#Title

தமிழ்நாட்டில் பாரத்மாலா திட்டத்தின் கீழ் ரூ.13,651.6 கோடி மதிப்பில் 12 தேசிய நெடுஞ்சாலைத் திட்டங்கள்! மக்களவையில் - காஞ்சிபுரம் க.செல்வம் கேள்விக்கு ஒன்றிய அமைச்சர் பதில்!

புதுடெல்லி,ஆக.15–

தமிழ்நாட்டில் சாலை உள்கட்டமைப்பை மேம்படுத்தும் வகையில், கடந்த 5 ஆண்டுகளில் பாரத்மாலா பரியோஜனா திட்டத்தின் கீழ் 12 தேசிய நெடுஞ்சாலைத் திட்டங்களுக்கு ரூ.13,651.6 கோடி மதிப்பில் ஒப்புதல் வழங்கப்பட்டுள்ளதாக ஒன்றிய சாலைப் போக்குவரத்து மற்றும் நெடுஞ்சாலைத் துறை அமைச்சர் நிதின் ஜெய்ராம் கட்கரி தெரிவித்துள்ளார்.

காஞ்சிபுரம் நாடாளுமன்ற உறுப்பினர் க. செல்வம், மக்களவையில் எழுப்பிய கேள்விக்கு அளித்த பதிலில் இந்தத் தகவல் தெரிவிக்கப்பட்டுள்ளது.

காஞ்சிபுரம் மாவட்டத்திற்கு முக்கியத் திட்டங்கள்:

மதுரவாயல் – ஸ்ரீபெரும்புதூர் தேசிய நெடுஞ்சாலைப் பகுதி 6 வழிச்சாலையாக விரிவாக்கம் – 23.2 கி.மீ., Rs.463.1 கோடி. இத்திட்டம் 27.12.2024 அன்று முழுமையாக நிறைவு பெற்றுள்ளது.

பெங்களூரு–சென்னை விரைவுச்சாலையை மதுரவாயல்–வாலாஜாபாத் தேசிய நெடுஞ்சாலையுடன் ஸ்ரீபெரும்புதூர் அருகே இணைக்கும் டிரம்பெட் இன்டர்சேஞ்ச் – 1.1 கி.மீ., Rs.162.6 கோடி. இத்திட்டம் தற்போது 38.52% பணிகள் நிறைவடைந்த நிலையில், 31.10.2026க்குள் முடிக்க திட்ட மிடப்பட்டுள்ளது.

தமிழகத்தின் சாலை இணைப்புக்கு புதிய முன்னேற்றம்

தமிழ்நாட்டில் தேசிய நெடுஞ்சாலைகள் மேம்படுத்தப்பட்டதன் மூலம் பயண நேரம் குறைதல், போக்குவரத்து நெரிசல் குறைதல், சரக்கு மற்றும் பயணிகள் போக்குவரத்து மேம்பாடு ஆகிய பலன்கள் ஏற்பட்டுள்ளதாக ஒன்றிய அரசு தெரிவித்துள்ளது.

மேலும், ஸ்ரீபெரும்புதூர், காஞ்சிபுரம், கும்மிடிப்பூண்டி, வேலூர், ராணிப்பேட்டை, ஆம்பூர், ஓசூர், திருப்பூர், கோயம்புத்தூர், மகேந்திரா வேர்ல்ட் சிட்டி, நாங்குநேரி, கடலூர் உள்ளிட்ட முக்கிய தொழில் மையங்கள் தேசிய நெடுஞ்சாலை வலையமைப்புடன் இணைக்கப்பட்டுள்ளன. இதன் மூலம் சரக்குப் போக்குவரத்து தடையின்றி நடைபெறுவதற்கு வழிவகுக்கிறது.

நெடுஞ்சாலைத் திட்டங்களை விரைந்து செயல்படுத்துவதற்காக நிலம் கையகப்படுத்துதல், சுற்றுச்சூழல் மற்றும் வனத்துறை அனுமதிகள், பயன்பாட்டு சேவைகளை மாற்றுதல் உள்ளிட்ட பணிகளை விரைவுபடுத்துவதுடன், ரயில்வே மேம்பாலம் மற்றும் கீழ்ப்பாலங்களுக்கான வரைபட அனுமதிகளை இணையவழியில் வழங்குதல் மற்றும் பல்வேறு நிலைகளில் ஆய்வுக் கூட்டங்கள் நடத்துதல் போன்ற நடவடிக்கைகள் மேற்கொள்ளப்பட்டு வருவதாக ஒன்றிய அரசு தெரிவித்துள்ளது.

காஞ்சிபுரம் நாடாளுமன்ற உறுப்பினர் க. செல்வம் தொடர்ந்து வலியுறுத்தி வரும் சாலை மற்றும் போக்குவரத்து உள்கட்டமைப்பு மேம்பாட்டிற்கு இந்த அறிவிப்பு முக்கியத்துவம் வாய்ந்ததாக அமைந்துள்ளது.