நமது திராவிட இயக்கமானது, தென்னிந்திய நல உரிமைச் சங்கம், நீதிக்கட்சி, திராவிடர் கழகம், திராவிட முன்னேற்றக் கழகம், என பல்வேறு அமைப்புகளைக் கொண்டது.
எனினும் இவற்றின் இலட்சியமும்,
நோக்கமும் ஒன்றே!
தொன்று தொட்ட அதன் வளர்ச்சியில் தமிழ் மொழி காக்கப் போராடி, தமிழர் வாழ்வு மேம்புற பணியாற்றிவரும் இந்நாள் வரை, எண்ணற்ற அறிஞர்கள், மேதைகள், பகுத்தறிவாளர்கள், சுயமரியாதை தீரர்கள், தியாகிகள், படைப்பாளர்கள், பத்திரிக்கையாளர்கள், பேச்சாளர்கள், மற்றும் கலை - இலக்கியம் என ஒவ்வொன்றிலும் தனித்தனியே முத்திரை பதித்த பல வித்தகர்களை நாம்
அறிவோம்.
அவர்களுள் “ ஏன் வேண்டும் இன்ப திராவிடம்? “ என விளக்கி, திராவிட இயக்க வரலாறு படைத்து, “ மாறன் என்றால் சாமான்யமா?” எனத் தென்னாட்டு காந்தி பேரறிஞர் அண்ணா அவர்களால் வியந்து பாராட்டப்பட்டு, படைப்பாளியாகவும், பெரும் படிப்பாளியாகவும் திகழ்ந்த அறிவுலகமேதை முரசொலி மாறன் அவர்களின் 93 வது பிறந்தநாள் இன்று.
இந்தியாவின் தென்கோடியில் திருக்குவளை கிராமத்தில் பிறந்து, திக்கெட்டும் புகழ் பெற்று தோகா மாநாட்டில் இந்தியாவின் குரலாய், கொள்கையாய் நீங்கள் பேசப்போவது தான் விளங்கப் போகிறது என்று அந்நாளைய பிரதமர் ஐ. கே. குஜ்ரால் ( இந்தர் குமார் குஜ்ரால் ) அவர்களால் உற்சாகப்படுத்தப்பட்டு, “ நான் பேச எழும் முன் மனதில் ஆத்தாவையும், தாத்தாவையும் வேண்டிக் கொண்டேன். மாநாட்டில் மற்ற உரைகளைவிட எனது உரையே மிகச் சிறப்பாக அமைந்ததென அனைவரும் பாராட்டினர்.
என்னவிருந்தாலும் நான் உங்களது வளர்ப்பு, வார்ப்பு தானே!” எனத் தலைவர் கலைஞர் அவர்களுக்கு கடிதமெழுதிய கண்ணியமிக்க கலைஞரின் மாணவர் மாமேதை மாறன் அவர்கள் பிறந்தநாள் இந்த ஜூலை 17.
1958 லேயே தனது 24 வது வயதில் “ஏன் வேண்டும் இன்ப திராவிடம்?” எனும் ஆராய்ச்சி நூல் இயற்றி, பல வரலாற்று விளக்கங்களைச் சொல்லி, உலகில் எத்தனை நாடுகள், மொழிவாரியாக, இனவாரியாக, காலனி ஆதிக்கத்தினின்று விடுதலையடைந்து, சுதந்திர கீதம் இசைத்தன என்பதனை பட்டியலிட்டு அந்நூலில் விளக்கி, ஆதராங்களோடு, ஆணித்தரமாகச் சொல்லி, உலக வரலாற்று ஆசிரியர்களுக்கு ஒப்பான மதிநுட்பம் வாய்ந்தவாராக ஐயா மாறன் அவர்கள் திகழ்கிறார்.
மரகதம், அன்னையின் ஆணை, குலதெய்வம், எம். ஜி ஆர் - ஜெயலலிதா நடித்த எங்கள் தங்கம் போன்ற திரைப்படங்களுக்கு கதை, வசனமெழுதி, தயாரித்து, திரைத்துறையில் இளம் வயதிலேயே முத்திரை பதித்தவர் முரசொலி மாறன் அவர்கள்.
