புதுடெல்லி, ஆக.20–
நீட் தேர்வில் நடைபெறும் தொடர் மோசடிகளுக்கு எதிராக அகில இந்திய மருத்துவர்கள் கூட்ட மைப்பு தொடர்ந்தவழக்கு உச்ச நீதிமன்றத்தில் இன்று மீண்டும் விசாரணைக்கு வந்தது. அப்போது நீட் மோசடியை தடுக்க போதுமான நடவடிக்கை எடுக்கப்பட்டுள்ளதாக ஒன்றிய அரசின் சொலிசிட்டர் ஜெனரல் தெரிவித்தார். அதனை ஏற்க உச்ச நீதிமன்றம் மறுத்துவிட்டது. உச்ச நீதிமன்ற உத்தரவுபடி அமைக்கப்பட்ட ராதாகிருஷ்ணன் குழுவின் பரிந்துரைகளை இதுவரை ஏன் செயல்படுத்தவில்லை? தேர்வு நடைமுறையில் பல குறைபாடுகள் உள்ளது, தேசிய தேர்வு முகமையின் செயல்பாடு போதுமானதாக இல்லை என்று அறிக்கையில் தெரிவிக்கப்பட்டுள்ளது, அதனை ஏன் இன்னும் சரிசெய்யவில்லை? என்று நீதிபதிகள் சரமாரியாக கேள்வி எழுப்பினர். தேசிய தேர்வுமுகமைக்கு நிரந்தர அதிகாரிகள் நியமிக்கப்பட வேண்டும், அதனை வலுவான நிறுவனமாக முதலில் மாற்ற வேண்டும் என்று உச்சநீதிமன்றம் தெரிவித்தது. ஒரு குழுவின் பரிந்துரையை இதுவரை செயல்படுத்தாமல் தற்போது புதியகுழு அமைக்கப்பட்டுள்ளது,முந்தைய குழுவின் பரிந்துரையை புதிய குழு ஆய்வு செய்து அதனையும் சேர்த்து செயல்படுத்த வேண்டும் என்று உச்ச நீதிமன்றம் தெரிவித்தது. நீட் கேள்விகளை AI மூலம் மொழிபெயர்ப்பு செய்தது தவறான நடைமுறை என்றும் மொழி பெயர்ப்புக்கு ஏ.ஐ தொழில் நுட்பத்தை நம்ப முடியாது என்றும் உச்சநீதிமன்ற நீதிபதிகள் தெரிவித்தனர். பின்னர், நீட் தேர்வு நடைமுறையை மேம்படுத்துவதற்கு என்ன நடவடிக்கைகள் இதுவரை எடுக்கப்பட்டுள்ளது என்பது குறித்து ஒன்றிய கல்வித்துறை பிரமாண பத்திரம் தாக்கல் செய்ய உச்ச நீதிமன்றம் உத்தரவிட்டு, வழக்கை ஒத்திவைத்தது.