கோவை, ஆக. 21 –
கோவையில் ஒரே நாளில் 3 பேர் படுகொலை செய்யப்பட்ட சம்பவம் பெரும் பரபரப்பை ஏற்படுத்தி உள்ளது. 19 நாளில் 7 கொலைகள் நடைபெற்றுள்ளதால் மக்கள் பீதி அடைந்துள்ளனர்.
கோவை சிங்காநல்லூ ரில் வீட்டில் தனியாக இருந்த முதியவர் அடித்துக் கொலை செய்யப்பட்டார். சிங்காநல்லூரை சேர்ந்த கூலித்தொழிலாளி யான வேலுச்சாமி என்பவர், குடும்பத்தினரை பிரிந்து தனியாக வசித்து வந்தார். இந்த நிலையில், வேலுச்சாமி வீட்டில் இருந்து கடும் துர்நாற்றம் வீசுவதாக அப்பகுதி மக்கள் காவல்துறையினருக்கு தகவல் தெரிவித்தனர். சம்பவ இடத்திற்கு காவல்துறையினர் வந்து பார்த்தபோது, வேலுச்சாமி ரத்த வெள்ளத்தில் சடலமாக கிடந்துள்ளார். கட்டையால் தாக்கி வேலுச்சாமி கொல்லப்பட்டது தெரியவந்தது. இக்கொலை சம்பவம் தொடர்பாக போலீஸார் விசாரணை மேற் கொண்டு வருகின்றனர்.
இதேபோல், சூலூர் அருகே உள்ள செலக்கரச்சல் காந்திநகர் பகுதியில் ஓட்டுநர் அடித்துக் கொலை செய்யப்பட்டுள்ளார். ஓட்டுநர் செந்தில்குமாரின் வீட்டின் அருகில் உள்ள கண்ணன் என்பவர், கண்டபடி வாய்க்கு வந்ததை பேசி சத்தம் போட்டு கொண்டிருந்தார். இதைப்பார்த்த செந்தில்குமார் ஏன் சத்தம் போடுகிறாய்? என கண்ணனை பார்த்து தட்டிக்கேட்டார். இதனால், திடீரென ஆவேசமடைந்த கண்ணன் அருகில் இருந்த மரக்கட்டையை எடுத்து செந்தில்குமாரை சரமாரியாக தாக்கியுள்ளார். இதில் பலத்த காயமடைந்த செந்தில்குமார் சம்பவ இடத்திலேயே சுருண்டு விழுந்து உயிரிழந்தார். இதுகுறித்து வழக்கு பதிவு செய்த போலீசார், கண்ணனை கைது செய்தனர்.
இதனிடையே, கோவை ராமாட்சியம்பாளையம் பகுதியில் டாஸ்மாக் கடையில் ஏற்பட்ட முன்விரோதம் காரணமாக, இளைஞர் ஒருவர் படுகொலை செய்யப்பட்டது அதிர்ச்சியை ஏற்படுத்தி உள்ளது. காரணம்பேட்டை பகுதியில் வசித்து வந்த தேவதாஸ், ஒரு மாதத்திற்கு முன்பு ராமாட்சியம்பாளையம் பகுதியில் உள்ள டாஸ்மாக் கடைக்கு தேவதாஸ் சென்றுள்ளார். அப்போது அங்கு வந்த ரஞ்சித் என்பவருக்கும் தேவதாஸிற்கும் இடையே, வாக்குவாதம் ஏற்பட்டு பின்னர் அது மோதலாக மாறி உள்ளது. இந்நிலையில், அதே ராமாட்சியம்பாளையம் டாஸ்மாக் கடையில் ரஞ்சித் மற்றும் அவரது நண்பர் மது அருந்திக் கொண்டு இருந்த போது, அங்கு வந்த தேவதாஸை ரஞ்சித்தும் அவரது நண்பரும் கவனித்து உள்ளனர்.
சிறிது நேரத்திற்குப் பிறகு தேவதாஸ் டாஸ்மாக் கடையின் பின்புறம் உள்ள நொய்யல் ஆற்றுப் பகுதியை நோக்கித் தனியாக நடந்து சென்று உள்ளார். அப்போது ரஞ்சித் மற்றும் அவரது நண்பரும் தேவதாசை படுகொலை செய்து விட்டு தப்பியோடினர். இருவரையும் காவல்துறையினர் தேடி வருகின்றனர்.
கோவையில் இந்த ஆகஸ்ட் மாதத்தில் மட்டும் பீளமேட்டில் நவீன், கிணத்துக்கடவில் அஸ்வின், பாப்பநாயக்கன்பாளையத்தில் சாந்தி, கோவை தனியார் கல்லூரி மாணவர் அமுதன், நேற்று ஒரே நாளில் 3 பேர் கொலை என பட்டியல் நீண்டு கொண்டே செல்கிறது. கடந்த 19 நாளில் கோவையில் மட்டும் 7 பேர் கொலை சம்பவம் நடைபெறுள்ளது. த.வெ.க. ஆட்சியில் நாளுக்கு நாள் அதிகரிக்கும் கொலை சம்பவங்களால் பொதுமக்கள் அச்ச மடைந்துள்ளனர்.