1965 மொழிப்போரில் இந்திய பாதுகாப்பு சட்டத்தின் படி கைது செய்யப்பட்டு பாளைத் தனிமைச் சிறையில் அடைக்கப்பட்டிருந்த ஒரே தலைவர், நமது உயிர்த்தலைவர் கலைஞர் அவர்கள் சிறையில் அடைபட்டிருந்த ஒவ்வொரு நாளையும்,
“ கலைஞர் சிறையில் இன்று 50 ஆவது நாள்!” என ஒவ்வொரு நாளும் பெட்டி செய்தியாக முரசொலியில் வெளியிட்டு, உலகிற்கு தெரிவித்த உத்தியறிந்த பத்திரிக்கையாளர் நமது ஐயா மாறன் அவர்கள்.
1967இல் பேரறிஞர் அண்ணா அவர்கள் விலகிக்கொண்ட தென் சென்னை நாடாளுமன்றத் தொகுதி வேட்பாளராக அண்ணா அவர்களால் அறிவிக்கப்பட்டு, மூதறிஞர் ராஜாஜி, காயிதேமில்லத் போன்ற பெரும் தலைவர்களால் முன்மொழிந்து, வழிமொழியப்பட்டு, வெற்றி பெற்று, தனது வாழ்நாளின் இறுதிவரை நாடாளுமன்ற உறுப்பினராக, மிகச் சிறந்த நாடாளுமன்றவாதியாக திகழ்ந்தவர் அறிவுலகமேதை ஐயா மாறன் அவர்கள்.
1971 இல் சட்டமன்ற - நாடாளுமன்ற தேர்தலின் போது, முரசொலி மாறன் அவர்கள் தென் சென்னையின் வேட்பாளராக தலைவர் கலைஞர் அவர்களால் அறிவிக்கப்பட்டார். பின்னர் அத்தொகுதி காங்கிரஸ் கட்சிக்கு கேரள ஆளுநராக பின்னாளில் இருந்த பா. ராமச்சந்திரனுக்கென வற்புறுத்தப்பட்டபோது, சிறிதும் வருந்தாமல், கூட்டணிக்கு விட்டுக் கொடுத்து, தோழமையின் மாண்பைசிறக்கச் செய்தவர் முரசொலி மாறன் அவர்கள்.
1976 இல் நெருக்கடி நிலையின் போது, சிறைக் கொட்டடியில் பெரும் தாக்குதலுக்குள்ளாகி, அதன் பாதிப்பு கடைசி காலம்வரை அவரை வருத்தியது என சொல்லுமளவிற்கு சோதனைகளை ஏற்று, வேதனைகளை தாங்கிய தலைவர் கலைஞரின் “ வீர அபிமன்யு!” மாமேதை மாறன் அவர்கள்.
1989இல் ஜனநாயகத்தின் பாதுகாவலர் வி. பி. சிங் கின் தலைமையில் அமைந்த தேசிய முன்னணி அமைச்சரவையில் திமுகவின் முதல் மத்திய அமைச்சராய் - நகர்ப்புற வளர்ச்சித் துறையின் கேபினட் அமைச்சராக பொறுப்பேற்றுக் கொண்ட கூட்டாட்சி தத்துவத்தின் வெற்றியாளர் முரசொலி மாறன் அவர்கள்.
1996 ஒன்றிய அமைச்சர். அதற்கும் முன்னே 17 நாட்களே பதவியிலிருந்த முன்னாள் பிரதமர் வாஜ்பாய் அவர்கள் நாடாளுமன்றத்தில் நம்பிக்கை கோரிய தீர்மானத்தின் மீது உரையாற்றிய போது, “ A Good Man in Bad Party” என வாஜ்பாய் பற்றி நாகரிகத்தோடு விளித்த நாவண்மைக்கு உரியவர் முரசொலி மாறன் அவர்கள்.
