கள்ளக்குறிச்சி, ஆக. 15 –
கோவை தனியார் பொறியியல் கல்லூரியில் போதைப்பொருள் விற்றது தொடர்பான தகவல்களை தந்ததால் அடித்து கொலை செய்யப்பட்ட அமுதனின் வீட்டுக்கு, கள்ளக்குறிச்சி வடக்கு மாவட்ட செயலாளர் உதயசூரியன் நிர்வாகி களுடன் வீடு தேடி சென்று மகனை இழந்து வாடும் பெற்றோருக்கு ஆறுதல் கூறி திமுக சார்பில் ரூ.2லட்சம் நிவாரணத் தொகையையும் வழங்கியதுடன், இரண்டாவது மகனின் முழு கல்வி செலவையும் ஏற்றுக்கொண்டார். தொடர்ந்து குடும்ப த்திற்கு வேண்டிய உதவிகளையும் தி.மு.க. செய்யும் என்றும் உறுதி கூறினார்.
அப்பொழுது அவரிடம் பெற்றோர்கள் தனது மகனின் இறப்புக்கு தக்க நீதி கிடைக்க வேண்டும் அதற்கு உதயநிதி சார் தான் குரல் கொடுக்க வேண்டும், உதவிட வேண்டும், நீதி வாங்கி தர அவரால் மட்டும் தான் அது முடியும் என்று கண்ணீருடன் கதறி அழுது வேண்டுகோள் வைத்துள்ளனர்.
கோவை இந்துஸ்தான் பொறியியல் கல்லூரி விடுதிக்குள் கஞ்சா உள்ளிட்ட போதைப் பொருட்கள் விற்பனை செய்யப்படுவதாக கல்லூரி முதல்வர், துறைத்தலைவர், உடற்கல்வி ஆசிரியர் உள்ளிட்டோரிடம் தகவல் அளித்ததாகக் கூறப்படும் மூன்றாம் ஆண்டு மாணவர் அமுதன், 20க்கும் மேற்பட்ட சக மாணவர்கள் மற்றும் போதைப் பொருள் தொடர்புடைய இளைஞர்களால் கொடூரமாக கொல்லப்பட்டதாக அவரது தந்தை ஊடகங்களிடம் கதறியிருப்பது அதிர்ச்சியை யும், ஆழ்ந்த வேதனையையும் ஏற்படுத்துகிறது.
இது வெறும் ஒரு மாணவனின் மரணம் அல்ல, தவறைத் தட்டிக் கேட்ட ஒரு மாணவனுக்கு கிடைத்த தண்டனையா இந்த மரணம்?
கல்லூரி நிர்வாகத்திடம் மாணவன் அமுதன் அளித்த தகவல்கள் உண்மையில் ரகசியமாகப் பாதுகாக்கப்பட்டனவா? “உனக்கும் எனக்கும் தான் தெரியும். வெளியே யாருக்கும் தெரியாது. தைரியமாகப் போ” என்று கூறிவிட்டு, அந்த மாணவனிடமிருந்து பெறப்பட்ட தகவல்கள் சம்பந்தப்பட்டவர்களுக்கு கசியவிடப்பட்டிருந்தால், அந்தத் தகவல் கசிவுக்கு பொறுப்பானவர்கள் மீது கொலைக் குற்றத்தைவிடக் குறையாத அளவுக்கு கடுமையான விசாரணை நடத்தப்பட வேண்டாமா?
ஒரு மாணவன் உண்மையைச் சொன்னதற்காகவே உயிரிழக்க வேண்டிய நிலை என்றால், நாளை எந்த மாணவன் போதைப் பொருள் விற்பனை குறித்து புகார் கொடுக்கத் துணிவான்?
மாணவர்கள் கொடுக்கும் புகார்கள் ரகசியமாகக் காக்கப்பட வேண்டும். அவர்களின் பாதுகாப்புக்கு உத்தரவாதம் இருக்க வேண்டும். இல்லையெனில், கல்லூரிகளுக்குள் நடக்கும் போதைப் பொருள் விற்பனை, ராகிங், பாலியல் அத்துமீறல், வன்முறை என எந்தக் குற்றத்தையும் மாணவர்கள் வெளியில் சொல்ல அஞ்சுவார்கள்.
