மன்னன் கோமாளியானால் நாடு சர்க்கஸ் கூடாரமாய் ஆகிவிடும் என்பது வெளிநாட்டு மொழி. சர்க்கஸில் ஒரு கோமாளி இருக்கலாம் இரண்டு மூன்று கோமாளிகள் கூட இருக்கலாம். அமைச்சரவையே கோமாளிகூட்டம் என்றால் நாடு தாங்கிடுமா? தாம்பூலத்தில் வெற்றிலைபாக்குடன் சுண்ணாம்பு இருக்கலாம், ஆனால் தாம்பூலம் முழுவதும் சுண்ணாம்பு என்றால் வாய் என்னாகும்?

நிதி அமைச்சர் தாமிரபரணி என்பதற்குப் பதில் தாம்பரம் பரணி என்கிறார். ஐந்தாயிரத்து மூவாயிரத்து முப்பத்தி ஒன்று என்கிறார். அடுத்து நாற்பதாயிரத்து நாற்பத்தி பனிரெண்டு என்கிறார். என் மதம் கற்றுத்தந்த அன்புமொழியைத் தமிழ் மொழியும் கற்றுத் தராது என்கிறார். உறவினர்களையே கம்பெடுத்து அடிப்பதுதான் இவர் கற்ற மொழியா?

சி.எஸ், டாக்டர் நாவலர், நாஞ்சிலார், பேராசிரியர், பி.டி.ஆர், தங்கம் தென்னரசு என உயர்ந்தவர்கள் அமர்ந்த இருக்கை இன்று கேவலப்படுகிறது.

மற்றொரு அமைச்சர் புஸ்ஸி ஆனந்த் “நான் அவன் இல்லை” படத்தில் கதாநாயகனின் தாய்மொழி எந்த மொழி என்பதற்குப் பெரிய ஆராய்ச்சி நடப்பதுபோல், புஸ்ஸி ஆனந்த் பேசும் மொழி எந்த மொழி என பெரிய ஆராய்ச்சியே நடத்தலாம்.

ஒருவர் திருட்டு லாட்டரி, ஒருவர் கள்ள டிக்கெட் விற்றவர், ஒரு சட்டமன்ற மகளிர் உறுப்பினர், எனது மன்மத நன்றியை தெரிவித்துக் கொள்கிறேன் என பலமுறை கூறுகிறார். இவர் சட்டமன்றத்தை இந்திரலோகம் என நினைத்துக்கொண்டு பேசுகிறாரா தெரியவில்லை.

ஒரு பெண் அமைச்சர் “என்னைக் கேட்காமல் என் தொகுதிக்குள் வந்தால் காலைவெட்டி விடுவேன், ஆளைத் தொலைச்சிடுவேன்” என்கிறார்.

ஒரு அமைச்சர் “பிளம்பருக்கு படியுங்கள்” என குலக்கல்வி திட்டத்தை அளிக்கிறார்.

ஒரு அமைச்சரிடம் “தூத்துக்குடி விமான நிலைய விரிவாக்கம் உண்டா?” என நிருபர்கள் கேட்டால், “நான் திருச்செந்தூரில் அல்லவா நிற்கிறேன்” என அல்வா கொடுக்கிறார்.

ஒரு அமைச்சர் பெண் குழந்தையின் கால்களைத் தடவி அசிங்கப்பட்டு நிற்கிறார்.

ஒரு அமைச்சர் கோவில் வளாகத்திற்குள் மாத்திரையை இடித்து பவுடர் ஆக்கிச் சாப்பிடுகிறார்.

ஒரு அமைச்சர் கோவிலின் உட்பகுதியில் செருப்புப் போட்டு நடக்கிறார்.

ஒருவர் 26.05.20,26 என்கிறார்.

ஒருவர் ரீல்ஸ் போட கேமராவுடன் பள்ளிக்குச் சென்று மாணவிகளைத் தாறுமாறான கேள்விகள் கேட்டு அவமானப்படுத்துகிறார்.

வேளாண்மை பட்ஜெட்டுடன் ஒரு அமைச்சர் திருப்பதி சென்று வழிபட்டு வருகிறார்.

ஒரு அமைச்சர் பட்ஜெட்டுடன் ஜெபமாலையைக் கொண்டுவந்து உருட்டி வணங்கிவிட்டு பட்ஜெட்டை படிக்கிறார்.

