மன்னர்மா மன்னர்தம் அரண்மனை மாடத்தில்
மகனாய்நீ தோன்ற வில்லை!
மாணிக்கத் தொட்டிலில் தாலாட்டுக் கேட்டுநீ
மணிவிழி மூட வில்லை!
தென்னவர் குலம்போற்றும் இசைவாணர் குடும்பத்தில்
செல்வமே பிறந்து வந்தாய்!
சேயான நாள்முதல் "தாய்மாமன்" தோளிலே
சிட்டுப்போல் தவழ்ந்து வந்தாய்!
பொன்மேனி வாடாமல் உன்னைத்தன் நெஞ்சுக்குள்
பொத்தியே அவர்வ வளர்த்தார்!
புகழ்மாலை சூடிநீ உலகத்தை வலம்வரப்
பொழுதெலாம் "கனா"வ ளர்த்தார்!
கன்னலில் கனிச்சாற்றில் மூழ்கிடும் வண்டுபோல்
கல்வியில் திளைக்க வைத்தார்!
"கண்ணா!நீ வாழ்க!"என அண்ணாவே உனைத்தேர்தல்
களத்திலே குதிக்க வைத்தார்!
எய்தாய்நீ இலக்கினை! வடக்குநம் தெற்கினை
ஏற்குமோர் வழிவ குத்தாய்!
ஏடாளும் வேந்தனாய் நாடாளு மன்றத்தில்
இலக்கணம் நீப டைத்தாய்!
மையத்தில் குவிந்துள்ள அதிகாரம் பற்றிநீ
மகத்தான நூல்வ டித்தாய்!
"மாநில சுயாட்சி"யின் உள்ளார்ந்த மாண்பினை
மாற்றாரும் உணர வைத்தாய்!
வையத்தில் வளர்ந்துவரும் நாடுகள் சார்பிலே
வாதாடி வெற்றி பெற்றாய்!
வாகான உரையினால் "தோகா"வின் மாநாட்டு
வரலாற்றில் நிலைத்து விட்டாய்!
செய்தக்கச் செய்கின்ற சான்றாண்மை மிக்கநின்
சீர்த்தியால் கீர்த்தி பெற்றாய்!
"திருவாரூர் மண்வாசம், திருக்குவளை மலர்வாசம்"
திக்கெட்டும் கமழச் செய்தாய்!
தந்தை,தாய் வழிவந்த அன்பன்றோ! "உன்மாமன்"
தமிழ்தந்த அறிவும் அன்றோ!
" தாத்தாவும் பாட்டியும்" வீரத்தை ஈர்த்தைத்
தரவந்தப் பொலிவும் அன்றோ!
சிந்தனை நெற்றியின் மடிப்புகள் ஒவ்வொன்றும்
செயலுக்கு வியூகம் அன்றோ!
சிங்கம்நிகர் நடைகாணக் கண்கோடி வேண்டுமே!
" திராவிடத் தீரம்" அன்றோ!
சந்தன நிறமன்றோ! தங்கத்தின் ஒளியன்றோ!
தனிஎழில் வதனம் அன்றோ!
" தலைவகிடு" அதில்கூடத் தலைவனைப் பின்பற்றும்
தலைமுடி அழகும் அன்றோ!
சுந்தரம் என்றாலே அழகென்று பொருள்என்று
சொல்வார்கள்! "தியாக ராஜ
சுந்தரம்" நீயன்றோ!அழகுக்கே அழகூட்டச்
சொல்தேவை இல்லை யன்றோ!
கலைஞரின் வளர்ப்புநீ! கலைஞரின் வார்ப்புநீ!
கலைஞரின் "ஞான நகல்"நீ!
கலைஞரை ஆயிரம் கவிஞர்கள் பாடலாம்!
கலைஞரின் பாடு பொருள்நீ!
கலைஞரின் நம்பிக்கை! கலைஞரின் மனசாட்சி!
கலைஞரின் மூளை பலம்நீ!
கடல்போலப் படைநூறு வந்தாலும் கலைஞர்க்குக்
களத்திலே யானை பலம்நீ!
அலையில்நீர்க் குமிழிபோல் இடையில்நீ பிரிந்ததை
அன்றாடம் எண்ணு கின்றோம்!
அருகில்நீ இல்லாத கலைஞரைப் பார்க்க,மனம்
ஆற்றாமல் விம்மி நின்றோம்!
சிலைமுன்னம் நின்றுநின் புகழ்வாழ்க! என்றுமனம்
சிலிர்த்தெழ முழங்கு கின்றோம்!
"சிறந்தநாள்! தமிழர்க்குன் பிறந்தநாள்!" என்றுன்னைச்
சிரம்தாழ்த்தி வணங்கு கின்றோம்!