திருவள்ளூர், ஆக.14;–
திருவள்ளூர் நகரில் த.வெ.க. நிர்வாகிகள் சார்பில் வைக்கப்பட்டுள்ள பேனர்கள் பல நாட்களாக அகற்றப்படாமல் தொடர்ந்து காட்சியளிப்பதாகவும், இதனால் பொதுமக்களுக்கும், வாகன ஓட்டிகளுக்கும் கடும் இடையூறு ஏற்படுவதாகவும் புகார் எழுந்துள்ளது. பேனர் கலாச்சாரத்தை கட்டுப்படுத்த வேண்டிய அதிகாரிகள் இதனை கண்டுகொள்ளாமல் இருப்பதாகவும் சமூக ஆர்வலர்கள் குற்றம்சாட்டியுள்ளனர்.
திருவள்ளூர் நகரின் பேருந்து நிறுத்தங்கள், பள்ளிகள், அரசு அலுவலகங்கள் மற்றும் பொதுமக்கள் அதிகம் கூடும் பகுதிகளின் அருகே பெரிய அளவிலான பேனர்கள் வைக்கப்பட்டுள்ளதாக கூறப்படுகிறது. நடைபாதைகளை ஆக்கிரமிக்கும் வகையில் பேனர்கள் அமைக்கப்படுவதால் பொதுமக்கள் சாலையில் இறங்கி நடக்க வேண்டிய நிலை ஏற்படுவதாகவும், இதனால் விபத்து ஏற்படும் அபாயம் இருப்பதாகவும் பொதுமக்கள் தெரிவிக்கின்றனர்.
த.வெ.கநிர்வாகிகள்பிறந்தநாள் விழாக்கள், கட்சி நிகழ்ச்சிகள் மற்றும் புதிய நிர்வாகிகள் நியமனத்தை வாழ்த்தி வைக்கப்படும் பேனர்கள், நிகழ்ச்சிகள் முடிந்த பிறகும் உடனடியாக அகற்றப்படுவதில்லை என்றும், சில பகுதிகளில் 10 முதல் 15 நாட்களுக்கும் மேலாக பேனர்கள் தொடர்ந்து இருப்பதாகவும் புகார் கூறப்படுகிறது. நிகழ்ச்சி முடிந்ததும் பேனர்களை சம்பந்தப்பட்டவர்களே அகற்ற வேண்டும் என்ற நடைமுறை இருந்தும், அதனை பின்பற்றாதது ஏன் என சமூக ஆர்வலர்கள் கேள்வி எழுப்புகின்றனர்.
சாலையோரங்களிலும், கடைகளின் முன்புறங்களிலும் வைக்கப்படும் பிரம்மாண்ட பேனர்களால் வணிக நிறுவனங்களின் பெயர்ப்பலகைகள் மறைக்கப்படுவதாக வியாபாரிகள் அதிருப்தி தெரிவித்துள்ளனர். இதனால் தங்களது கடைகளை வாடிக்கையாளர்கள் எளிதில் அடையாளம் காண முடியாத நிலை ஏற்பட்டு, வியாபாரமும் பாதிக்கப்படுவதாக அவர்கள் கூறுகின்றனர்.
பேனர்களை அகற்றுமாறு சம்பந்தப்பட்டவர்களிடம் கேட்டாலும், அரசியல் செல்வாக்கை சுட்டிக்காட்டி அலட்சியமாக பதில் அளிப்பதாக சில வியாபாரிகள் புகார் தெரிவிக்கின்றனர். இதனால் பொதுமக்களும், வணிகர்களும் அதிகாரிகளிடம் புகார் அளிக்க தயக்கம் காட்டுவதாக கூறப்படுகிறது.
திருவள்ளூர் பகுதியில் மழை மற்றும் பலத்த காற்று வீசும் நேரங்களில் முறையாக அமைக்கப்படாத உயரமான பேனர்கள் சாய்ந்து விழும் அபாயம் . பொதுமக்கள் அதிகம் கூடும் இடங்களில் இதுபோன்ற பேனர்கள் அமைக்கப்படுவது பாதுகாப்பு கேள்வியையும் எழுப்பியுள்ளது.
நகராட்சி நிர்வாகம் வேடிக்கை பார்க்கிறதா?
பொதுமக்கள் நடமாட்டம் அதிகம் உள்ள பகுதிகளில் பேனர்கள் தொடர்ந்து காணப்படும் நிலையில், அவற்றை அகற்ற நகராட்சி நிர்வாகம் நடவடிக்கை எடுக்காதது ஏன் என்ற கேள்வியும் எழுந்துள்ளது. பேனர்களுக்கு முறையான அனுமதி பெறப்பட்டுள்ளதா? பாதுகாப்பு விதிமுறைகள் பின்பற்றப்பட்டுள்ளனவா? நிகழ்ச்சி முடிந்தும் பேனர்கள் அகற்றப்படாமல் இருப்பது ஏன்? விதிமீறல்கள் இருந்தால் நடவடிக்கை எடுக்காதது ஏன்? என பல்வேறு கேள்விகளை சமூக ஆர்வலர்கள் முன்வைத்துள்ளனர்.
பொதுமக்கள் சாலையோரம் அல்லது நடைபாதையில் சிறிய அளவிலான விளம்பரங்களை வைத்தால்கூட உடனடியாக நடவடிக்கை எடுக்கப்படும் நிலையில், ஆளுங்கட்சியினரின் பெரிய அளவிலான பேனர்கள் பல நாட்கள் அகற்றப்படாமல் இருப்பது ஏன்? “ஆளுங்கட்சியினருக்கு ஒரு சட்டம்… பொதுமக்களுக்கு ஒரு சட்டமா?” என்ற கேள்வி தற்போது திருவள்ளூர் நகரில் எழுந்துள்ளதாக சமூக ஆர்வலர்கள் தெரிவித்துள்ளனர்.