புதுடெல்லி, ஆக.15–
மழைக்கால கூட்டத் தொடரில் கலந்துகொண்டுள்ள திமுக எம்.பி. இரா.கிரிராஜன், ஒன்றிய அரசின் வேளாண்மை மற்றும் விவசாயிகள் நலத்துறை அமைச்சரிடம், பயிர் ஊட்டச்சத்தில் ஏற்பட்டுள்ள முன்னேற்றங்களையும், நிலையான வேளாண்மையில் அதன் முக்கியத்துவத்தையும் ஒன்றிய அரசு அறிந்துள்ளதா? பயிர் உற்பத்தித்திறனை மேம்படுத்துவதற்கான புதுமையான நடைமுறைகள் மற்றும் தொழில்நுட்ப முன்னேற்றங்கள் குறித்தும், உணவுப் பாதுகாப்பு மற்றும் ஊட்டச்சத்துத் தேவைகளைப் பூர்த்தி செய்வதற்கான கூட்டு முயற்சிகளின் அவசியம் குறித்தும் துறைசார் வல்லுநர்கள், மாநில அரசுகள், விவசாயி கள் கூட்டமைப்புகளுடன் ஒன்றிய அரசு கலந்துரையாடியுள்ளதா என்ற கேள்விகளை எழுப்பியிருந்தார்.
இவற்றுக்கு பதிலளித்துள்ள ஒன்றிய அரசின் துறை வேளாண்மை மற்றும் விவசாயி கள் நலத்துறை அமைச்சர் சிவ்ராஜ் சிங் சௌஹான், மத்திய அரசு பயிர் ஊட்டச்சத்தில் ஏற்பட்டுள்ள முன்னேற்றத்தையும், நிலையான வேளாண்மையில் அதன் முக்கியத்துவத்தையும் ஆராய்ந்துள்ளதாக தெரிவித்துள்ளார். அமில மண்ணில் சுண்ணாம்பு இடுதல், சோடியம் நிறைந்த மண்ணில் ஜிப்சம் இடுதல், குறைந்த மண் கரிம கார்பன் உள்ள மண்ணில் கரிமப் பொருட்களை இடுதல் போன்ற, பயிர் ஊட்டச்சத்தை மேம்படுத்தும் பல மண் ஆரோக்கிய மேம்பாட்டு நடைமுறைகளை இந்திய வேளாண் ஆராயச்சி கவுன்சில் (ICAR) பரிந்துரைத்துள்ளது என்றும் அவரது பதிலில் தெரிவித்துள்ளார்.
இயற்கை வேளாண்மை மற்றும் கரிம வேளாண்மை போன்ற இயற்கை சார்ந்த தீர்வுகள் உருவாக்கப்பட்டுசெயல்விளக்கம் அளிக்கப்பட்டுள்ளன; களத்திலேயே துல்லியமான உரப் பரிந்துரைக்கான e-FARMS போன்ற, உரப் பரிந்துரைக்கான அலைபேசி அடிப்படையிலான செயலி உருவாக்கப்பட்டு, அதற்கும் செயல்விளக்கம் அளிக்கப்பட்டுள்ளது; ICAR, வேளாண் மண்ணின் நுண்ணூட்டச்சத்து மதிப்பீடு மற்றும் வரைபடமாக்கலை மேற்கொண்டு, மறைமுகப் பசியைப் போக்கவும், பயிர் உற்பத்தித்திறன் மற்றும் ஊட்டச்சத்துத் தரத்தை மேம்படுத்தவும், நிலையான மற்றும் காலநிலை மாற்றத்தைத் தாங்கக்கூடிய வேளாண் உற்பத்தியை ஆதரிக்கவும், பயிர் மற்றும் பிராந்தியத்தி ற்கேற்ற நுண்ணூட்டச்சத்து பரிந்துரைகளை உருவாக்கியுள்ளது என திமுக எம்.பி. கிரிராஜனின் கேள்விக்கு ஒன்றிய அரசு பதிலளித்துள்ளது.
