மதுரை, ஆக. 18 –
மதுரையில் விசார ணைக்காக அழைத்துச் செல்லப்பட்ட நபர் காவல்துறையால் தாக்கப்பட்டதில், பலத்த காயங்களுடன் மருத்துவமனையில் அனுமதிக்கப்பட்டவர், சிகிச்சை பலனின்றி உயிரிழந்தார். தனது உயிருக்கு ஆபத்து ஏற்பட்டால், அதற்கு முழு காரணமும் காவல்துறையினர்தான் என மரண வாக்குமூலம் அளித்த வீடியோ வெளியாகி அதிர்ச்சியை ஏற்படுத்தியுள்ளது.
மதுரை விரகனூரில் வீடு அருகே வண்டி நிறுத்து வதில் ஏற்பட்ட சிறிய தகராறில் அய்யம்மாள் மற்றும் அவரது கணவரான பரமசிவத்தை விசாரணை என்ற பெயரில் கடந்த மாதம் 19-ஆம் தேதி காவல் நிலையத்திற்கு அழைத்துச் சென்று, காவல் ஆய்வாளர் விஜயபாஸ்கர், சார்பு ஆய்வாளர் ஜெயக்குமார் மற்றும் காவலர்கள் ஆகியோர் பரமசிவத்தினை கடுமையாக தாக்கியதாகக் கூறப்படுகிறது. மேலும், இச்சம்பவத்தை வெளியில் சொன் னால் கஞ்சா வழக்கு போட்டு சிறையில் அடைத்து விடுவோம் என மிரட்டியதாகவும் குற்றச் சாட்டு எழுந்துள்ளது.
காவல்துறையின் கொடூரத் தாக்குதலால் பரமசிவத்தின் மண்டையில் தீவிர ரத்தக்கசிவு ஏற்பட்டு, மதுரை அரசு ராஜாஜி மருத்துவமனை மற்றும் வேலம்மாள் மருத்துவமனையில் அவசர சிகிச்சைப் பிரிவில் உயிருக்குப் போராடிய நிலையில், நேற்று உயிரிழந்தார். இந்த சம்பவம் பரமசிவத்தின் உறவினர்களிடையே பெரும் அதிர்ச்சியை ஏற்படுத்தி உள்ளது.
காவல்துறை தாக்கிய பிறகு, பரமசிவம் தனது இறப்புக்கு முன்பாக தன்னைத் தாக்கியது காவல் ஆய்வாளர் மற்றும் காவலர்கள் என்றும், இதனால் தனக்கு மண்டைப் பகுதியில் காயம் ஏற்பட்டு உடல்நிலை பாதிக்கப்பட்டு இருப்பதாகவும், தனது உயிருக்கு ஆபத்து ஏற்பட்டால் அதற்கு முழு காரணம் காவல்துறையினரே எனவும் வீடியோ ஒன்றை வெளியிட்டு இருந்தார். இந்த வீடியோ தற்போது சமூக வலைதளத்தில் வைரலாகி அதிர்ச்சியை ஏற்படுத்தியுள்ளது.