#Title

த.வெ.க. அரசின் 100 நாள் ஆட்சியில் ஏதாவது ஒரு சாதனை செய்துள்ளார்கள் என சொல்ல முடியுமா? காட்பாடியில் கழக பொதுச் செயலாளர் – முன்னாள் நீர்வளத்துறை அமைச்சர் துரைமுருகன் பேட்டி!

வேலூர், ஆக.18 –

கர்நாடகாவில் மேகதாது அணையை கட்டினால் தமிழ்நாட்டிற்கு தண்ணீரே வராது என காட்பாடியில் கழக பொதுச் செயலாளர், முன்னாள் நீர்வளத்துறை அமைச்சர் துரைமுருகன் கூறினார்.

தி.மு.க. பொதுச்செயலாளரும், முன்னாள் நீர்வளத்துறை அமைச்சருமான துரைமுருகன் காட்பாடி காந்திநகரில் நிருபர்களுக்கு பேட்டி அளித்தார். அப்போது அவரிடம் நிருபர்கள் கேட்ட கேள்விகளும், அதற்கு அவர் அளித்த பதிலும் வருமாறு;

கேள்வி: கர்நாடகாவில் இருந்து திறக்கப்படும் நீரின் அளவு தமிழகத்திற்கு வரும்போது குறைந்து வருவது குறித்து?

பதில்; கர்நாடக பகுதியில் ஒருவேளை நீர் திருட்டு நடைபெறலாம். இதனை கர்நாடகா அரசுதான் கண்காணித்து நடவடிக்கை எடுக்க வேண்டும். தமிழகத்தை பொறுத்தவரை மாநில எல்லையான பிலிகுண்டுவில் தான் நீரின் அளவை அளப்போம். அதை வைத்துத்தான் நமக்கு எவ்வளவு நீர் வருகிறது என்பதை கணக்கிட முடியும். அந்த வகையில் நமக்கு வரவேண்டிய நீரை அவர்கள் கொடுத்தே ஆக வேண்டும். நீர் திருட்டு குறித்து அவர்கள் தான் நடவடிக்கை எடுக்க வேண்டும். நமக்கு வர வேண்டிய நீரை தமிழக அரசு கேட்டுப் பெற வேண்டும்.

கேள்வி: புதியதாக பொறுப்பேற்றுள்ள த.வெ.க. அரசு 100 நாளை நிறைவு செய்திருக்கிறது. இதை எப்படப் பார்க்கிறீர்கள்?.

பதில்: 100 நாளில் இதை சாதித்தோம் என ஏதாவது ஒன்றை சொல்லச் சொல்லுங்கள். 100 நாளில் இமயமலை அளவுக்கு சாதனை செய்ய முடியாது தான். ஆனால் ஒரு குன்று அளவிற்காவது சாதனை செய்துள்ளோம் என சொல்ல முடியுமா? பேசி கொண்டிருக்கிறார்களே தவிர எந்க் காரியத்திலும் இறங்கவில்லை.

கேள்வி: பா.ஜ.க.,வோடு தி.மு.க. கூட்டணி வைப்பதாக த.வெ.க. கூறுகிறது. ஆனால் அதே த.வெ.க. பா.ஜ.க.வை எதிர்த்து பேசுவதில்லை என எதிர்க்கட்சிகள் கூறுகிறது இது குறித்து?.

பதில்: நாங்கள் தொடர்ந்து சொல்லி வருகிறோம். தி.மு.க.விற்கும் பா.ஜ.க .வுக்கும் எந்த உறவும் இல்லை, ஒட்டும் இல்லை என இதை திட்டவட்டமாக சொல்லி உள்ளோம். ஐடியாலஜி பிரகாரமே எங்களுக்கு ஒத்து வராது. எங்களுடைய கொள்கை, மரபு வேறு. அரசியல் அளவிலாவது உருப்படுமா என்றால் அதுவும் சரியாகப் படவில்லை.

ஒன்றியத்திலும் ஆட்சி மாற்றம் வேண்டும்!

கேள்வி: மல்லிகார்ஜுன கார்கே கலந்து கொண்ட கூட்டத்திற்கு பிறகு பா.ஜ.க.வினர் அந்த இடத்தை பூஜை செய்து தூய்மை செய்தது குறித்து?

பதில்: அந்த பழமைவாதிகள் இன்னும் மாறவில்லை என தெரிகிறது. இவையெல்லாம் மாற வேண்டும் என கேட்டால் மத்தியிலும் சுயமரியாதை உள்ள கட்சி ஆட்சிக்கு வர வேண்டும்.

மேகதாது அணை கட்டினால்?

கேள்வி: 1969இல் நீர்வளத் துறை அமைச்சராக இருந்தவர் தான் காவிரி உரிமையை விட்டுக் கொடுத்ததாக தமிழ்நாடு முதலமைச்சர் குற்றம் சாட்டியிருந்தது குறித்து?

பதில் :காவிரி பிரச்சினையை சுப்ரீம் கோர்ட் தீர்த்து வைத்து விட்டது. அதற்காக கர்நாடகா ஒரு காரணத்தை கற்பித்து வருகிறார்கள். இன்றைக்கு நீங்கள் சொல்கிறீர்கள் 10 டி.எம்.சி வர வேண்டியது தமிழ்நாட்டிற்கு ஏழு டி.எம்.சி.தான் வருகிறது என்று. ஆனால் மேகதாது அணையை கட்டினால் தமிழகத்திற்கு தண்ணீரே வராது. மழைப் பொழிவு உள்ள யாருக்கும் உரிமை கோராத இடத்தில் தான் மேகதாது அணையை கட்ட கர்நாடகா முயற்சிக்கிறது.