2001 இல் ஜூன் மாதம் 30 ந்தேதி தலைவர் கலைஞர் கைதின் போது நிகழ்த்ததை நினைத்தாலே, நமது நெஞ்சம் உருகும். அக்கொடூர நாளில் தனது உடல், பொருள், ஆவி அனைத்தும் “கலைஞர்! கலைஞர்!” என்று துடித்த இதயம் ஏற்கனவே நலிவுற்றிருந்த நிலையில் ஜெயலலிதாவின் கொடிய கல்நெஞ்சக் காவலர்கள் மாறன் அவர்களை அலைகழித்து, அடித்து, வதைத்து, துவைத்து, ஆடைகளை அலங்கோலப்படுத்தியும் அவற்றை பொருட்படுத்தாமல், தன்னுயிர் ஈந்தும், தனது தலைவரைக்காக்க பட்ட ரணங்களாலன்றோ, அவர் பட்ட மரமாய் நோயில் வீழ்ந்தார்.
உலகில் எத்தனை, எத்தனை உறவுகளை நாம் காண்கிறோம்.
ஆனால் தாய்மாமன் -- மருமகன் உறவின் மகத்துவத்தை வேறெங்கும் காணாத வகையில் அமைந்தது கலைஞர் - மாறன் உறவு.
புராணத்தில் கூட ஒரு மாமன் - மருமகன் உறவு இருந்ததாக சொல்கிறார்கள். கம்சன் - கண்ணன் உயிரை வாங்கிய உன்னத ( ? ) உறவு.
நமது இயக்கத்தில் நம் கண்ணெதிரிலேயே பிறந்தது முதல், மறையும் நாள் வரை, நம் தலைவருக்கு, அவரது பாசமாமாவின் கண்களுக்கு இமையாய், இதயத்திற்கு துடிப்பாய், தோல்வியில், துயரத்தில் சாய்ந்து கொள்ளும் தோளாய், இறுதிவரை தனது தலைவர் மீது துரும்புகூட படாமல் தடுக்க தடியடிப்பட்டு, கொடும் இதயநோய்க்கு ஆளாகி இறுதியில் மறைந்தே போனார் கலைஞரின் மாசறு பொன்னான, வலம்புரி முத்தான பாச மருமகன் மாமேதை மாறன் அவர்கள்.
1961 இல் தி. மு. க. வில் ஈ. வி. கே. சம்பத் அவர்கள் ஏற்படுத்திய பிளவின் போது, கழகப் பொருளாளர் பொறுப்பிலிருந்து தான் விலகுவதாக பொதுச்செயலாளர் பேரறிஞர் அண்ணாவுக்கு தலைவர் கலைஞர் எழுதிய கடிதத்தில்,
என் உயிரினுமினிய தம்பி முரசொலி மாறனை சென்ற கிழமை ஜெனரல் ஆஸ்பத்திரியில் கவலைக்கிடமான நிலையில் - நம்பிக்கையற்ற அளவில் விட்டு விட்டு தஞ்சை மாவட்டத்தில் கழக தேர்தல் நிதி சேர்க்க மூன்று நாள் அலைந்தேன் என்பதும் தங்களுக்கு தெரியும்.
என்று எழுதுமளவிற்கு தலைவர் கலைஞரின் உயிரோடு ஒன்றிவிட்ட அன்பிற்கு பாத்திரமானவர் முரசொலி மாறன் அவர்கள்.
கால் முளைத்த நாள் முதலாய் தலைவரின் கரம்பற்றி, தடம் மாறாமல் அறிவை வளர்த்து, புவியியல், வாழ்க்கை வரலாறு, பொது வரலாறு, தமிழக வரலாறு, திராவிட இயக்க வரலாறு, இந்திய வரலாறு, பொருளாதாரம், தமிழ் இலக்கியம், ஆங்கில இலக்கியம், கவிதை, அரசியல், இந்திய அரசியல், சமூகவியல், கம்பெனி சட்டங்கள், சினிமா, விளையாட்டு, தமிழ் பண்பாடு, போன்ற
20 க்கும் மேற்பட்ட தலைப்புகளில் அமைந்த 10000 க்கும் மேற்பட்ட புத்தகங்களை
படித்தறிந்த பெரும் படிப்பாளி முரசொலி மாறன் அவர்கள்.
