சென்னை, ஆக.18 –
சென்னை கலைவாணர் அரங்கத்தில், மறைந்த இயக்குனர்கள் பாரதிராஜா மற்றும் கே.பாக்யராஜ் ஆகியோரின் நினைவாக, ‘ராஜகோபுரங்களின் நினைவு உற்சவம்’ என்ற பிரம்மாண்ட விழா நேற்று முன்தினம் நடைபெற்றது. இந்நிகழ்ச்சியில், கழக இளைஞர் அணிச் செயலாளரும் சட்டப்பேரவை எதிர்க்கட்சித் தலைவருமான உதயநிதி ஸ்டாலின் பங்கேற்று புகழுரை யாற்றினார். விழாவில் திரையுலகைச் சேர்ந்த பிரபலங்கள் பலரும் கலந்துகொண்டு புகழ்மாலை சூட்டினர்.
கழக இளைஞர் அணிச் செயலாளரும் சட்டப்பேரவை எதிர்க்கட்சிச் தலைவருமான உதயநிதி ஸ்டாலின் ஆற்றிய உரை வருமாறு:–
‘திரைக்கதை மன்னன்’ பாக்யராஜ் சார், `இயக்குனர் இமயம்’ திரு பாரதிராஜா சார் ஆகியோரின் நினைவைப் போற்றுகின்ற வகையில், இந்த நிகழ்ச்சி மிகவும் உணர்வுப்பூர்வமாக இன்றைக்குக் காலையில் தொடங்கி இரவு வரை நடைபெற்று வருகின்றது. அவர்கள் இரண்டு பேர் மீதும் நமக்கு இருக்கக்கூடிய அன்பு மற்றும் மரியாதையின் வெளிப்பாடாகத்தான், இன்றைக்கு இந்த நிகழ்ச்சி இவ்வளவு சிறப்பாக ஏற்பாடு செய்யப்பட்டிருக்கிறது.
உங்களில் ஒருவன்
இன்றைக்குக் காலையில் ‘கலைஞானி’ கமல் சார் அவர்கள் இந்த நிகழ்ச்சியைத் தொடங்கி வைத்திருக்கிறார்கள். இதன் பிறகு, இன்றிரவு சூப்பர் ஸ்டார் ரஜினி சார் அவர்கள் இந்த நிகழ்ச்சியில் நிறைவுரையாற்ற இருக்கிறார். இன்றைக்கு ஒட்டுமொத்த திரையுலகமும் திரண்டிருக்கின்ற இந்த நினைவுகூர்கின்ற நிகழ்ச்சியில், நான் பங்கேற்கின்ற வாய்ப்பைக் கொடுத்தமைக்கு நான் மீண்டும் என் நன்றியைத் தெரிவித்துக் கொள்கின்றேன்.
இந்த நிகழ்ச்சியில் நானும் உங்களில் ஒருவனாக, இந்தத் திரைத் துறையில் ஒரு சில நாட்கள் பணிபுரிந்த ஒருவனாக அந்த உரிமையுடன் நான் கலந்து கொண்டிருக்கிறேன்.
இயக்குனர் இமயம் பாரதிராஜா
தமிழ் சினிமாவைப் பொறுத்தவரைக்கும், அது பல்வேறு காலகட்டங்களில் பல்வேறு வடிவங்களாக மாறிக்கொண்டே இருந்தது. பேரறிஞர் அண்ணா, முத்தமிழறிஞர் கலைஞர் அவர்கள், தங்களின் திரைக்கதை வசனம் மூலமாக தமிழ் சினிமாவின் போக்கையே மாற்றிக் காட்டினார்கள். அவர்களின் வரிசையில் சினிமாவின் மொழியை எல்லோருக்குமானது என்று ஆக்கியவர்கள், அதை இன்னும் அடுத்த கட்டத்துக்கு எடுத்துக்கொண்டு சென்ற இரண்டு பேர்தான் பாரதிராஜா சார் அவர்களும், பாக்யராஜ் சார் அவர்களும்.
பாரதிராஜா சார் அவர்களைப் பொறுத்தவரைக்கும், அவர்தான் முதன்முதலில் கேமராவை கிராமங்களுக்கும் வயல்வெளிக்கும் எடுத்துக்கொண்டு சென்றவர். குறிப்பாக, அவருடைய ‘வேதம் புதிது’ திரைப்படத்தில், திராவிட இயக்கத்தின் கொள்கையான சாதி ஒழிப்பையும், சமூக நீதியையும் உரக்கப் பேசினார். எனக்கு சின்ன வயதிலிருந்து திரு பாரதிராஜா அவர்களை நன்றாகத் தெரியும். பல பேருக்கு அது தெரியாது. அதற்குக் காரணம், அவர் மகன் மறைந்த மனோஜ் அவர்கள். மனோஜ் அவர்கள் என் பள்ளிக்கூட நண்பர். டான் பாஸ்கோ பள்ளியில் நானும் மனோஜ் அவர்களும் கிட்டத்தட்ட மூன்று வருடங்கள் ஒன்றாகப் படித்தோம், வகுப்பறை நண்பர்கள் (Classmates).
