#Title

புதுச்சேரி சட்டமன்றக் கூட்டத்தொடரில் தொடக்க நிகழ்வாக ‘தமிழ்த்தாய் வாழ்த்து’ பாடுவதை உறுதி செய்க! சட்டப்பேரவைத் தலைவருக்கு எதிர்க்கட்சித் தலைவர் ஏ.எம்.எச். நாஜிம் கோரிக்கை!

புதுச்சேரி, ஆக.17–

புதுச்சேரி மாநில எதிர்க் கட்சித் தலைவர் ஏ.எம்.எச். நாஜிம், சட்டப்பேரவைத் தலை வருக்கு எழுதியுள்ள கடிதம் வருமாறு:–

நமது புதுச்சேரி சட்டப்பேரவையின் கூட்டத் தொடர் வருகின்ற 24-ஆம் தேதி கூடி, துணைநிலை ஆளுநர் அவர்களின் உரையுடன் தொடங்கவிருக்கிறது.

சட்டமன்றத்தின் நீண்டகால மரபு மற்றும் நமது தாய்மொழியான தமிழின் மாண்பைப் போற்றும் வகையில், கூட்டத்தொ டரின் தொடக்க நிகழ்வாக “தமிழ்த்தாய் வாழ்த்து” முதன்மையாகப் பாடப்பட்டு, அதன்பின்னர் “வந்தே மாதரம்” மற்றும் நிறைவாக “நாட்டுப்பண்” (தேசிய கீதம்) இசைக்கப் படுவதே முறையான மரபும் மரபுவழி நடைமுறையுமாகும்.

மேலும், இது தொடர்பான விவகாரத்தில் சென்னை உயர்நீதிமன்றத்தில் வழக்கு நடைபெற்றபோது, மத்திய அரசின் சார்பில் ஆஜரான கூடுதல் சொலிசிட்டர் ஜெனரல் (Additional Solicitor General) ஏ.ஆர்.எல். சுந்தரேசன் அவர்கள் வாதிடுகையில், “தமிழ்த்தாய் வாழ்த்தை அரசு நிகழ்வுகளின் முடிவில்தான் பாட வேண்டும் என்று மத்திய அரசு ஒருபோதும் வற்புறுத்தவோ அல்லது கட்டாயப்படுத்தவோ இல்லை” என்பதை நீதிமன்றத்தில் அதிகாரப்பூர்வமாகத் தெளிவுபடுத்தியுள்ளார்.

எனவே, இதில் எந்தவிதக் குழப்பத்திற்கும் இடமளிக்காமல், புதுச்சேரி மக்களின் உணர்வுகளுக்கும் மொழிப்பற்றுக்கும் மதிப்பளிக்கும் வகையில், வருகின்ற 24-ஆம் தேதி தொடங்கவுள்ள கூட்டத்தொடரில் துணைநிலை ஆளுநர் அவர்கள் உரை நிகழ்த்துவதற்கு முன்பாகவே, அவையின் தொடக்க நிகழ்வாகத் தமிழ்த்தாய் வாழ்த்து பாடப்படுவதை உறுதிசெய்து, அதற்குரிய ஆணை பிறப்பிக்குமாறு சட்டமன்ற எதிர்க்கட்சித் தலைவர் என்ற முறையில் தங்களைக் கேட்டுக்கொள்கிறேன்.