#Title

‘பல்டி’ அடிக்கும் விஜய் -– ‘பல்பு’ வாங்கும் த.வெ.க.!

பல்டி- – தமிழ்நாடு சட்டமன்றத்தில் 12.8.2026 அன்று தொகுதி மறுவரையறை தொடர்பான தீர்மானத்தில் மறுவரையறயே கூடாது (No delimitation) என்று அறிவித்தது விஜய் அரசு. ஒன்றிய பா.ஜ.க அரசின் உள்துறை அமைச்சர் அமித்ஷா தலைமையில் 20.8.2026 அன்று நடந்த தென்மாநில முதல்வர்கள் கூட்டத்தில் மாநிலங்களின் விகித்தாச்சாரம் மாறாமல் மறுவரையறை (Fair delimitation)என பல்டி அடித்தார் முதல்வர் விஜய்.

பல்பு- – சட்டப்பேரவைக்கு முதலமைச்சர் வந்து வணக்கம் வைக்கும்போது எதிர்க்கட்சித் தலைவர் எழுந்து நிற்பதில்லை என்றும், அவருக்கு கண்ணியத்தைக் கற்றுத்தர வேண்டும் என்றும் அதிகப்பிரசங்கியான அறநிலையத்துறை அமைச்சர் ரமேஷ் அவையில் பேசினார். அதற்கு பதிலளித்த தி.மு.க.வின் சட்டமன்ற உறுப்பினரும் முன்னாள் முதலமைச்ச ருமான ஓ.பன்னீர்செல்வம் அவர்கள், “சட்டப்பேரவையில் பேரவைத் தலைவர் வரும்போதுதான் எழுந்து நிற்க வேண்டும். முதலமைச்சருக்கு எழுந்து நிற்க வேண்டும் என்றால் எதிர்க்கட்சித் தலைவருக்கும் அதே மரியாதையைத் தர வேண்டும்“ என்றார். பேரவைத் தலைவர் ஜே.சி.டி.பிரபாகரன் அவர்கள், அவையில் பேரவைத் தலைவர்தான் முதன்மையானவர் என்பதையும், முதலமைச்சருக்கும் எதிர்க்கட்சித் தலைவருக்கும் எழுந்து நிற்பது அவரவர் விருப்பம் என்றும் தெரிவிக்க, அமைச்சர் ரமேஷ் பல்பு வாங்கினார்.

பல்டி- – ஜூன் 12ஆம் நாள் திறக்கப்பட வேண்டிய மேட்டூர் அணை ஆகஸ்ட் மாதக் கடைசி வாரத்திலும் திறக்கப்படாத நிலையில், நடுவர் மன்றம்- காவிரி மேலாண்மை ஆணையம்- உச்சநீதிமன்றம் ஆகியவை அளித்துள்ள தமிழ்நாட்டின் உரிமைகளை அடமானம் வைக்கும் வகையில், கர்நாடகாவுக்கு நேரில் சென்று அம்மாநிலத்தின் காங்கிரஸ் முதலமைச்சரை தமிழ்நாடு முதலமைச்சர் விஜய் சந்திக்கப் போவதாக த.வெ.க. அமைச்சர்கள் மாற்றி மாற்றித் தெரிவித்தனர். தி.மு.க தலைவர் மு.க.ஸ்டாலின் அவர்கள் இதனைக் கண்டித்து அறிக்கை வெளியிட, கர்நாடக முதல்வரும் தமிழ்நாடு முதலமைச்சர் இப்போது வரவேண்டாம் என்று வழியை அடைத்துவிட்டதால், “கர்நாடகப் பயணத்தைக் கைவிடுவதாக” விஜய் அரசு பல்டி அடித்தது.

பல்பு –- எல்லாத் துறைக்கும் தான்தான் அமைச்சர் என்பது போல செயல்படும், முதல் போட்ட அமைச்சரான ஆதவ் அர்ஜூனா அவையில் பேசும்போது, “ஒன்றிய அரசுக்கு 1 ரூபாய் வரியாகச் செலுத்தினால் அவர்கள் நமக்கு 40 ரூபாய் தருவதாக” உளறினார். எதிர்க்கட்சி வரிசையிலிருந்து 29 பைசாதான் ஒன்றிய அரசு தருகிறது என்று குரல் வந்ததும், பல்பு வாங்கியதை உணர்ந்து, அதையே திருப்பிச் சொன்னார் ஆதவ் அர்ஜூனா

பல்டி –- த.வெ.க. ஆட்சியை ஆதரிக்கும் கூட்டணிக் கட்சிகளான இந்திய கம்யூனிஸ்ட், மார்க்சிஸ்ட் கம்யூனிஸ்ட் கட்சிகளில் உள்ளவர்கள் பற்றி விவரங்களைச் சேகரிக்குமாறு கிராம நிர்வாக அலுவலர்களுக்கு குஜிலியம்பாறை வட்டாட்சியர் சுற்றறிக்கை அனுப்பினார். அதுபோலவே, கல்லூரிகளில் கம்யூனிஸ்ட் கட்சிகளின் மாணவர் அமைப்புகளின் செயல்பாடுகளில் பங்கேற்கக்கூடாது என்று மாணவர்களுக்குத் தடை விதித்தார் கல்லூரிக் கல்வி இயக்ககத்தின் ஆணையர். த.வெ.க ஆட்சிக்கு முட்டுக் கொடுக்கும் கம்யூனிஸ்ட்டுகளுக்கே இந்த நிலைமையா என்று தி.மு.க உள்ளிட்ட எதிர்க்கட்சிகள் விமர்சித்ததும் இரண்டு சுற்றறிக்கைகளையும் வாபஸ் வாங்குவதாகக் கூறி அந்தர் பல்டி அடித்தது விஜய் அரசு.