எனவே, இந்தச் சம்பவத்தில் கொலை செய்தவர்கள் மட்டுமல்ல தகவல் எவ்வாறு கசிந்தது? யார் கசியவிட்டார்கள்? யாருடைய அலட்சியத்தால் ஒரு மாணவனின் உயிருக்கு ஆபத்து ஏற்பட்டது? என்பதும் முழுமையாக விசாரிக்கப்பட வேண்டும்.
குறிப்பாக மாணவன் அமுதனிடம் விசாரணை நடத்தியதாகக் கூறப்படும் கல்லூரி நிர்வாகத்தினர் மற்றும் ஆசிரியர்களிடம் காவல்துறை தீவிர விசாரணை நடத்த வேண்டும்.
கல்லூரி வளாகத்துக்குள் கஞ்சா உள்ளிட்ட போதைப் பொருட்கள் எப்படி நுழைந்தன?
யார் விற்றார்கள்?
யார் வாங்கினார்கள்?
யார் பாதுகாத்தார்கள்?
யார் தகவலை கசிய விட்டார்கள்?
யார் நடவடிக்கை எடுக்காமல் இருந்தார்கள்?
இந்தக் கேள்விகளுக்கெல்லாம் விடை கிடைக்க வேண்டும்.
உண்மையை வெளிக்கொண்டு வராமல், சம்பவத்தை வெறும் “கோஷ்டி மோதல்” என்று சட்டமன்றத்தில் ஒருஅமைச்சர் சொல்வது பொறுப்பற்ற அலட்சியம், ஒரு மாணவன் கொல்லப்பட்டிருக்கிறான்.
அவனது குடும்பம் கதறுகிறது.
கல்லூரி வளாகத்தில் போதைப் பொருள் குறித்த கடுமையான குற்றச்சாட்டுகள் எழுந்துள்ளன.
ஆனால் பதில் “கோஷ்டி மோதல்”!
இது தான் தவெக அரசின் போதை ஒழிப்பு லட்சணமா?
இது தான் தவெக அரசு மாணவர்களின் பாதுகாப்பை உறுதி செய்யும் லட்சணமா?
மாணவர்களின் உயிரைவிட சோபா மாடல் முதல்வர் விஜய்க்கு அரசியலும், விளம்பரமும், சினிமா சந்திப்புகளும் முக்கியமா?
சினிமா நடிகர்களைசந்திப்பதிலும், புகைப்படம் எடுப்பதிலும் காட்டப்படும் ஆர்வத்தில் ஒரு பகுதியாவது, தமிழ்நாட்டின் கல்லூரி மாணவர்களின் பாதுகாப்பைப் பற்றி சிந்திப்பதில் காட்டப்படுமா?
அமுதனின் மரணத்திற்கு நீதி கிடைக்க வேண்டும்.
உண்மையைச் சொன்ன மாணவன் கொல்லப்பட்டான் என்ற குற்றச்சாட்டு உண்மையானால், அந்த உண்மையை வெளிக்கொண்டு வந்து, குற்றத்தில் நேரடியாகவும் மறைமுகமாகவும் தொடர்புடைய ஒவ்வொருவரும் சட்டத்தின் முன் நிறுத்தப்பட வேண்டும்.
அமுதனுக்கான நீதி என்பது ஒரு மாணவனுக்கான நீதி மட்டுமல்ல நாளை உண்மையைப் பேசப் போகும் ஒவ்வொரு மாணவனுக்குமான பாதுகாப்பு.
இந்த நிகழ்வின் போதுவடக்கு மாவட்ட செயலாளர் உதயசூரியன், பேரூராட்சி தலைவர்பன்னீர்செல்வம், ஒன்றிய குழு துணை தலைவர் அன்புமணிமாறன், மாநில மகளிர் அணி துணை செயலாளர் அங்கையற்கண்ணி, நகர செயலாளர் ஜெயவேல் மற்றும் அனைத்து நிர்வாகி கள் தொண்டர்கள் உடன் இருந்தனர்.