தஞ்சை, ஆக.18
பாரத ஸ்டேட் பேங்க் முன்னாள் தொழிற்சங்க தலைவர்களின் கூட்டமைப்பின் பத்தாவது பொதுக்குழு கூட்டம் தஞ்சாவூர் அகில இந்திய இன்சூரன்ஸ் ஊழியர் சங்க மாளிகை, சரோஜ் நினைவகத்தின், என். எம்.சுந்தரம் அரங்கில் நடந்தது.
பொதுக்குழு கூட்டத்துக்கு அமைப்பின் தலைவர் எஸ். பி. இராமன் தலைமை வகித்தார். பாரத ஸ்டேட் பேங்க் ஊழியர் சங்கத்தின் முன்னாள் பொதுச்செயலாளர் டி.சிங்காரவேலு, துணைத்தலைவர் டி.வி.சந்திரசேகரன், துணைச்செயலாளர் எம்.முருகையா, பொருளாளர் என். சுப்பிரமணி யன், உதவிப் பொருளாளர் வீ. பூமிநாதன் ஆகியோர் முன்னிலை வகித்தனர்.
வருகை தந்த அனைவரையும் மதுரை பரவை எஸ்.பாலசுப்பிரமணியன் வரவேற்றார். சென்னை ரத்தினவேல் சுப்பிரமணி நன்றியுரை ஆற்றினார். நீண்ட விவாதங்களுக்கு பிறகு நாட்டின் நலன், வங்கி ஓய்வூதியர்களின் நலன் சார்ந்த கீழ்க்கண்ட தீர்மானங்கள் ஒருமனதாக நிறைவேற்றப்பட்டன.
பொதுத்துறை அமைப்பான எல்.ஐ.சி யின் பங்குகளை விற்பனை செய்யும் தவறான முடிவை ஒன்றிய அரசு தாமதமின்றி திரும்பப் பெற முன் வரவேண்டும்.
பொதுத்துறை வங்கிகளில் வாடிக்கையாளர்களிடம் மினிமம் பேலன்ஸ் வைக்காததற்காக தண்டனையாக பிடித்தம் செய்யப்பட்ட ரூபாய் 26100 கோடியை திரும்ப அளிப்பதோடு, இத்தகைய தவறான நடைமுறையை தாமதமின்றி கைவிட பொதுத்துறை வங்கிகளுக்கு ஒன்றிய அரசு அறிவுறுத்த வேண்டும். வங்கி ஓய்வூதியவர்களுக்கு பஞ்சப்படி உயர்வை மூன்று மாதங்களுக்கு ஒரு முறை வழங்கும் நடைமுறையை தாமதமின்றி நடைமுறைப்படுத்த பொதுத்துறை வங்கி நிர்வாகங்கள் முன்வர வேண்டும்.
பென்சன் மறுபரிசீலனை செய்யாமல் (PENSION UPDATION) கடந்தமுப்பது ஆண்டுகளாக பாதிப்படைந்து வருகிற எட்டு லட்சம் வங்கி ஓய்வூதியர்களுக்கு தாமதமின்றி நீதி வழங்க பொதுத்துறை வங்கிகள் நிர்வாகம் முன்வரவேண்டும்
கடந்த 1995ஆம் ஆண்டு கையெழுத்தாகி, 2003 ஆம் ஆண்டு நாடாளுமன்றத்தில் ஒப்புதல் வழங்கப்பட்ட சட்டத்தின் படி, ரிசர்வ் வங்கி, நபார்டு வங்கி ஆகியவற்றுக்கு அளிக்கப்படுவதைப் போல ஒவ்வொரு வங்கித்துறை ஊதிய ஒப்பந்தத்தின் போதும் ஓய்வூதியம் மறுபரிசீலனை செய்யப்பட்டு உயர்த்தி வழங்கப்பட வேண்டும். கடந்த ஐந்து ஆண்டுகளில் பொதுத்துறை வங்கிகள் நிகர இலாபமாக 689000 கோடிஈட்டி ஒன்றிய அரசுக்கு வழங்கி உள்ளது.