நாளை ஒன்றிய நிதி அமைச்சர் நிர்மலா சீதாராமன், பட்ஜெட்டை அயோத்தி ராமர் கோவிலில் வைத்து வணங்கிவிட்டுத்தான் வெளிவரும் என்றால் மார்க்சிஸ்ட், வி.சி.க., முஸ்லிம் லீக் கட்சிகள் ஒப்புக்கொள்ளுமா?

அமெரிக்க அதிபர் ரீகன், ஆந்திராவில் என்.டி.ஆர், தமிழகத்தில் எம்.ஜி.ஆர். என பல முதலமைச்சர்கள் திரையுலகத்திலிருந்து விலகி, அதிகார மையத்திற்கு செல்லும்போது யாரும் தியேட்டர்களில் அழும் கோமாளித்தனத்தைத் செய்ததில்லை. இங்கே அமைச்சர்கள் கத்துகிறார்கள், கதறுகிறார்கள்.

ஏறத்தாழ அனைத்து அமைச்சர்களுமே இப்படிக் கோமாளிகளாக இருந்தால், தமிழ்நாடு சர்க்கஸ் கூடாரமாக கூட இருக்கத் தகுதியற்ற ஒன்றாக மாறிவிடும்.

ஒன்றிய அரசு பல துறைகளில் முதன்மை பெற்ற மாநிலமாக தமிழகத்தை தேர்வு செய்து விருது தரும்போது, அதைப் பெறுகிற நீங்கள், அந்தக் கேடயத்தை பெறுவதற்குக் காரணமான முன்னால் முதல்வர் தளபதி ஸ்டாலினுக்கு நன்றி சொல்லியிருக்க வேண்டும்.

கோட்டையில் ஆகஸ்ட் 15-ல் தேசிய கொடியினை ஏற்றும்போது, இந்தக் கொடியினை ஏற்றும் உரிமையை முதல்வர்களுக்கு பெற்றுத் தந்த என் நாற்பதாண்டு கால நண்பர் டாக்டர் மு. கலைஞர் கருணாநிதிக்கு என் நன்றியினை இந்த ராமச்சந்திரன் தெரிவித்துக்கொள்கிறேன் என்றார் எம்.ஜி.ஆர். அவர்கள். அந்த நன்றி த.வெ.க.வினருக்கு இல்லையே! இருந்தால் கலைஞருக்கு, தளபதிக்கு நன்றி சொல்லியிருப்பார்கள்.

இந்த ஆட்சியினரிடம் நல்ல பெயரை எடு, நல்ல பெயரை எடு என்றால் அதைத் தவறாக புரிந்துகொண்டு நல்ல பெயரான முத்தமிழறிஞர் கலைஞரின் பெயரை பல திட்டங்களிலிருந்து எடுத்து வருகின்றனர்.

நலிந்த பிரிவினருக்கு வீடு வேண்டும் என முதன் முதலாக குடிசை மாற்று வாரியம், வீட்டு வசதி வாரியம் கண்டவர் கலைஞர். அனைத்து சாதியினரும் ஒற்றுமையாக வாழலாம் என உலகிற்குக் காட்டிட சமத்துபுரம் கண்டவர் தலைவர் கலைஞர்.

இந்தியாவிலேயே தமிழகத்தில்தான் முதன் முதலில் கலைஞர் முயற்சியால் ஏழைகளுக்கு வீடு கட்டும் திட்டம் உருவானது.

அந்தக் கலைஞர் பெயரால் “கலைஞர் கனவு வீடு திட்டம்” தளபதி ஸ்டாலினால் கொண்டுவரப்பட்டது. அந்தத் திட்டத்திலும் கலைஞர் பெயரை எடுத்துவிட்டனர்.

எம்.ஜி.ஆர். ஆட்சியில் நந்தனம் வீட்டு வசதி வாரியக் கட்டிடத்திற்கு “கலைஞர் கருணாநிதி வீட்டு வசதி வாரியம் மாளிகை” என்று இருந்த பெயரை “பெரியார் வீட்டு வசதி வாரிய மாளிகை” என மாற்றிவிட்டனர். காரணம் கேட்டபோது உயிருடன் இருப்பவர் பெயரை வைக்கக்கூடாது என்பதால் மாற்றி உள்ளோம் என்றனர்.

ஆனால் இப்போது பல திட்டங்களில் இருந்த கலைஞரின் பெயரை மாற்றியதற்கு விஜய் ஒரு காரணமும் கூறவில்லை.

