தி
ராவிட நாயகர் -– கழகத் தலைவர் மு.க.ஸ்டாலின் அவர்கள் தலைமையில் நடந்த ஐந்தாண்டு கால திராவிட மாடல் ஆட்சி என்பது பல்வேறு துறைகளிலும் தமிழ்நாட்டில் ஒரு புதிய அளவுகோலை (பெஞ்ச்மார்க்) வகுத்தளித்துள்ளது. ஒருங்கிணைந்த- – பரவலாக்கப்பட்ட- – அனைவருக்கும் அனைத்தும் என்ற இலட்சியத்துடன் திராவிட முன்னேற்றக் கழக அரசு போட்டுள்ள பாதையை எவரும் மீற முடியாது என்பதை, தட்டுத் தடுமாறும் த.வெ.க. அரசின் போலி விளம்பரங்கள் மெய்ப்பிக்கின்றன.
நடிகர் விஜய் தலைமையிலான த.வெ.க. ஆட்சிக்கு வந்து 100 நாட்கள் நிறைவடை
கின்றன. இனியும் தேனிலவுக் காலம் என்று சொல்லி மக்களை ஏமாற்ற முடியாது. தேனிலவு- – பால்நிலவு எல்லாம் அகமும் புறமுமாக முடிந்துவிட்டது. அதை விஜய் தரப்பினரும் உணர்ந்திருப்பதால்தான், ஆட்சிக்கு வந்து என்னச் செய்தீர்கள் என்ற மக்களின் கேள்விக்கு நேரடியாகப் பதில் அளிக்க முடியாமல் திராவிட மாடல் ஆட்சியின் திட்டங்கள் மீது ஸ்டிக்கர் ஒட்டும் வேலையைத் தொடர்ந்து செய்து கொண்டிருக்கிறார்கள்.
100 நாள்களில் 1 இலட்சம் கோடி தொழில் முதலீடு என்பதுதான் அவர்களின் லேட்டஸ்ட் ஸ்டிக்கர். 2021- –26 திராவிட மாடல் ஆட்சியில் 12இலட்சத்து 54ஆயிரம் கோடி ரூபாய் மதிப்புள்ள 1190 புரிந்துணர்வு ஒப்பந்தங்கள் போடப்பட்டு, அதன் மூலமாக 36இலட்சத்து 6 ஆயிரம் வேலைவாய்ப்புகள் உருவாக்கப்பட்டன. புரிந்துணர்வு ஒப்பந்தங்களில் 60%க்கு மேல் செயல்பாட்டுக்கு வந்தன. 2024ஆம் ஆண்டு நடைபெற்ற உலக முதலீட்டாளர் மாநாட்டில் ஒப்பந்தம் போட்ட வியட்நாம் நாட்டின் புகழ்பெற்ற வின்ஃபாஸ்ட் நிறுவனம் ஒன்றரை ஆண்டுக்குள்ளாகத் தூத்துக்குடி மாவட்டத்தில் தனது உற்பத்தியைத் தொடங்கியதுடன், அதே மாவட்டத்தைச் சேர்ந்த 200 பேருக்கு வேலைவாய்ப்பையும் அளித்தது. இத்தகைய சாதனை முயற்சிகளை வெற்றிகரமாக நிறைவேற்றி யதுதான் திராவிட மாடல் அரசு.
உலகின் முன்னணி நிறுவனங்கள் பலவும் திராவிட மாடல் ஆட்சியில் தமிழ்நாட்டில்
முதலீடு செய்வதற்கு ஆர்வம் காட்டின. தி.மு.க.வின் 5 ஆண்டுகால ஆட்சியில் முதலீடுகளை ஈர்ப்பதில் இந்தியாவில் 3வது இடத்தில் இருந்த தமிழ்நாடு, த.வெ.க ஆட்சி அமைந்தபிறகு 16வது இடத்திற்குப் பின்தங்கிவிட்டது. நிர்வாகத் திறனற்ற முதலமைச்சர் மற்றும் அமைச்சர்களின் கேலிக்கூத்தான செயல்பாடுகள், ரீல்ஸ்கள், மோசமான அணுகுமுறைகள் – இவைதான் இந்த வீழ்ச்சிக்குக் காரணமாகும்
. இதனை மறைப்பதற்காக திடுதிப்பென ஒரு முதலீட்டாளர் மாநாட்டை, ஆகஸ்ட் 13 அன்று ஏற்பாடு செய்து, அதில் 1 இலட்சம் கோடி முதலீடுகளை ஈர்த்ததாக விஜய் அரசு விளம்பரத் தம்பட்டம் அடித்தது.