மண் பரிசோதனை பயிர் விளைவு (STCR) அடிப்படையிலான பொது உரப் பரிந்துரைகளின் (GFR) ஆதரவுடன், இரசாயன உரங்களை அங்கக உரங்கள், பயிர்க் கழிவுகள், பசுந்தாள் உரங்கள் மற்றும் உயிர் உரங்களுடன் இணைக்கும் ஒருங்கிணைந்த ஊட்டச்சத்து மேலாண்மை பரிந்துரைக்கப்பட்டுள்ளது என்றும், உரப் பயன்பாட்டை மேம்படுத்துவதற்காக, குறிப்பிட்ட இடத்திற்கான ஊட்டச்சத்து மேலாண்மை, உணரி மற்றும் முடிவெடுக்கும் ஆதரவு அடிப்படையிலான உரப் பரிந்துரைகள், 14 வேளாண்-சூழலியல் மண்டலங்களில் உள்ள 50 பயிர்களுக்கான சொட்டுநீர் பாசனஉர அட்டவணைகள், மற்றும் நீர் வளர்ப்பு மற்றும் பாதுகாக்கப்பட்ட சாகுபடிக்கான ஊட்டச்சத்து மேலாண்மை நெறிமுறைகள் உள்ளிட்ட துல்லியமான ஊட்டச்சத்து மேலாண்மை தொழில்நுட்பங்களையும் ICAR உருவாக்கியுள்ளது என்றும், கூடுதலாக, மண் ஆரோக்கியம், தாவர ஊட்டச்சத்து மற்றும் நிலையான வேளாண்மையை மேம்படுத்த உதவுகின்றன என்றும் பதிலளிக்கப்பட்டுள்ளது.
பயிர் உற்பத்தித்திறனை மேம்படுத்துவதற்கும், உணவுப் பாதுகாப்பு மற்றும் ஊட்டச்சத்துத் தேவைகளைப் பூர்த்தி செய்வதற்கும் உள்ள புதுமையான நடைமுறைகள் மற்றும் தொழில்நுட்ப முன்னேற்றங்கள் குறித்து, விஞ்ஞானிகள், துறைசார் வல்லுநர்கள், மாநில வேளாண்மைத் துறை அதிகாரிகள், விவசாயிகள் மற்றும் பிற பங்குதாரர்களை உள்ளடக்கிய பல அடுக்குக் கலந்துரையாடல்களை ஒன்றிய அரசாங்கம் நடத்துவதாகவும் அமைச்சர் பதிலளித்துள்ளார்.
இந்திய வேளாண் ஆராய்ச்சிக் கழகத்தின் (ICAR) கீழ் இயங்கும் தேசிய வேளாண் ஆராய்ச்சி அமைப்பு (NARS), நாடு முழுவதும் உள்ள தனது 73 ICAR நிறுவனங்கள் மற்றும் 52 மத்திய/மாநில வேளாண் பல்கலைக்கழகங்கள் மூலம் 300 பயிர்களில் மேம்படுத்தப்பட்ட இரகங்கள், புதுமையான வேளாண் நடைமுறைகள் மற்றும் மேம்பட்ட தொழில்நுட்பங்களை உருவாக்குவதில் ஈடுபட்டுள்ளது. இவ்வாறு உருவாக்கப்பட்ட தொழில்நுட்பங்கள், ஒவ்வொரு மாநிலத்திலும் மண்டல வாரியாக ICAR நிறுவனங்கள், மாநில வேளாண் பல்கலைக்கழகங்கள் மற்றும் மாநில வேளாண் துறை ஆகியவற்றுக்கு இடையேயான கலந்துரையாடல்களில் விவாதிக்கப்பட்டு, வேளாண் துறையால் நடத்தப்படும் மாநில அளவிலான தகவமைப்புச் சோதனைகளில் கிடைக்கும் செயல்திறனின் அடிப்படையில் அந்தந்த மண்டலத்தின் நடைமுறைத் தொகுப்பில் சேர்க்கப்படுகின்றன.
ஒவ்வொரு ஆண்டும் ராபி மற்றும் காரிஃப் பருவங்களுக்கு முன்பு, தொழில்நுட்ப இடைவெளிகள் குறித்த பின்னூட்டங்களின் அடிப்படையில் ICAR மற்றும் வேளாண்மை மற்றும் உழவர் நலத்துறை ஆகியவை கலந்துரையாடல் கூட்டங்களை விரிவாக நடத்துகின்றன.
