சென்னை, ஆக. 18–
த.வெ.க. ஆட்சியில் கல்வி நிறுவனங்களில் போதைப் பொருட்களின் பயன்பாடு அதிகரித்துள்ளது. இதற்கு உரிய நடவடிக்கை எடுக்காத இந்த அரசை வன்மையாக கண்டிக்கிறேன் என நாகர்கோவில் சட்டமன்ற உறுப்பினர் எஸ்.ஆஸ்டின் கண்டன அறிக்கையில் தெரிவித்துள்ளார்.
அவரது அறிக்கை வருமாறு:–
தக்கலை அரசு மேல்நிலைப்பள்ளியில் சில மாணவிகள், பள்ளி வளாகத்திலேயே மதுபானம் அருந்தியதாக வெளியாகியுள்ள தகவலும், அது தொடர்பான வீடியோ சமூக வலைதளங்களில் பரவியிருப்பதும் மிகுந்த அதிர்ச்சியையும் கவலையையும் ஏற்படுத்தியுள்ளது.
ஆன்லைனில் மதுபானம் ஆர்டர்
எந்த வகையான சமூக முன்னுதாரணம்!
மாணவர்களின் எதிர்காலத்தை உருவாக்க வேண்டிய பள்ளி வளாகமே இதுபோன்ற சம்பவங்களுக்கு இடமாக மாறியிருப்பது மிகவும் கண்டிக்கத்தக்கது. ஒருபுறம், பள்ளி மாணவர்களிடம் மதுபானம் மற்றும் போதைப்பொருட்களின் தாக்கம் குறித்து அரசு விழிப்புணர்வு ஏற்படுத்த வேண்டிய நிலையில், மறுபுறம் TASMAC மதுபானங்களை ஆன்லைனில் ஆர்டர் செய்து வாங்கும் வசதியை அறிமுகப்படுத்தியிருப்பது எந்த வகையான சமூக முன்னுதாரணத்தை உருவாக்குகிறது என்ற கேள்வி எழுகிறது. தற்போதைய TVK அரசு TASMAC-ல் ஆன்லைன் ஆர்டர் மற்றும் டிஜிட்டல் பணப்பரிவர்த்தனை மூலம் கடையில் பெற்றுக்கொள்ளும் வசதியை அறிமுகப்படுத்தியுள்ளது.
மதுபான விற்பனையை அதிகப்படுத்துவதில் காட்டப்படும் வேகத்தைவிட, மாணவர்களை மதுபானம் மற்றும் போதைப்பொருட்களிலிருந்து பாதுகாப்பதில் அரசு அதிக அக்கறை காட்ட வேண்டும். இதனுடைய தொடர்ச்சி ஆன்லைன் டெலிவரி செயலிகள் (Online Delivery Apps) மூலம் மதுபானங்களை டோர் டெலிவரி செய்யும் நிலைக்கு கொண்டு செல்லும் இது இளைய சமுதாயத்தினர் வாழ்வை மேலும் சீரழித்து விடும். பள்ளிகளைச் சுற்றியுள்ள பகுதிகளில் மதுபானம் மற்றும் போதைப்பொருட்கள் சட்டவிரோதமாக சிறார்க ளுக்கு விற்பனை செய்யப்படுகிறதா என்பது குறித்து காவல்துறையும் சம்பந்தப்பட்ட துறைகளும் தொடர் மற்றும் தீவிர சோதனைகளை மேற்கொள்ள வேண்டும்.
மேலும், இந்தச் சம்பவத்தின் பின்னணி குறித்து முழுமையான விசாரணை நடத்தி, மாணவர்களுக்கு மதுபானம் கிடைக்க காரணமானவர்கள் யாராக இருந்தாலும், அவர்கள் மீது சட்டப்படி கடுமையான நடவடிக்கை எடுக்க வேண்டும். அதே நேரத்தில், மாணவர்களை அவமானப்படுத்துவதோ அல்லது சமூக வலைதளங்களில் அவர்களின் அடையாளத்தை வெளிப்படுத்துவதோ கூடாது. அவர்களுக்கு தேவையானஆலோசனை, விழிப்புணர்வுமற்றும் உளவியல் வழிகாட்டுதலை வழங்குவதும் அரசின் கடமையாகும்.
போதைப் பொருள் தடுப்பு சிறப்புப்
பிரிவு என்ன ஆனது?
மாணவர்களின் எதிர்காலத்தை பாதுகாப்பதே அரசின் முதல் கடமை. பள்ளிகள் கல்விக்கூடங்களாக இருக்க வேண்டும். மதுவுக்கும் போதைக்கும் இடமாக மாறக்கூடாது. த.வெ.க. ஆட்சியில் கல்வி நிறுவனங்களில் போதைப் பொருட்களின் பயன்பாடு அதிகரித்துள்ளது. வன்மையாக இதற்கு உரிய நடவடிக்கை எடுக்காத இந்த அரசை கண்டிக்கிறேன்.
முதலமைச்சர் ஆட்சிப் பொறுப்பேற்றுடன் கையெழுத்திட்ட மூன்று அறிவிப்புகளில் ஒன்றான போதைப் பொருள் தடுப்பு சிறப்பு பிரிவு என்ன ஆனது? அது செயலிழந்திருப்பதையே இதுபோன்ற சம்பவங்கள் உணர்த்துகிறது.இந்த விவகாரத்தில் தமிழக அரசு உடனடியாக தலையிட்டு, பள்ளி மாணவர்களின் பாதுகாப்பிற்கும் போதைப்பொருள் தடுப்பிற்கும் கடுமையான மற்றும் நிரந்தர நடவடிக்கைகளை மேற்கொள்ள வேண்டும் என்று கேட்டுக் கொள்கிறேன்.
இவ்வாறு எஸ்.ஆஸ்டின் எம்.எல்.ஏ. தமது அறிக்கையில்தெரிவித்துள்ளார்.