உண்மையில், த.வெ.க ஆட்சியால் ஈர்க்கப்பட்ட முதலீடுகள் என்பவை வெறும் 30% கூட இல்லை. போடப்பட்ட புரிந்துணர்வு ஒப்பந்தங்கள் முதலீடாக மாறுமா என்பதற்கும் உத்தரவாதமில்லை. 70% முதலீடுகள் கடந்த திராவிட மாடல் ஆட்சியில் போடப்பட்ட வலுவான புரிந்துணர்வு ஒப்பந்தங்கள் வழியே ஈர்க்கப்பட்டவைதான் என்பதை ஆதாரத்துடன் அம்பலப்படுத்தியிருக்கிறார், கழக ஆட்சியில் தொழில்துறை அமைச்சராக இருந்த அன்புச் சகோதரர் முனைவர் டி.ஆர்.பி. ராஜா.
மிகத் தெளிவான புள்ளிவிவரங்கள் வெளிப்பட்டுள்ளன. இதன் மூலம், திராவிட மாடல் ஆட்சியில் போடப்பட்ட பாதையில்தான் தொழில்துறை முதலீடுகளை த.வெ.க. அரசு ஈர்க்கிறது என்பது வெட்ட வெளிச்சமாகிவிட்டது.
தி.மு.க. ஆட்சி மீது பழிசுமத்தி பெயர் வாங்கலாம் என்றுதான் த.வெ.க அரசு திட்டமிட்டது. அதைச் செயல்படுத்த, அறநிலையத்துறையைப் பயன்படுத்த நினைத்தது. கோயில் சொத்துகள் கோயிலுக்கு மட்டுமே பயன்படுத்தப்பட வேண்டும் என்று த.வெ.க. வின் அறநிலையத்துறை அமைச்சரான 100 கோடி பழனி கோயில் நில ஊழல் புகழ்
‘முறுக்கு’ ரமேஷ்
தெரிவித்தார். அதாவது, திராவிட மாடல் ஆட்சியில் அறநிலையத்துறை சார்பில் அரசு கலை-அறிவியல் கல்லூரிகள் தொடங்கப்பட்டதற்கு எதிர்ப்புத் தெரிவிக்கும் வகையில் த.வெ.க அமைச்சரின் கருத்து வெளிப்பட்டது.
அறநிலையத்துறை சார்பில் கல்லூரிகள் தொடங்குவது என்பதுஇப்போது த.வெ.க கூட்டணி அமைச்சரவையில் பங்கேற்றுள்ள காங்கிரஸ், தமிழ்நாட்டில் ஆட்சி செய்த காலத்திலிருந்தே நடைமுறையில்
உள்ளது. குற்றாலம் பராசக்தி மகளிர் கல்லூரி, பழனியாண்டவர் கலைக் கல்லூரி ஆகியவை பக்தவத்சலம் முதலமைச்சராக இருந்தபோது தொடங்கப்பட்டவை. அ.தி.மு.க ஆட்சிக்காலத்திலும் அறநிலையத்துறை சார்பில் கல்லூரிகள் தொடங்கப்பட்டன. ஏற்கனவே தொடங்கப்பட்ட கல்லூரிகள் விரிவாக்கம் செய்யப்பட்டன. எனினும், பா.ஜ.க. பாணியில், அதன் ‘பி டீமான’ த.வெ.க. அரசு திராவிட மாடல் ஆட்சியை மட்டுமே குறிவைத்துப் பழி சுமத்தியது. அறநிலையத்துறை சார்பில் திட்டமிடப்பட்டிருந்த கல்லூரிகளுக்கு எதிராகச் செயல்பட்டது.
