 15–
தமிழ்நாடு ஊரக பகுதிகளில் கலைஞர் கனவு இல்லம் திட்டத்தில் வீடு கட்டும் பணி ஆணை பெற்று வீடுகள் கட்டிய சுமார் 1 லட்சம் பயனாளிகளுக்கு இன்னும் பணம் வழங்கப்படாத அவலம் தொடர்கிறது. இதனால் கந்து வட்டிக்கு பணம் வாங்கி நிதி நெருக்கடியில் தவிக்கும் பலரும் வீடுகளை விற்கும் நிலைக்கு தள்ளப்பட்டுள்ளனர்.
தமிழ்நாடு கிராமப்புறங்களில் வீடுகள் இல்லாத ஏழை மக்களுக்கு வீடு கட்டிக் கொடுக்கும் வகையில் கலைஞர் கனவு இல்லம் திட்டம் மூலம் ஆண்டுக்கு ஒரு லட்சம் கான்கிரீட் வீடுகள் கட்டிக் கொடுக்கும் திட்டத்தை கடந்த திமுக ஆட்சியில் அப்போதைய முதல்வர் மு.க.ஸ்டாலின் அவர்கள் ஊரக வளர்ச்சித் துறை மூலம் 2024 ஆம் ஆண்டு அறிமுகப்படுத்தினார். இதன் மூலம் 2030ஆம் ஆண்டிற்குள் குடிசைகள் இல்லாத தமிழ்நாடுத்தை உருவாக்குவதுடன், ஆண்டுக்கு ஒரு லட்சம் வீடுகளுக்கு குறையாமல் 6 ஆண்டுகளில் மொத்தம் 8 லட்சம் வீடுகள் கட்டுதற்காக திட்டமிடப்பட்டது.
இத்திட்டத்தின் கீழ் பயன்பெறுவதற்கு வறுமைக் கோட்டிற்கு கீழ் இருக்க வேண்டும். ஆனால் சொந்தமாக இடம் வைத்திருக்க வேண்டும். சொந்தமாக வேறு வீடுகள் இருக்கக் கூடாது. சொந்த வீடு இருந்து இடியும் நிலையில் இருந்தால் அவர்களும் இத்திட்டத்தில் பயன் பெறலாம். இலவச வீட்டு மனைப் பட்டா பெற்றவர்களும் இத்திட்டத்தின் கீழ் பயன் பெற தகுதியானவர்கள். கிராமப்புறங்களில் ஊராட்சி மூலம் விண்ணப்பம் சமர்ப்பிக்கப்பட்டு ஊராட்சி ஒன்றிய அதிகாரிகள் அடங்கிய குழுவினரால் ஆய்வு மேற்கொள்ளப்படும்.
தகுதியான பயனாளிகள் பட்டியல் மாவட்ட ஊரக வளர்ச்சி முகமையால் தயாரிக்கப்பட்டு கிராம சபைகளில் ஒப்புதல் பெறப்படும். பின்னர் அந்தந்த மாவட்ட கலெக்டர்கள் மூலம் இறுதி ஒப்புதல் வழங்கப்பட்டன. அவர்களுக்கு பணி ஆணை வழங்கப்பட்ட பிறகு வீடு கட்டும் பணிகளை துவக்கலாம். சமையலறை உட்பட குறைந்தது 360 சதுர அடியில் வீடு கட்ட வேண்டும். இதற்காக அஸ்திவாரம், மேற்கூரை மற்றும் பணிகள் முடிவு ஆகிய 3 நிலைகளில் பணம் பயனாளிகளுக்கு விடுவிக்கப்படும்.
அதிகபட்சமாக ஒரு பயனாளிக்கு மூன்று லட்சத்து 55 ஆயிரத்து 600 ரூபாய் வழங்கப்படும் இதில் 320 கிலோ கம்பி, 140 சிமென்ட் மூடைகள் ஆகியவை சலுகை விலையில் அரசே வழங்கி விடும். அதிகபட்ச தொகையில் 100 நாள் வேலை உறுதித்திட்டத்தில் பயன் அடையும் பயனாளிகள் தங்களுக்கான வீடு கட்டும் பணியில் ஈடுபட்ட போதும் 100 நாள் வேலை உறுதித்திட்ட சம்பளத்தை பெற்றுக் கொள்ள முடியும்.
இந்தத் திட்டம் 2024 – 25, 2025 – 26 என கடந்த 2 ஆண்டுகள் எந்த பிரச்னையும் இன்றி செயல்படுத்தப்பட்டது. இதன் மூலம் 2 லட்சம் வீடுகள் கட்டி வழங்கப்பட்டன. கடந்த பிப்ரவரி மாதம் வரை இத்திட்டம் சிறப்பாக செயல்பட்டு வந்த நிலையில், இந்த நிதியாண்டிற்காக தேர்வு செய்யப்பட்டவர்களுக்கு கடந்த 6 மாதங்களாக அதாவது சட்டப்பேரவைத் தேர்தலுக்கு பின்னர் இன்று வரை பணம் வழங்கப்படாமல் நிறுத்தி வைக்கப்பட்டுள்ளது.
