சென்னை, ஆக. 22 –
“கொசஸ்தலை ஆறு மற்றும் எண்ணூர் கழிமுகத்தை சூழலியல் பாதுகாப்பு மண்டலமாக அறிவித்துப் பாதுகாத்திட வேண்டும்!” என்று, சட்டப் பேரவையில் அரசுக்கு கழக உறுப்பினர் தங்கம் தென்னரசு கோரிக்கை விடுத்தார்.
சட்டப் பேரவையில் இது தொடர்பாகக் கொண்டுவரப்பட்ட கவன ஈர்ப்புத் தீர்மானம் மீதான விவாதத்தில் அவர் பேசியதாவது:
சென்னையைச் சுற்றி இருக்கக்கூடிய பல பகுதிகள் சூழலியல் முக்கியத்துவம் வாய்ந்த பகுதிகளாக இன்றைக்கு இருக்கிறது. குறிப்பாக வடசென்னை பகுதியில் இருக்கக்கூடிய கொசஸ்தலைஆறு, எண்ணூர் கழிமுகம் பகுதியில் என்பது இந்த சென்னை சுற்றுவட்டாரத்தில் இருக்கக்கூடிய நிலப்பரப்பினுடைய ஜீவாதாரமாக விளங்கக்கூடிய பகுதிகள். அது பொதுமக்களுக்காக மட்டுமல்ல பல்வேறு உயிரினங்கள் , பறவைகள், குடும்பங்கள் அதை நம்பி இருக்கக்கூடிய சூழல் உள்ளது.
குறிப்பாக மீனவர்கள் இந்தப் பகுதியிலே அந்தவளங்களை நம்பி இருக்கக்கூடிய நிலையில் தொடர்ந்து அங்கு இருக்கக்கூடிய இந்த ஆறு பல்வேறு காரணங்களாலே மாசுபடக்கூடிய நிலை வருகிறது. அதற்கு குறிப்பாக வடசென்னை பகுதியை தாண்டி இருக்கக்கூடிய எண்ணூர் பகுதிகளிலே ஏற்பட்டிருக்கக் கூடிய பல்வேறு தொழிற்சாலைகள் மணலி போன்று இருக்கக்கூடிய பகுதியில் எண்ணூர் பகுதியில் வந்து இருக்கக் கூடிய தொழிற்சாலைகள் அந்த தொழிற்சாலைக் கழிவுகளில் வரக்கூடிய பிரச்சினைகள். ஏற்கனவே திராவிட முன்னேற்றக் கழக ஆட்சியில் இதுபோல ஒரு எண்ணை கசிவு ஏற்பட்டு அங்கே பிரச்சினை வந்தபோது நம்முடைய எதிர்க்கட்சித் தலைவர் அவர்கள் அன்றைக்கு நம்முடைய அமைச்சராக இருந்த சகோதரர் மெய்யநாதனை உடன் அழைத்துக்கொண்டு அங்குநேரடியாக சென்று அவற்றையெல்லாம் ஆய்வு செய்து அந்த நிவாரணங்களை வழங்கினார்கள். இப்படி ஒரு தொடர்கதை இந்தப் பகுதியிலே இருக்கிறது. அது பெருமளவிலே சூழலில் கேடுபாடுகளை உருவாக்குவதோடு அங்கே எப்போது மீன்கள் செத்து மிதக்கக் கூடிய அளவிற்கு அது அங்கே நம்பி இருக்கக் கூடிய மீனவர்களுடைய வாழ்வாதாரத்தை பாதிக்க கூடிய அளவில், சூழலியல் மொத்தமாக கொடுக்கக்கூடிய வகையில் அமைந்திருக்க கூடிய காரணத்தால் அரசு அதற்கான உடனடியான நடவடிக்கைகளை மேற்கொண்டு – தொடர்ந்து இந்தக் கேடுபாடுகளிலிருந்து அந்தப் பகுதியைக் காப்பாற்றக்கூடிய வகையில் ஒரு சூழலில் மண்டலமாக உருவாக்கக்கூடிய வகையிலே அரசு நடவடிக்கை மேற்கொள்ள வேண்டும் என்று அரசின் கவனத்தை ஈர்த்து அமைகிறேன்.
இவ்வாறு தங்கம் தென்னரசு பேசினார்.