அடுத்த ஜென்மத்தில் விவசாயியாக பிறக்க வேண்டும் என்று சொல்லி ஆட்சிக்கு வந்தவர், வேளாண் துறைக்கு நிதியைக் குறைத்து விவசாயிகளை வஞ்சிப்பதா?

அதற்கு அடுத்த ஜென்மம் எதற்கு? இந்த ஜென்மத்திலேயே நிலம் சாகுபடி செய்து விவசாயியாக ஆகலாமே!

ராஜீவைக் கொன்ற வீண்பழி தி.மு.க.வின்மீது விழ 1991 சட்டமன்றத் தேர்தலில் தி.மு.க.விற்கு 2 இடம் தான் கிடைத்தது. அடுத்து வந்த சட்டமன்றத் தேர்தலில் தி.மு.க. மாபெரும் வெற்றி கண்டு ஆட்சியைப் பிடித்தது.

பாராளுமன்ற தேர்தலில் 39 க்கு 39 தோற்ற வரலாறும் உண்டு. அடுத்த தேர்தலிலேயே மீண்டும் 39க்கு 39 பெற்ற வரலாறும் தி.மு.க.விற்கு உண்டு. இடிவிழும்போதே எழுந்த இயக்கம் தி.மு.க. இப்போது இருமலுக்கா வீழ்ந்துவிடும்?

எங்கள் எதிரியானாலும் எங்களின் கொள்கையை நிறைவேற்றும் போது ஆதரிப்போம் என்பதை தமிழ்நாடு சட்டமன்றத்தில் த.வெ.க. கொண்டு வந்த தீர்மானத்தை தி.மு.க. ஆதரித்ததிலேயே மக்களுக்கு புரிந்திருக்கும்.

காலுக்கு ஏற்பத்தான் செருப்பு. செருப்புக்கு ஏற்ற கால் அல்ல. தீர்மானம்தான் முக்கியம். அதை தரும் கட்சி அல்ல.

த.வெ.க. ஆனாலும் “நீட் எதிர்ப்பு, தமிழ்த்தாய் வாழ்த்து, தொகுதி சீரமைப்பில், அதே 7.5 சதவீதம்” இவைகளை கொண்டு வந்தால் தி.மு.க.வினர் ஆதரிப்போம்.

எங்களின் அன்றைய கூட்டணி கட்சிகளான காங்கிரஸ், கம்யூனிஸ்டுகள் ஆதரிப்பதனாலேயே எங்களுக்கு உடன்படாத கொள்கையை தீர்மானமாக பா.ஜ.க. கொண்டுவந்தால் நாங்கள் ஆதரிக்கவில்லை, எதிர்ப்போம்.

ஆம் பொருளாதார அடிப்படையில் பா.ஜ.க. பிராமணர் உள்ளிட்ட உயர் ஜாதியினருக்கு பத்து சதவீதம் இடஒதுக்கீடு கொண்டுவந்தபோது, பா.ஜ.க. கொண்டு வந்ததை காங்கிரஸ், கம்யூனிஸ்டுகள் ஆதரித்தன. தி.மு.க.வினர் பா.ஜ.க. தீர்மானத்தை எதிர்த்து போராடினார்கள்.

நீங்கள் பா.ஜ.க.வை எதிர்க்கும்போதெல்லாம் நாங்கள் எதிர்ப்பது என்பதும், நீங்கள் பா.ஜ.க.வை ஆதரிக்கும்போது தி.மு.க.வும் ஆதரிக்கவேண்டும் என்பதெல்லாம் இயல்பை கடந்தது. கொள்கையில் சமாதானம் தி.மு.க.வில் எப்போதும் கிடையாது. காங்கிரஸ் கருத்துக்கு தி.மு.க. ஒத்துவராவிட்டால் எட்டப்பர்களா? எட்டப்பர் கூட்டமே எட்ட நில்.

ஒதியமரம் உக்கரத்துக்கு உதவாது. அதுபோல் இந்தியர்களுக்கு உதவாத காங்கிரஸ் கூட்டத்தின் எட்டப்ப குரல் தமிழ்நாட்டில் எடுபடாது.

எட்டப்ப கூட்டமே எட்டநில். எட்டப்ப கூட்டமே தள்ளிநில். விரைவில் தளபதி ஸ்டாலின் ஆட்சி அமைவது உறுதி.

அரசியலில் அகரம் கூட அறியாதவர்கள் காங்கிரசினர். சிகரமாய் திகழும் தளபதிக்கு ஆலோசனை சொல்ல வேண்டாம்.