தஞ்சாவூர், ஆக.20–
தஞ்சாவூர் மாமன்ற கூட்டம் நேற்று நடைபெற்றது. கூட்டத்தில் சிறப்பு அழைப்பாளராக கலந்து கொண்ட மாநிலங்களவை உறுப்பினர் எஸ்.கல்யாணசுந்தரம் பேசுகையில்; மக்கள் பணியே மகேசன் பணி. நாம் அனைவரும் மக்களுக்காக பணியாற்ற வந்துள்ளோம். எம்.பி., எம்.எல்.ஏ., அமைச்சர் ஆகியோரால் கூட செய்ய முடியாத மக்கள் பணிகளை மக்களுடன் நெருங்கி இணைந்துள்ள உள்ளாட்சி அமைப்பு பிரதிநிதிகள் மேற்கொண்டு சாதனை படைக்க முடியும். ஏனெனில் நானும் உள்ளாட்சி அமைப்புகளில் பொறுப்பு வகித்து பணியாற்றி உள்ளேன்.
ரூ.ஆயிரம் கோடி ஸ்மார்ட் சிட்டி திட்டத்தில் நிதி பெற்று உள்ள மாநகராட்சியே இப்படி இருக்கிறது என்றால் எந்த நிதி உதவியும் பெறாத மாநகராட்சி எப்படி இருக்கும் என்பதை சிந்தித்து பார்க்க வேண்டும். நான் இந்த கூட்டத்தை கவனித்த போது விந்தையாக உள்ளது. தீர்மானங்கள் அனைத்தும் ஒப்பந்த பணியாகவேஉள்ளது. சென்ற கூட்டத்தில் மாமன்ற உறுப்பினர்கள் வைத்த கோரிக்கைகள், எழுப்பிய கேள்விகள் இந்த தீர்மானத்தில் கொண்டு வந்து அதற்காக காணப்பட்ட தீர்வு, நடவடிக்கை குறித்து குறிப்பிடப்பட வேண்டும். உறுப்பினர்கள் ஒரு வாரத்திற்கு முன்னதாகவே தங்களது கோரிக்கையை மனுவாக அளித்தால் அதிகாரிகள் அதற்குரிய நடவடிக்கைகளை எடுத்து அதற்குரிய பதிலை விளக்கமாக அளிக்க ஏதுவாக இருக்கும். அதற்கான வாய்ப்புகளை உருவாக்க வேண்டும்.
மாநகராட்சி வரவுகளையும் செலவுகளையும் உறுப்பினர்கள் முழுமையாக அறிந்து கொள்ள வேண்டும். மாமன்ற உறுப்பினர்கள் பிறருக்கு முன் மாதிரி யாக இருக்க வேண்டும். ஆலோசனை கூறுவது அதிகாரிகளின் பணி. ஆனால் அதை முடிவெடுத்து செயல்பாட்டுக்கு கொண்டு வருவது மாமன்ற உறுப்பினர்கள். மாமன்ற உறுப்பினர்கள் அனுமதித்தால் மட்டுமே எந்த பணியும் நடக்கும். அவ் வாறு இருக்கையில் மாமன்ற உறுப்பினர்கள்மாமன்றத்தில் ஒரு பொருள் வைக்கும் போது அதை குறித்து முழுமையான புரிதல் இருக்க வேண்டும்.
அப்போது தான் அதை அனுமதிப்பதா, இல்லையா என்பதை முடிவு செய்ய முடியும், குஜராத்தில் கிராம ஊராட்சியில் குப்பைகளை எரித்து மின்சா ரம் தயாரித்து அதை அரசுக்கு விற்பனை செய்கிறார்கள். அது போல் நமது மாநகராட்சியிலும் செய்வதற்கு நடவடிக்கை எடுக்க முடியும்.
இவ்வாறு தஞ்சை மாநகராட்சி மாமன்ற உறுப்பினர்கள் கூட்டத்தில் சு.கல்யாணசுந்தரம் எம்.பி உரையாற்றினார்.