தேனி, ஆக. 17 –
தேனி அரசு போக்குவரத்து கழக கிளையில் தவெக ஆட்சியில் அரசு போக்குவரத்து கழக பேருந்துகள் அடிக்கடி வழியில் பழுதாகி நிற்பதால் டிரைவர்கள் கண்டக்டர்கள் மீது பழியை போட்டுவிட்டு அதிகாரிகள் தப்பித்து விடுகின்றனர் இதனால் பொதுமக்கள் மற்றும் பள்ளி, கல்லூரி மாணவர்கள் கடும் அவதிக்குள்ளாகி வருகின்றனர்.
கிராமப்புற வழித்தடங்கள் மற்றும் நகர பேருந்துகள் முறையான பராமரிப்பு இல்லாமல் இயக்கப் படுவதாக பயணிகள் குற்றம் சாட்டுகின்றனர்.
வேலைக்கு, பள்ளிக்கு செல்லும் நேரத்தில் பேருந்து திடீரென பழுதாகி நிற்பதால் நேரம் வீணாவதுடன், அடுத்த பேருந்துக்காக மணிக்கணக்கில் காத்திருக்கும் நிலை ஏற்படுவதாக தெரிவிக்கின்றனர்.
குறிப்பாக மலைப்பகுதி மற்றும் தொலைதூர கிராமங்களுக்கு செல்லும் பேருந்துகளில் பிரேக், டயர், எஞ்சின் பழுது போன்ற கோளாறுகள் அடிக்கடி ஏற்படுவதாகவும், இதனால் பயண பாதுகாப்பு கேள்விக்குறியாகி உள்ளதாகவும் பயணிகள் அச்சம் தெரிவிக்கின்றனர்.
பேருந்துகளை உரிய காலத்தில் பராமரித்து, நல்ல நிலையில் இயக்க வேண்டும் என்றும், பழுதான பேருந்துகளுக்கு பதிலாக உடனடியாக மாற்று பேருந்து ஏற்பாடு செய்ய வேண்டும் என்றும் பொதுமக்கள் அரசுக்கு கோரிக்கை விடுத்துள்ளனர்.
போதிய பேருந்துகள் இல்லாததால் ஏற்கனவே நெரிசலில் பயணிக்கும் நிலையில், அடிக்கடி பழுதாவது மக்களின் அன்றாட வாழ்கையை மேலும் சிரமப்படுத்துவதாக பயணிகள் வேதனை தெரிவித்தனர்.