சென்னை, ஆக. 21–
விருதுநகர் மாவட்டம் சிவகாசி மற்றும் சுற்றுவட்டாரப் பகுதிகளிலே இயங்கி வரக்கூடிய சட்டத்திற்கு உட்பட்டு எல்லா விதமான முறையான அனுமதி பெற்று இயங்கி வரக்கூடிய பட்டாசு தொழிற்சாலைகள் மற்றும் விற்பனை இடங்களிலே ‘திடீர் ஆய்வுகள்’ என்கின்ற பெயரில் நடத்தப்படக்கூடிய சோதனைகளின் வாயிலாக அங்கே இருக்கக்கூடிய பட்டாசு தொழில் மிகுந்த பாதிப்புக்குள்ளாகிறது. அது குறித்து அரசு உடனடியாக நடவடிக்கை மேற்கொள்ள வேண்டும். தீபாவளிக்கு முன்னாக அரசு உரிய நடவடிக்கை எடுக்க வேண்டும் என்று கேட்டு சட்டப்பேரவையில் கழக உறுப்பினர் தங்கம் தென்னரசு
ஒரு கவன ஈர்ப்பு தீர்மானத்தைக் கொண்டு வந்தார்.
அதற்குப் பதிலளித்து தொழில்துறை அமைச்சர் கீர்த்தனா பேசினார். அதனைத் தொடர்ந்து தங்கம் தென்னரசு குறிப்பிட்டதாவது:–
தொழில்துறை அமைச்சர் கீர்த்தனா, சிவகாசியில் இருக்கக்கூடிய பட்டாசு தொழிலில் ஈடுபட்டிருக்கக் கூடியவர்கள் எல்லாம் சந்தோஷக் கடலில் மிதந்து கொண்டிருப்பதைப் போன்ற ஒரு மாய பிம்பத்தை உருவாக்க முயற்சிக்கிறார். உள்ளபடியே அங்கு இருக்கக்கூடிய நிலைமை, பட்டாசு தொழில் மிகக் கடுமையாகப் பாதிக்கப்பட்டுள்ளது. இதை நான் அரசியல் காரணங்களுக்காகச் சொல்லவில்லை.
எதிர்க்கட்சியில் இருக்கக்கூடியவர்கள் மக்கள் பிரச்சினைக்காகப் போராடுவது என்பது ஜனநாயகத்திலே எங்களுக்கு இருக்கக்கூடிய உரிமை. நாங்கள் மட்டுமல்ல, நாங்கள் போராட்டம் செய்து முடித்த பின்னர் அந்தப் பகுதியில் இருக்கக்கூடிய பொது அமைப்பைச் சார்ந்தவர்கள் எல்லாம் ஒன்றுகூடி உண்ணாவிரதப் போராட்டத்தையும் முன்னெடுத்தனர். அந்தப் போராட்டத்தில் பொதுவாக இருக்கக்கூடிய எல்லாத் தரப்பினரும், பல்வேறு கட்சியினரும் கலந்து கொண்டுள்ளனர்.
விதிமுறையை மீறி இருக்கக்கூடிய எந்த ஒரு தொழிற்சாலை மீதும் நடவடிக்கை எடுப்பதைக் குறித்து யாருக்கும் ஆட்சேபணை இல்லை. ஆனால் முறைப்படி விதிகளை உட்பட்டு நடக்கக்கூடிய தொழிற்சாலைகளில் ‘ஆய்வு’ என்ற பெயரில் நடக்கக்கூடிய விஷயங்கள், குறிப்பாக சில்லறை விற்பனையாளர்களின் விற்பனை நிலையங்களிலே இன்றைக்கு ‘ஆய்வு’¬¬¬ என்ற பெயரிலே நீங்கள் போய் நடத்தக்கூடிய காரணங்களாலே ஒட்டுமொத்தமாக இந்த பட்டாசு தொழிலில் இன்றைக்கு உற்பத்தி பாதிக்கப்பட்டிருக்கிறது.
அடுத்து மழைக்காலம் வரவுள்ளது, மலை பெய்யத் தொடங்கிவிட்டால் பட்டாசு தொழில் உற்பத்தி நடை
பெறாது. தீபாவளி நெருங்கிக் கொண்டிருக்கிறது.
இப்போது அவர்களுக்கு இருக்கக்கூடிய வாய்ப்பு – இப்போது அவர்கள் உற்பத்தி செய்தால்தான் தீபாவளிக்கு அவர்களாலே பொருட்களைக் கொடுக்க முடியும்.
ஆனால் இந்தச் சூழ்நிலையில் அங்கே அது நடைபெறவில்லை என்பதைத்தான் நான் அரசுக்குக் கவனமாகக் கொண்டு வந்தேனே தவிர இது இந்தத் தொழிலில் ஈடுபட்டுக் கொண்டிருக்கக் கூடிய லட்சக்கணக்கான பட்டாசு தொழிலை நம்பி இருக்கக்கூடிய தொழிலாளர் களுடைய வாழ்வாதாரப் பிரச்சினை என்ற காரணத்திற்காகத் தான் எதிர்க்கட்சிகள் இதற்கான அனைத்து ஜனநாயக வழிகளிலும் சட்டமன்றத்தில் மக்கள் மன்றத்திலும் எடுத்து வைக்கிறோம். இதில் அரசியல் காரணங்கள் எதுவும் இல்லை என்பதை நான் தெளிவுபடுத்த விரும்புகிறேன்.
இவ்வாறு தங்கம் தென்னரசு குறிப்பிட்டார்.