பொதுவாக வறுமைக் கோட்டுக்கு கீழ் உள்ளவர்களுக்கு மட்டுமே இத்திட்டத்தின் கீழ் நிதி வழங்கப்படுகிறது. பொருளாதார வசதி இல்லாத நெருக்கடி மிகுந்த குடும்பங்களே இதில் பயன் பெறுகின்றனர். தற்போது பணம் வழங்கப்படாத காரணத்தால் பாதிவரை கட்டப்பட்ட கட்டிடப் பணிகளை தொடரவும் முடியாமல் ஏற்கனவே கட்டுமானப் பணிக்கு வாங்கிய பொருட்கள், கூலி உள்ளிட்டவற்றை கொடுக்கவும் முடியாமல் அவர்கள் திண்டாடி வருகின்றனர். மாநிலம் முழுவதும் இதே நிலை தான் நீடிக்கிறது.
2026–27ம் ஆண்டுக்கான பயனாளிகள் சட்டமன்ற தேர்தல் பணிகளை கருத்தில் கொண்டு ஜனவரி, பிப்ரவரி மாதங்களிலேயே தேர்வு செய்யப்பட்டு பணி ஆணை வழங்கப்பட்டது. இவ்வாறாக வீடு ஒதுக்கீட்டு ஆணை பெற்ற சுமார் 1 லட்சத்திற்கும் மேற்பட்ட பயனாளிகள் இதனால் பாதிக்கப்பட்டுள்ளனர். பணம் எப்போது வரும் என்று கேட்டு நாள்தோறும் ஊரக உள்ளாட்சி அமைப்புகளை நோக்கி பயனாளிகள் படையெடுத்து வருகின்றனர்.
அவர்களுக்கு பதில் சொல்வதே உள்ளாட்சி அலுவலர்களுக்கு மிகப்பெரும் பணியாக உள்ளது. பணம் பட்டுவாடா ஆகாத
காரணத்தால் இத்திட்டத்தின் மீதான நம்பிக்கை குறித்த மிகப்பெரும் கேள்விக்குறியை பயனாளிகள் மத்தியில் ஏற்படுத்தி உள்ளது. வட்டிக்கு வாங்கிய பலரும் வட்டி கட்ட முடியாத நிலையில் பகுதியாகக் கட்டப்பட்ட வீடுகளை விலை பேசி வருகின்றனர். பல இடங்களில் கந்து வட்டிக்கு பணம் வாங்கி அவர்களிடமே வீடுகளை இழக்கும் நிலையும் உள்ளது.
பெயர் மட்டுமே ‘மாற்றம்’
தமிழ்நாட்டில் முன்னாள் முதல்வர் கலைஞரால் தான் முதன் முதலில் தமிழ்நாட்டில் வீடு கட்டும் திட்டம் 2010ம் ஆண்டு அறிமுகப்படுத்தப்பட்டது. அப்போது இந்த திட்டத்திற்கு கலைஞர் வீடு வழங்கும் திட்டம் என்று பெயர் சூட்டப்பட்டது சுருக்கமாக கேவிவிபி என்றுஅழைக்கப்பட்டது. பின்னர் அது ஜெயலலிதா ஆட்சி காலத்தில் முதலமைச்சரின் பசுமை வீடு திட்டம் என்று பெயர் மாற்றம் செய்யப்பட்டது.
பின்னர், மு.க.ஸ்டாலின் முதல்வராக பதவியேற்ற பின்னர் கலைஞரின் கனவு இல்லம் என்று பெயர் மாற்றம் செய்து ஆண்டுக்கு ஒரு லட்சம் வீடுகள் கட்டிக் கொடுக்கப்படும் என அறிவித்து அரசு ஆணை வெளியிட்டு அதற்கான நிதியையும் உரிய நேரத்தில் ஒதுக்கீடு செய்தார். 2 ஆண்டுகள் வெற்றிகரமாக செயல்படுத்தப்பட்ட இத்திட்டம் தற்போது வெற்றி வீடு கட்டும் திட்டம் என்று அரசால் பெயர் மாற்றம் செய்துள்ளது. அதே நேரத்தில் திட்டத்தின் பயன் மக்களுக்கு கிடைக்காத நிலை உள்ளது.
பயனாளிகள் எண்ணிக்கை குறைப்பு
முந்தைய திமுக ஆட்சியில் ஒவ்வொரு ஆண்டும் குறைந்தது ஒரு லட்சம் பயனாளிகளை தேர்வு செய்து அவர்களுக்கு வீடு கட்ட நிதி வழங்கப்பட்டு வந்தது தற்போதைய பட்ஜெட்டில் இத்திட்டத்தின் பெயரை மாற்றியவுடன் ஒரு லட்சம் பயனாளிகள் என்பதை 70 ஆயிரமாக குறைத்துள்ளனர். அதாவது 30 ஆயிரம் பயனாளிகளை குறைத்துள்ளனர். அதே சமயம் வழங்கப்படும் தொகையை அதிகபட்சம் ரூ.5 லட்சமாக உயர்த்தி உள்ளனர்.
மேலும் இத்திட்டத்தின் வழிமுறைகள் குறித்து விரிவான கையேடு வெளியிடப்படவில்லை. இதனால் அதிகாரிகள் இத்திட்டம் குறித்து பயனாளிகளுக்கு எந்தவித கருத்தும் தெரிவிக்க முடியாத நிலை உள்ளது. அத்துடன் ஏற்கனவே தெரிவு செய்யப்பட்ட பயனாளிகளுக்கு நிதி விடுவிப்பு குறித்த தெளிவும் இன்னும் வழங்கப்படவில்லை. இதனால் இத்திட்டம் கடந்த சில மாதங்களாக முடங்கிய நிலையில் உள்ளது என்று அதிகாரிகள் தெரிவிக்கின்றனர்.