இந்நிலையில்,
அறநிலையத்துறை சார்பில் கல்லூரிகள் தொடங்கப்படுவதை எதிர்த்து சென்னை உயர்நீதிமன்றத்தில் தொடரப்பட்ட வழக்கை விசாரித்த, நீதிபதிகள் ஜெயச்சந்திரன்-மனோகரன் அடங்கிய அமர்வு, “கோயில் நிதியைக் கல்விக்காகப் பயன்படுத்தலாம்” என உத்தரவிட்டது. திராவிட இயக்கத்தின் முதல் அரசியல் அமைப்பான நீதிக்கட்சி ஆட்சியில் கொண்டு வரப்பட்ட திருக்கோயில்கள் தொடர்பான அறநிலையச் சட்டத்தின் நோக்கத்தைஉயர்நீதிமன்றம் உறுதி செய்துள்ளது. இதன் மூலம், திராவிட மாடல் பயணிக்கும் பாதை சரியானது என்பதை த.வெ.க அரசுக்கு குட்டு வைத்து உணர்த்தியுள்ளது நீதிமன்றம்.
மாணவர்களின் மருத்துவக் கனவைச் சிதைக்கின்ற நீட் தேர்வைத் தொடக்கம் முதலே எதிர்த்து வருகின்ற இயக்கம், திராவிட முன்னேற்றக் கழகம். நேரடிக் களத்திலும், சட்டப் போராட்டங்கள் வழியாகவும் ‘நீட்’ எதிர்ப்பு நடவடிக்கைகளைத் தி.மு.க தொடர்ந்து மேற்கொண்டு வருகிறது. ஆட்சி செய்யும் வாய்ப்பை கழகத் தலைவர் மு.க.ஸ்டாலின் அவர்களுக்குத் தமிழ்நாட்டு மக்கள் வழங்கியபோது, சட்டமன்றத்தில் அனைத்துக் கட்சிகளின் ஆதரவுடன், நீட் தேர்விலிருந்து தமிழ்நாட்டிற்கு விலக்குக் கோரும் சட்ட முன்வரைவை நிறைவேற்றி, ஆளுநருக்கு அனுப்பி வைத்தார். ஆனாலும், ஒன்றிய வஞ்சக பா.ஜ.க. அரசு தமிழ்நாட்டு மக்கள் பிரதிநிதிகளின் ஒட்டுமொத்த உணர்வைப் புறக்கணித்து, தமிழ் மாணவர்களுக்குப் பெரும் துரோகத்தை இழைத்தது.
இந்தத் துரோகத்தைக் கண்டித்து தி.மு.க. பல போராட்டங்களை நடத்தியது.
துணை முதலமைச்சர் பொறுப்பை வகித்த கழகத்தின் இளம்தலைவர் உதயநிதி ஸ்டாலின் அவர்கள், தன் பதவிப் பற்றித் துளியும் கவலைப்படாமல் உண்ணாவிரதப் போராட்டத்தில் பங்கேற்று, ஆளுநரின் மக்கள் விரோதச் செயலைக் கண்டித்து உரையாற்றினார். இதுதான் திராவிட முன்னேற்றக் கழகம்.
தி.மு.க.வின் தாய்க்கழகமான திராவிடர் கழகம், நீட் தேர்வைத் தொடர்ந்து எதிர்த்துப் பரப்புரை செய்து வருகிறது. திராவிடர் கழகத் தலைவர் ஆசிரியர் அய்யா கி.வீரமணி அவர்கள் ‘திராவிட மாடல்’ ஆட்சியில் தமிழ்நாடு தழுவிய நீட் எதிர்ப்புப் பரப்புரைப் பயணத்தை மேற்கொண்டு, மக்களிடம் விழிப்புணர்
வூட்டினார். அந்தப் பயணத்தின் நிறைவு நிகழ்வில் தமிழ்நாட்டின் முதலமைச்சராக இருந்த முத்துவேல் கருணாநிதி ஸ்டாலின் அவர்கள் பங்கேற்று, தந்தை பெரியாரைப் போல வயது பற்றிக் கவலைப்படாமல் பொதுத் தொண்டாற்றி வரும் ஆசிரியன் அரும்பணியை வாழ்த்தினார்.