கடந்த நிதி ஆண்டின் இறுதியில் பொதுத்துறை வங்கி ஊழியர்கள் செலுத்திய பென்சன் தொகை 486000 கோடியாகும். கடந்த ஆண்டுகளில் நாட்டின் வளர்ச்சிக்காகவும் சமுதாய மேம்பாட்டிற்காகவும் பசி நோக்காது கண் துஞ்சாது உழைத்த எட்டு லட்சம் வங்கி ஓய்வூதியர்களுக்கு சட்டப்படி வழங்கப்படவேண்டிய ஓய்வூதிய மறுசீரமைப்பை வழங்காமல் வஞ்சிப்பதும், நீதிமன்றத்தின் நெடிய படிக்கட்டுகளில் ஏறி இறங்கும் சூழலை உருவாக்கி, காரணம் இன்றி கால தாமதம் செய்யாமல் 1995 ஆம் ஆண்டு முதல் 2026 ஆம் ஆண்டு வரை ஓய்வூதியத்தை உயர்த்தி மறுசீரமைத்து, ரிசர்வ் வங்கியின் விகிதப்படி எட்டு லட்சம் வங்கி ஓய்வூதியர்களுக்கு தாமதமின்றி நீதி வழங்கி பொதுத்துறை வங்கிகளும், இந்திய வங்கிகள் நிர்வாகமும், ஒன்றிய அரசும் நல்ல முடிவை அறிவிக்க வேண்டுமென AFCCOM வலியுறுத்தி கேட்டுக்கொள்கிறது.
மூத்த குடிமக்கள் அனைவருக்கும் மற்ற மாநிலங்களில் வழங்கப்படுவதைப் போல இலவச பேருந்து பயண வசதி அளிக்க தமிழக அரசு முன்வரவேண்டும்
அண்டை மாநிலங்களான மஹாராஷ்ட்ரா, ஹரியானா, நாகாலாந்து ஆகிய மாநிலங்களில் மூத்த குடிமக்களுக்கு இலவச பேருந்து பயண வசதி வழங்கப்பட்டு வருகிறது. கர்நாடகா, கேரளா, ஆந்திரா, தெலுங்கானா, மேற்கு வங்கம் ஆகிய மாநிலங்களில் மூத்த குடிமக்களுக்கு 25 சதவிகிதம் முதல் 50 சதவிகிதம் வரை பேருந்து பயண கட்டண சலுகை வழங்கப்பட்டு வருகிறது. பல்வேறு துறைகளில் முன்னேற்ற தடம் பதித்து வரும் தமிழ்நாட்டில் மூத்த குடிமக்களுக்கு இலவச பேருந்து பயண சலுகை வழங்குவது அவர்கள் வாழ்நாளில் நாட்டின் வளர்ச்சி மற்றும் முன்னேற்றத்துக்கு ஆற்றிய ஆக்கப்பூர்வமான பங்கை அங்கீகரிப்பதாக அமைவதோடு அரசின் மீது பொது மக்களுக்கு நல்லெண்ணத்தை உருவாக்குவதாக அமையும் என்பதை கருத்தில் கொண்டு செயல் படுத்த தமிழக அரசு முன் வரவேண்டும் என AFCCoM வலியுறுத்தி கேட்டுக் கொள்கிறது.
பங்கேற்றோர்
பொதுக்குழுவில் நிர்வாகக்குழு உறுப்பினர்கள் எம்.சந்திரா கில்பர்ட், என்.பாண்டுரங்கன், பாண்டிச்சேரி எஸ்.கருணாகரன், கோவை எம்.ரகுநாதன், வேலூர் ஆர்.லோகநாதன், குன்னூர் எம்.ராஜகோபால், நாகர்கோயில் அஹமது ஹுசைன், செயலாளர் எம். கே. மூர்த்தி உள்ளிட்ட பலர் கலந்து கொண்டனர், ஒரத்தநாடு ஸ்டேட் பேங்க் ஸ்டாப் யூனியன் முன்னாள் கிளைச் செயலாளர் வி.சம்பத் பொதுக்குழுவுக்கான ஏற்பாடுகளை செய்திருந்தார்.