புதுடெல்லி, ஆக.19 –
ஆன்லைன் மருந்து வர்த்தகத்தில் மருந்துகளை ஒழுங்குபடுத்துவதற்கான கொள்கைகளை செயல்படுத்த வேண்டும் என்று மாநிலங்களவையில் கழக உறுப்பினர் கே.ஆர்.என்.இராஜேஷ்குமார் வலியுறுத்தினார்.
டெல்லியில் நடைபெற்ற பாராளுமன்ற மாநிலங்களவை மழைக்கால கூட்டத் தொடர் கூட்டத்தில் நாமக்கல் கிழக்கு மாவட்ட கழக செயலாளரும், மாநிலங்களவை உறுப்பினருமான கே.ஆர்.என்.இராஜேஸ்குமார் கலந்து கொண்டு ஆன்லைன் மருந்து வர்த்தகத்தில் பொதுமக்களுக்கு ஏற்படும் பாதிப்பு குறித்து சிறப்பு கவன ஈர்ப்பு நேரத்தில் பேசியதாவது:–
ஆன்லைன் மருந்து விற்பனை வணிக இணைய தளங்களால் மருந்துச்சீட்டு இல்லாமல் ஒழுங்குபடுத்தப்படாத இணையவழி மருந்து விற்பனை ஆகும். ஆன்லைன் மருந்தகங்கள் பாதுகாப்பான இணையவழி மருந்து விற்பனையை உறுதி செய்வதற்கான ஒழுங்குமுறை கட்டமைப்பு மற்றும் உள்கட்டமைப்பு தேவை.
கோவிட்–19 பெருந்தொற்றின் போது, டிஜிட்டல் தொழில்நுட்பத்தின் மீதான நமது சார்பு நிலைஅதிகரித்தது, மேலும் இந்தப் போக்கு தொடர்கிறது. இருப்பினும், இது பொது சுகாதாரத்திற்கு ஒரு குறிப்பிடத்தக்க ஆபத்தை ஏற்படுத்தியுள்ளது.
ஏனெனில் சரிபார்க்கப்படாத இணையவழி மருந்துவிற்பனையானது லட்சக்கணக்கான உயிர்களுக்கு அச்சுறுத்தலாக உள்ளது.
மேலும், மக்கள் மருந்துகளை வாங்குவதற்கு சரிபார்க்கப்படாத இணையவழித் தகவல்களை நம்புவது, இந்தப் பிரச்சினையை மேலும் சிக்கலாக்குகிறது. முறையான மருந்துச்சீட்டுகள் இருந்தாலும், உள்கட்டமைப்பு மற்றும் கொள்கைகள் இல்லாததால் இணையவழி மருந்துகளைச் சரிபார்க்க முடிவதில்லை.
எனவே, இந்தப் பிரச்சினையை முழுமையாக ஆராய்ந்து, ஆன்லைன்- மருந்தகங்களை ஒழுங்குபடுத்துவதற்கான கொள்கைகளைச் செயல்படுத்து வதைக் கருத்தில் கொள்ளுமாறு ஒன்றிய சுகாதாரம் மற்றும் குடும்ப நலத்துறை அமைச்சரை நான் கேட்டுக்கொள்கிறேன்.
கூடுதலாக, மின்னணு மருந்துச்சீட்டு சேவைகளுக்குத் தேவையான உள்கட்டமைப்பை நிறுவுவ தும், ஆன்லைன்-மருந்தகங்களின் முறையான செயல்பாட்டை உறுதி செய்வதற்கான விதிமுறைகளை இயற்றுவதும் மிக அவசியமாகிறது. நாம் பொதுப் பாதுகாப்பை உறுதிசெய்து, ஒழுங்குபடுத்தப்படாத இணையவழி மருந்து விற்பனையால் ஏற்படக்கூடிய தீங்குகளைத் தடுக்க வேண்டும்.
இவ்வாறு அவர் பேசினார்.