தந்தை பெரியாரை தனது கொள்கைத் தலைவர் என்று லேபிள் ஒட்டியிருக்கும்
த.வெ.க.வின் ஆட்சியில், நீட் தேர்வுக்கு
எதிராக தமிழ்நாடு தழுவிய அளவில் திராவிடர் கழகம் மேற்கொள்ளவிருந்த வாகனப் பரப்புரைக்கு, விஜய் அரசு கடைசி நேரத்தில் தடை போட்டதுடன், கொள்கைத் தலைவராக பெரியார் பெயரிலான திடலில் போலீஸ் படையைக் குவித்து, தன்னைப் ‘பா.ஜ.க.வின் பி டீம்’ என்று நிரூபித்திருக்கிறது.
தடைக்கு எதிராக திராவிடர் கழகத்தின் சார்பில் அதன் துணைத்தலைவர் கவிஞர் கலி.பூங்குன்றன் அவர்கள் சார்பில் சென்னை உயர்நீதிமன்றத்தில் தொடரப்பட்ட வழக்கை விசாரித்த
நீதிபதி லட்சுமிநாராயணன் அவர்கள், “கருத்துரிமை, பேச்சுரிமை போல போராடுவதும் அடிப்படை உரிமை. நீட் தேர்வுக்கு எதிராக இருசக்கர வாகனப் பேரணியை முடக்குவது ஏன்? ஹெலிகாப்டரில் சென்று போராட முடியுமா?” என்று கேட்டதுடன், காவல்துறை உரிய பதிலளிக்க உத்தரவிட்டுள்ளார்.
நீட் தேர்வு எதிர்ப்பு என்பது தமிழ்நாட்டின் ஒட்டுமொத்த உணர்வு. நீட் தேர்வை ஆதரிப்பது பா.ஜ.க-.ஆர்.எஸ்.எஸ். மற்றும் அதன் சங்கிக் கூட்டமே. அந்தக் கூட்டத்தில் ஒருவர்தான் என்று த.வெ.க தன்னை அடையாளப்படுத்தியுள்ளது. ஆர்.எஸ்.எஸ். பின்னணி கொண்ட நிர்மல்குமார், அருண்ராஜ் போன்றவர்கள் த.வெ.க.வில் சேர்ந்ததும், அவர்கள் அமைச்சர்களாகியிருப்பதும் எதேச்சையானது அல்ல. இது திட்டமிட்டு மேற்கொள்ளப்படும் செயல்முறையாகும்.
பெரியார், அண்ணா என்று த.வெ.க.வினர் உதட்டளவில் பேசினாலும் அவர்கள் ஆர்.எஸ்.எஸ்.பா.ஜ.க. செயல்திட்டங்களை நிறைவேற்று வதற்காகப் போட்டிருக்கும் வேடம்தான் அது என்பது அறநிலையத்துறை சார்பில் கட்டப்படும் கல்லூரிகளுக்கு எதிரான நிலைப்பாடும், நீட் தேர்வை எதிர்க்கும் திராவிடர் கழகத்தின் பரப்புரை மற்றும் இளம் தலைமுறையின் போராட்டம் ஆகியவற்றை போலீஸ் படையைக் கொண்டு முடக்கும் நடவடிக்கைகள் மூலமாகவும் வெட்ட வெளிச்சமாகிவிட்டது.
ஆர்.எஸ்.,எஸ்-பா.ஜ.க. நோக்கங்களை நிறைவேற்றும் பசுத்தோல் போர்த்திய புலிதான் விஜய்
நடத்தும் த.வெ.க. எனும் நாடகக் கம்பெனி. அந்தப் புலிக்குப் பல்லும் பிடுங்கப்பட்டு விட்டது. நகமும்
வெட்டப்பட்டுவிட்டது.