ஒவ்வொரு பயிர் பருவத்திற்கும் முன்பு, வேளாண்மை மற்றும் உழவர் நல அமைச்சகத்தால் தேசிய அளவிலான வேளாண் மாநாடு மற்றும் ராபி/காரிஃப் பிரச்சாரங்கள் ஏற்பாடு செய்யப்படுகின்றன என்றும், அதற்கு துறையின் அமைச்சர் தலைமை தாங்குகிறார் என்றும், அதில், மாநிலங்களின் வேளாண்மை அமைச்சர்கள் மற்றும் மாநில வேளாண்மைத் துறையின் செயலாளர் நிலை அதிகாரிகள் கலந்துகொள்கின்றனர் என்றும் கூறப்பட்டுள்ளது. 11 வேளாண் தொழில்நுட்பப் பயன்பாட்டு ஆராய்ச்சி நிறுவனங்கள் (ATARI), மாநில அரசுடன் இணைந்து தனது 731 வேளாண் அறிவியல் மையங்கள் (KVKs) மூலம் விவசாயிகளுக்குப் பல்வேறு தொழில்நுட்பங்களைப் பரப்புகின்றன.
தொழில்நுட்பங்கள் மற்றும் குறிப்பிட்ட பிரச்சினைகள் குறித்து விவசாயிகளுக்கு விழிப்புணர்வு ஏற்படுத்துவதற்காக, விக்சித் கிருஷி சங்கல்ப் அபியான் மற்றும் கேத் பச்சாவ் அபியான் போன்ற தேவை அடிப்படையிலான திட்டங்களும் நடத்தப்படுகின்றன என பதிலில் கூறப்பட்டுள்ளது.
கடந்த 2014–2025–ஆம் ஆண்டுகளில், 1,574 தானியங்கள், 444 எண்ணெய் வித்துக்கள், 473 பயறு வகைகள், 207 தீவனப் பயிர்கள், 408 நார் பயிர்கள், 96 கரும்பு மற்றும் 34 இதர பயிர்கள் ஆகியவை என மொத்தம் 3,236 வயல் பயிர் இரகங்கள் வெளியிடப்பட்டு அறிவிக்கப்பட்டுள்ளன என்றும், இவற்றில் 2,995 இரகங்கள் ஒன்று அல்லது அதற்கு மேற்பட்ட உயிரியல்/ உயிரற்ற காரணிகளால் ஏற்படும் பாதிப்புகளைத் தாங்கும் திறன் கொண்டவை என்றும், 587 இரகங்கள் வறட்சி, வெப்பம், வெள்ளம்/ நீரில் மூழ்குதல், உப்புத்தன்மை/ காரத்தன்மைமற்றும் குளிர்/ பனி போன்ற கடுமையான வானிலை நிலைகளைத் தாங்கும் திறன் கொண்டவை என்றும் அமைச்சர் விளக்கம் அளித்துள்ளார்.
கடந்த 11 ஆண்டுகளாக, அரசாங்கம் ICAR மூலமாக ஊட்டச்சத்து நிறைந்த பயிர்களையும் இரகங்களையும் உருவாக்குவதில் மிகுந்த கவனம் செலுத்தி வருவதாகவும், ஊட்டச்சத்துக் குறைபாடு எனும் சவாலை எதிர்கொள்ளும் வகையில், உணவு தானியங்களின் ஊட்டச்சத்துத் தரத்தை மேம்படுத்திய 204 உயிர்ச்சத்து செறிவூட்டப்பட்ட வயல் மற்றும் தோட்டக்கலைப் பயிர் இரகங்களை ICAR உருவாக்கியுள்ளதாகவும் திமுக எம்.பி. கிரிராஜனின் கேள்விக்கு ஒன்றிய அரசு பதிலளித்துள்ளது.
கோவை - சத்தியமங்கலம் சாலையில் உள்ள சரவணம்பட்டி போக்குவரத்து சந்திப்பில் அடிக்கடி ஏற்படும் போக்குவரத்து நெரிசலைத் தீர்க்க மேம்பாலம் அமைக்க வேண்டும் என்ற பொது மக்களின் கோரிக்கையை ஏற்று சாலைப் போக்குவரத்து மற்றும் நெடுஞ்சாலைகள் அமைச்சர் நிதின் கட்காயிடம் கோவை நாடாளுமன்ற உறுப்பினர் முனைவர் கணபதி ப.ராஜ்குமார் கோரிக்கை மனுவினை வழங்கினார்.