டெல்டா பகுதிகள் மிகவும் வறண்டு போகும்!

மேகதாது தமிழ்நாட்டின் உயிர்நாடி பிரச்சினை. மேகதாது கட்டி விட்டால் தமிழ்நாட்டில் பஞ்ச பிழைப்பு தான் பிழைக்க வேண்டும், டெல்டா பகுதிகள் மிகவும் வறண்டு போய்விடும் அதில் எந்த சந்தேகமும் இல்லை.

கேள்வி: நயினார் நாகேந்திரன், முதல்வர்தாய் குறித்து அவ தூறாகப் பேசியது குறித்து?

பதில்: நான் அதை முழுசாக பார்க்கவில்லை. நயினார் நாகேந்திரன் அப்படி பேசுபவர் அல்ல. நிதானமான சுபாவம் கொண்டவர். ஆனால் அவர் சேர்ந்து இருக்கும் இடம் அப்படி இருக்குமா என தெரியவில்லை.

கேள்வி; எம்.ஜி.ஆர். தனது இறுதிகாலத்தில் அ.தி.மு.க.வை தி.மு.க.வுடன் இணைப்பதாக ஏற்கனவே நீங்கள் கூறி இருந்தீர்கள். அ.தி.மு.க. இப்போதுஇருக்கும் நிலையில் எம்.ஜி.ஆர்.இருந்திருந்தால் என்ன நடந்திருக்கும்?

பதில்: எம்.ஜி.ஆர். இருந்திருந்தால் இன்றைக்கு இருக்கும் நிலையில் அ.தி.மு.க. இருந்திருக்காது, எம்.ஜி.ஆர். இல்லாததால் தான் இந்த நிலையில் உள்ளது. எம்.ஜி.ஆர். இறுதக் கட்டத்தில் அந்த நிலைக்கு வந்தார். அதுக்கப்புறம் அவர் தனது நிலையை மாற்றிக் கொண்டார். அந்த நிலைப்பாட்டை அவர் எடுத்ததாக பேச்சு வழக்கில் சொன்னது தான். அதைத் தவிர அதற்கு பெரிய ஆதாரம் கிடையாது.

கேள்வி; அ.தி.மு.க.,வில் இருந்து த.வெ.க., கட்சிக்கு செல்வது குறித்து?

பதில்: அது உட்கட்சி விவகாரம். அது குறித்து ஒன்றும் சொல்ல முடியாது. அவர்களுக்குச் சொல்லும் அளவிற்கு நான் பெரிய மனிதன் கிடையாது.

கேள்வி: பெண்கள் குறித்து அவதூறாகப் பேசியதாக எழுந்த விவகாரத்தில் உதயநிதியை நீதி மன்றம் 12 மணி வரை கைது செய்ய தடைவிதித்தும் உடனடியாக கைது செய்யப்பட்டார். அதேபோன்று ஏன் நயினார் நாகேந்திரன் மீது நடவடிக்கை எடுக்கவில்லை?

பதில் :பத்திரிகையாளர்களின் இந்தக் குமுறலை முதல்வர் ஜோசப் விஜய்க்கு அர்ப்பணம் செய்கிறேன். நயினார் நாகேந்திரன் மீது கை வைத்தால் இந்த ஆட்சியை மத்திய அரசு ஒரே நாளில் முடிவுக்குக் கொண்டு வந்து விடும்.

கேள்வி: தமிழகத்தில் சட்டம் ஒழுங்கு எப்படி உள்ளது?

பதில்: இன்றைக்கு பத்திரிகையை புரட்டினால் பக்கத்திற்கு 4 கொலை, பாலியல் பலாத்காரம் என செய்தி வருகிறது. அப்படிப்பட்ட செய்திகள் பத்திரிகையில் நிரம்பி வழிகிறது. இப்படித்தான் சட்டம் ஒழுங்கு உள்ளது. ஆனால் இதைப் பற்றி முதல்வர் அக்கறை கொள்ளவில்லை. இளைஞர் கொலை வழக்கில் கோஷ்டி மோதல் என சொல்கிறார்கள். அது சரியா? யாராக இருந்தாலும் நடவடிக்கை எடுக்க வேண்டும். உதயநிதியை சட்டசபையில் பேசக்கூடாது என்பதற்காக காரண காரியம் இல்லாமல் கைது செய்தார்கள். இளைஞர் கொலை வழக்கில் கோஷ்டி மோதலாக இருந்தாலும் அடித்துக் கொல்வது சரியா? இதுவரை எத்தனை பேரை கைது செய்துள்ளீர்கள்?

காட்பாடியில் அண்மையில் மட்டும் மூன்று கொலை நடந்துள்ளது. நான் எம்.எல்.ஏ.வாக இருந்தபோது 3 கொலை நடந்ததாக சரித்திரமே கிடையாது. ஆகையால் போலீசுக்கு முழு பவர் கொடுத்துள்ளார் கள் என தெரியவில்லை. சட்டம் -ஒழுங்கு என்பது முதல்வர் கையில் இருக்கும். இந்த ஆட்சியில் சட்டம் ஒழுங்கிற்கு சவ அடிக்கு கடைசி அடி அடிக்கப்பட்டது போல் உள்ளது.

இவ்வாறு துரைமுருகன் அவர்கள் கூறினார்.