இத்தகு சிறப்புகள் ஒருங்கே பெற்றவர்,
பெரும் படிப்பாளி!
தரமான படைப்பாளி!
சிறந்த நாடாளுமன்றவாதி!
தேர்ந்த எழுத்தாளர்!
தீர்க்கமான சிந்தனையாளர்!
தியாகத் திருவிளக்கு!
தியாகராஜ சுந்தரம் எனும் பெயர் கொண்ட எழில் நிறை மாறன் அவர்கள்!
எல்லாவற்றுக்கும் மேலாய் நமது அன்புத் தலைவர் கலைஞரின் மனசாட்சியாய், தலைவரின் விழியசைவில் விணை முடித்த வெற்றிவீரனாய் திகழ்ந்த மாமேதை மாறன் அவர்களின் பிறந்தநாள் இன்று.
கல்லூரி பயிலும் காலத்திலேயே கலைஞர் பால் கொண்ட பற்று, பாசம், பக்தி இவற்றால் எழுத்துலகிலும், இலக்கிய அரங்குகளிலும் தனது படைப்புகளை பதித்திட்ட ஐயா மாறன் அவர்களின் முதல் சிறுகதை காட்டுப்பூனை
பின்னர் முரசொலி வார இதழ்களில்,
கிரேக்க புராணம், கலைத்தோட்டம், என்ற தொடர் கட்டுரைகளை எழுதி, கிரேக்கபுராணம் நம் நாட்டில் இருக்கும் இதிகாச புரட்டுகளையும், கலைத்தோட்டம் தொடரின் மூலம் உலக சிந்தனையாளர்களை, இலக்கிய சிற்பிகளை வாரந்தோறும்
அறிமுகப்படுத்தினார்.
தொடர்ந்து அவரால் வெளியிடப்பட்ட பொங்கல் மலரிலும், அண்ணா சிறப்பு மலரிலும் அரசியல் கட்டுரைகள், ஓரங்க நாடகங்கள் இடம்பெற்று இளைஞர்கள் மனதை பெரும் கொள்ளை கொண்டது.
இப்படி அகரம் பயின்ற நாள்முதல் பின்னாளில் இந்திய நாடாளுமன்றத்தின் மிகச் சிறந்த நாடாளுமன்றவாதி எனப்போற்றப்பட்ட, சிகரம் தொட்ட நாள் வரை தான் உயிராய் நேசித்த தலைவர் கலைஞரின் உள்மனம் அறிந்து, உணர்வுகளை உணர்ந்து, கழகத்தின் முக்கிய மூளையாய் வஞ்சக சகுனிகள் மிகுந்த டெல்லியில் வாய்மையுரு தலைவர் கலைஞரின் வாளாய், வார்த்தையாய், வார்ப்படமாய் திகழ்ந்த தியாகத் தொண்டர் முரசொலி மாறன் அவர்கள்.
வடநாட்டு தலைவர்கள், விஜயலட்சுமி பண்டிட், ஜெகஜீவன்ராம், ஷேக் அப்துல்லா, அவரது மகன் பரூக் அப்துல்லா, பகுகுணா, இந்திராகாந்தி, பாஜக பட்நாயக், மொரார்ஜி தேசாய், வாஜ்பாய், ஜார்ஜ் பெர்ணான்டஷ், சரண்சிங், வி. பி. சிங், போன்ற தலைவர்களோடு கழகத்திற்கும், கலைஞருக்கும் நெருக்கமான இனக்கம் ஏற்பட பெரிதும் உழைத்த அரசியல் ராஜதந்திரி மாமேதை மாறன் அவர்கள்!
