புதுவை, ஆக.15–
வில்லியனூர் மார்க்கெட்டில் உள்ள அரிசி கடையில் ரவுடி மாமூல் கேட்டு தராததால் பெட்ரோல் குண்டு வீசிய சம்பவம் சட்டம்–
ஒழுங்கை கேலித்கூத்தாக்கி உள்ளதாக புதுச்சேரி மாநில தி.மு.க. அமைப்பாளர் இரா. சிவா கடும் கண்டனம் தெரிவித்துள்ளார்.
இது தொடர்பாக அவர் வெளியிட்டுள்ள செய்தி அறிக்கையில் கூறியிருப்ப தாவது: –
புதுச்சேரி மாநிலத்தில் ஆன்மீக ஸ்தலத்திற்கு புகழ்பெற்ற வில்லியனூர் தொகுதியில் கடந்த ஐந்தாண்டு காலத்தில் மக்கள் அச்சமின்றி வாழும் சூழல் இருந்தது. காரணம் காவல் துறை சுதந்திரமாக செயல்பட்டது. ரவுடிகள் இரும்புக்கரம் கொண்டு அடக்கப்பட்டனர். இந்நிலையில் வில்லியனூர் மார்க்கெட் பகுதியில் அமைந்துள்ள அரிசிக் கடை ஒன்றில், நேற்று ரவுடிகள் மாமூல் கேட்டு மிரட்டி உள்ளனர். கடை உரிமையாளர் மாமூல் தர மறுத்ததால் பொதுமக்கள் அதிகம் புழங்கும் மார்கெட் பகுதியில் உள்ள அரிசிக் கடையில் பெட்ரோல் குண்டுகள் வீசி தாக்குதல் நடத்தி உள்ளனர்.
இச்சம்பவத்தால் வியாபாரிகளும், பொதுமக்களும் எவ்வளவு துயரம் அடைந்துள்ளார்கள் என்பதை பார்க்க முடிந்தது. புதுச்சேரி மாநிலத்தில் என்.ஆர்.காங்கிரஸ் – பாஜக கூட்டணி ஆட்சியில் சட்டம்–ஒழுங்கு சீர்குலைந்து, ரவுடிகளின் கை ஓங்கியுள்ளதையே இச்சம்பவம் காட்டுகிறது.
மக்கள் நடமாட்டம் மிகுந்த வில்லியனூர் நகரப் பகுதியில் இத்தகைய துணிகரமான தாக்குதல் நடத்தப்பட்டிருப்பது, உளவுத்துறையின் தோல்வியையும், காவல் துறையின் செயலற்ற தன்மையையும் காட்டுகிறது. சுதந்திரமாக செயல்பட்ட வில்லியனூர் காவல் துறை இன்று ஏவல் துறையாக மாறிவுள்ளதோ என்ற சந்தேகத்தை இச்சம்பவம் ஏற்படுத்துகிறது. காவல் துறை சுதந்திரமாக செயல்பட அனுமதிக்க வேண்டும். அப்போது தான் ரவுடிகள் தலைதூக்க மாட்டார்கள்.
வியாபாரிகளை அச்சுறுத்தும் வகையில் பெட்ரோல் குண்டு வீச்சு சம்பவத்தில் ஈடுபட்ட ரவுடிகளை எவ்வித அரசியல் தலையீடும் இன்றி காவல்துறை உடனடியாக இரும்புக்கரம் கொண்டு ஒடுக்க வேண்டும். புதுச்சேரி மாநிலம் முழுவதும் உள்ள வணிகர்கள் அச்சமின்றி தொழில் செய்ய ஏதுவாக சந்தைப் பகுதிகளிலும், வணிக வளாகங்களிலும் போலீஸ் பாதுகாப்பை பலப்படுத்த வேண்டும். புதுச்சேரியை மீண்டும் ரவுடிகள் கூடாரமாக மாறுவதற்கு அரசு அனுமதிக்கக் கூடாது. மாமூல் கேட்கும் சமூக விரோதிகள் மீது குண்டர் சட்டத்தின் கீழ் கடுமையான நடவடிக்கை எடுக்க வேண்டும் என்று வணிகர்கள் மற்றும் பொதுமக்கள் சார்பாக கேட்டுக்கொள்கிறேன்.