இன்றைக்கு மனோஜ் அவர்களும் நம்மோடு இல்லை, பாரதிராஜா சார் அவர்களும் நம்மோடு இல்லை. அவர்கள் விட்டுச் சென்ற நினைவுகள் என்றுமே நம் மனதில் நிலையாக இருக்கின்றன. கலைஞர் அவர்கள் மீது பாரதிராஜா சார் அவர்களுக்கு மிகப்பெரிய அன்பும் பாசமும் உண்டு. கலைஞர் அவர்களும் பாரதிராஜா சாருடைய படைப்புகளை மிகவும் ரசித்துப் பார்த்திருக்கிறார்கள், பாராட்டி இருக்கிறார்கள். எங்களுடைய கழகத் தலைவர் அவர்களும் அப்படித்தான்.
2022-இல் பாரதிராஜா சார் மருத்துவமனையில் சிகிச்சை முடித்து வீடு திரும்பியிருந்த சமயத்தில், அன்றைக்கு முதலமைச்சராக இருந்த எங்கள் தலைவர் அவர்கள், சாருடைய வீட்டிற்கே சென்று அவரிடம் நலம் விசாரித்தார்கள். தமிழ் சினிமாவின் போக்கை மாற்றியது மட்டுமில்லாமல், தமிழ் சினிமாவை இந்திய சினிமாவுக்கான உலக அடையாளமாக ஆக்கியவர்தான் திரு பாரதிராஜா சார். அவருடைய மறைவு இந்திய திரையுலகிற்கே ஒரு மிகப்பெரிய பேரிழப்பு.
திரைக்கதை மன்னன் கே.பாக்யராஜ்
அதேபோலத்தான் கே.பாக்யராஜ் சார் அவர்களும். பாரதிராஜா சாருடைய சீடராகத் தன்னுடைய திரைப்படப் பணிகளைத் தொடங்கி, ‘திரைக்கதை மன்னன்’ என்று இந்தியா முழுவதும் பாராட்டைப் பெற்றவர்தான் திரு பாக்யராஜ் சார் அவர்கள். பாக்யராஜ் சாருடைய படங்கள் நடுத்தர வர்க்க மக்களின் வாழ்க்கையை அப்படியே சினிமாவில் பார்க்கின்ற மாதிரி ஒரு உணர்வை அனைவருக்கும் ஏற்படுத்தியது. அதுமட்டுமில்லாமல், யாருமே பேசத் தயங்குகின்ற சப்ஜெக்டை எல்லாம் மிகவும் சுவாரசியமாக, யாரும் முகம் சுளிக்காதவாறு அனைவரும் ரசிக்கும்படி சினிமாவில் பேசியவர் பாக்யராஜ் சார் அவர்கள்.
திரைக்கதை, இயக்கம், நடிப்பு, இசை, தயாரிப்பு என்று எல்லா துறைகளிலும் பாக்யராஜ் சார் தன் திறமையைக் காட்டியவர். அதுமட்டுமில்லாமல், ஒரு சிறந்த பத்திரிகையாளராகவும் எழுத்தாளராகவும் தனிமுத்திரையைப் பதித்தார்.
பாக்யராஜ் சார் முன்னாள் முதலமைச்சர் எம்.ஜி.ஆர் அவர்களுக்குத்தான் மிகவும் நெருக்கம் என்று பல பேருக்குத் தெரியும். ஆனால், பாக்யராஜ் சார் எம்.ஜி.ஆர் அவர்களுக்கு மட்டுமல்ல, டாக்டர் கலைஞர் அவர்களுக்கும் மிகுந்த நெருக்கமான பழக்கம் உடையவர். அதனால்தான் எம்.ஜி.ஆர் அவர்களின் மறைவுக்குப் பிறகு, கலைஞர் அவர்களைத் தன்னுடைய தலைவராக ஏற்றுக்கொண்டு, திராவிட முன்னேற்றக் கழகத்தில் இணைந்து பணியாற்றினார்.
ஒரு கட்டத்திற்குப் பிறகு அரசியலிலிருந்து விலகியிருந்தாலும்,எங்களுடைய தலைவர் அவர்களிடம் எப்பொழுதும் அதே பாசத்துடன் பழகியவர் பாக்யராஜ் சார் அவர்கள். பாக்யராஜ் சார் அவர்களுக்கு சமீபத்தில், இதே அரங்கத்தில் 50-ஆம் ஆண்டு விழா எடுத்தபொழுது, எங்கள் தலைவர் அவர்கள் கலந்துகொண்டு பாக்யராஜ் சாரைப் பாராட்டிப் பேசினார். அப்படிப்பட்டநம்முடைய `திரைக்கதை மன்னன்’ பாக்யராஜ் சாருடைய கலைப்பயணம் என்றைக்கும் நம் அத்தனை பேர்களின் மனதிலும் நிலைத்து நிற்கும்.
மாபெரும் திரை ஆளுமைகள்
‘இயக்குனர் இமயம்’ பாரதிராஜா சார், ‘திரைக்கதை மன்னன்’ பாக்யராஜ் சார் என்கின்ற இந்த இரண்டு மாபெரும் திரை ஆளுமைகள் நேற்றைக்கு, இன்றைக்கு மட்டுமல்ல, என்றைக்குமே தமிழ் சினிமாவின் அடையாளமாக நிச்சயம் திகழ்வார்கள். அவர்களுடைய புகழைப் போற்றுவோம் என்று சொல்லி, இந்த வாய்ப்புக்கு நன்றி கூறி விடைபெறுகிறேன்.
இவ்வாறு கழக இளைஞர் அணிச் செயலாளரும் சட்டப்பேரவை எதிர்க்கட்சித் தலைவருமான உதயநிதி ஸ்டாலின் உரையாற்றினார்.