அவர் இறந்த 2003 நவம்பர் 23 அன்று அவரது திருவுடல் அருகே அமர்ந்து தலைவர் கலைஞர் கண்ணீர் வடித்த காட்சி முரசொலியை, தனது முதற்பிள்ளையை, மனசாட்சியை, கண்ணின் கருமணியை, உறுதிமிக்க தொண்டனை, துணைவனை மொத்தமாய் இழந்த சோகம் மிகுந்தன்றோ காணப்பட்டது.
அவரது திருவுருவப் படத்திறப்பு விழாவில் பேசிய தலைவர் கலைஞர், “ எல்லோரும் இங்கு இருக்கிறீர்கள். ஆனால் உள்ளேன் ஐயா என்று சொல்ல கண்மணி மாறன்
இல்லையே! “ என்று கலங்கினார்.
இன்று தலைவர் கலைஞரும் இல்லை. ஆனால் அவரின் ஆற்றல், இராஜதந்திரம், ஆளுமை திறன் கொண்டு தமிழ்நாட்டில் மாற்றார் மலைக்கும், :ஏழையர், பெற்றோர், மாணவர், இளைஞர்கள் போற்றும் சீர் மிகு திராவிட மாடல் ஆட்சியை வழங்கிய நமது திராவிட பேரரசர் தளபதியவர்கள்,
டெல்லிக்கு டி. ஆர். பாலு, ஆ. ராசா, கனிமொழி, தயாநிதிமாறன், திருச்சி சிவா, தமிழச்சி தங்க பாண்டியன், எனத் தரம் பிரித்து கழகத்தின் கொள்கை, குரலாக ஒலிக்கச் செய்து, தமிழ்நாட்டில் இளைஞர்கள் ஏற்றிப் போற்றும் சின்னவர் உதயநிதி அவர்களையும் சட்டப்பேரவையில் ஆளுங்கட்சியின் ஆணவ, அதிகாரத் திமிரான போக்கிற்கு
கடிவாளமாய் திகழ்ந்து கடமையாற்ற வழி
நடத்துகிறார்
அன்று ஐயா மாறன் போன்றோரின் கடின உழைப்பு! தியாகம்! அர்பணிப்பு! இவற்றால் வளர்ந்த இயக்கம், இன்றும் மாநிலக்கட்சியாக இருந்தாலும், டெல்லித் தர்பாரின் கண்களை உருத்தும் தீரமிகு எதிர்க்கட்சியாக களத்தில் நிற்கிறது பேரறிஞர் அண்ணா, தலைவர் கலைஞர் ஆகியோரின் கொள்கைவாளினை ஏந்தியபடி!
அந்தத் தலைவரை தனது உயிராய் நேசித்து, தியாகமாறனாய் வாழ்ந்த தலைவர் கலைஞரின் மனசாட்சி! கழகத்தின் முக்கிய மூளை, இயக்கத்தின் சுவாசம்! கலைஞர் வளர்த்த கொள்கைதங்கம் அறிவுநிறை, அழகுநிறை அறிவுலகமேதை ஐயா மாறன் அவர்களின் 93வது பிறந்த நாளான ஆகஸ்ட் 17 அன்று அவரது உளைகளமாம் முரசொலி வளாகத்தில் அமைந்துள்ள ஐயாவின் திருவுருவச் சிலைக்கு தலைவர் கலைஞரின் வழியில் மாலையணிவித்து, புகழ் சேர்க்கிறார் தமது தலைவர் தளபதியவர்கள்!!
தலைவர் கலைஞர் அவர்களின் உரைவாளாய், பாசறை முழக்கமாய், தந்திரங்கள் பலவறிந்த இந்திரஜித்தாய்த் திகழ்ந்த அறிவியக்கச் சுடரொளி மாமேதை மாறன் அவர்களுக்கு மலரஞ்சலி செலுத்த நாமும் புறப்படுவோம்! வரும் ஆகஸ்ட் 17 முரசொலி வளாகத்திற்கு!
ஓங்குக அறிவுலகமேதை ஐயா முரசொலி மாறன் அவர்களின் பெரும்புகழ்!!