பல்பு –- கர்நாடக மாநில வனத்துறையால் 3 தமிழர்கள் சுட்டுக்கொல்லப்பட்டது தொடர்பாகப் பேரவையில் கொண்டு வரப்பட்ட கவன ஈர்ப்புத் தீர்மானத்திற்குப் பதிலளித்த அமைச்சர் ஆல் இன் ஆல் அழகு ராஜாவான நிர்மல்குமார் தேவையே இல்லாமல் முத்தமிழறிஞர் கலைஞரைப் பற்றி அவதூறாகப் பேசினார். பேரவைத் தலைவர் குறுக்கிட்டு, “அமைச்சர்கள் கவன ஈர்ப்புத் தீர்மானத்தின் பொருள் மீது மட்டும்தான் பேச வேண்டும். தேவையில்லாதவற்றைப் பேசினால் அவை குறிப்பி லிருந்து நீக்கப்படும்” என்று சொல்லி, கலைஞர் பற்றிய அமைச்சரின் அவதூறுப் பேச்சை அவைக் குறிப்பிலி ருந்து நீக்க உத்தரவிட்டதால் நிர்மல்குமார் பல்பு வாங்கினார்.

பல்டி- – 2026 மே 10ஆம் நாள் முதமைச்சராகப் பொறுப்பேற்ற விஜய், தனது தனிப்பட்ட ஜோதிடர் மற்றும் ஆலோசகராக உள்ள ரிக்கி ரத்தன் பண்டிட் வெற்றிவேல் என்பவரை சிறப்புப் பணி அதிகாரியாக நியமனம் செய்தார். இதற்கான அரசாணை வெளியே தெரியாதபடி மறைக்கப்பட்டது. மே 12 அன்று அது தெரியவந்தது. ஆஸ்தான ஜோதிடருக்கு அரசுப் பணி வழங்கப்பட்டிருப்பதை கூட்டணிக் கட்சிகளே கண்டித்த நிலையில், ஜோதிடருக்கு வழங் கப்பட்ட அரசுப் பதவியை ரத்து செய்து உத்தரவிட்டு, தனது முதல் பல்டியை அடித்தார் விஜய்.

பல்பு –- கலைஞர் கனவு இல்லம் திட்டத்தில் கடந்த ஆட்சியில் கட்டப்பட்ட வீடுகள் சேதமடைந்து ஒழுகுவதாக ஆதாரமின்றி குற்றம்சாட்டினார் அமைச்சர் வினோத். அதற்கு பதிலளித்த எதிர்க்கட்சித் துணைத் தலைவர் கே.என்.நேரு, “இந்தத் திட்டத்தின் கீழ் வீடு கட்ட அரசு பணம்தான் தருகிறது. வீடுகளைக் கட்டிக்கொள்வது பயனாளிகள்தான்” என்று தெரிவித்ததும் அமைச்சர் பல்பு வாங்கினார்.

பல்டி- – காவிரி மேலாண்மை ஆணைய உத்தரவுப்படி தமிழ்நாட்டிற்குஉரிய தண்ணீரைத் திறந்து விட வேண்டும் என தி.மு.க சார்பில் உச்சநீதிமன்றத்தில் மனு தாக்கல் செய்யப்பட்டது. கர்நாடகாவில் அணைகள் நிரம்பி தண்ணீரைத் திறந்து விட்டுவிட்டதாகவும், மேட்டூர் அணையில் தண்ணீர் நிரம்பிவிட்ட தாகவும், இந்த நிலையில் தி.மு.க. மனு தாக்கல் செய்திருப்பதாகவும் விஜய்யின் விர்ச்சுவல் வாரியர்ஸ் சமூக வலைத்தளங்களில் தி.மு.க. மீது பாய்ந்தார்கள். அடுத்த இரண்டு நாட்களில், முதல்வர் விஜய் உத்தரவுப்படி தமிழ்நாடு அரசின் சார்பில் கர்நாடகாவிடம் தண்ணீர் கேட்டு தமிழ்நாடு அரசு சார்பில் மனு தாக்கல் செய்யப்பட்டது. விஜய் அரசின் ஆகாச பல்டி இது.

பல்பு- – நிதி அமைச்சர் மரியவில்சன் தமிழ்நாடு அரசின் கஜானாவிற்கு கடந்த சில மாதங்களில் மட்டும் 15ஆயிரம் கோடி ரூபாய் வருவாய் கிடைத்திருப்பதாகத் தெரிவித்தார். இது குறித்து கேள்வி எழுப்பிய முன்னாள் நிதி அமைச்சர் தங்கம் தென்னரசு, “இந்த வருவாய் ஒன்றிய அரசின் பங்காக வந்த வரி வருவாயா? மாநில அரசின் சொந்த வருவாயா? என்ன கணக்கு?” என்று கேட்டதும், உரிய பதில் இல்லாமல் மரிய வில்சன் பல்பு வாங்கினார். 15ஆயிரம் கோடி ரூபாய் வருவாய் வரும் என்று எதிர்பார்க்கப்படுவதாகக் கதையளந்தார்.

பல்டி- – மகளிர் விடியல் பயணம் போன்ற மகத்தானத் திட்டங்களுக்கு எதிராக தன் கட்சிப் பெண்களைப் பேச வைத்தவர் விஜய். மக்களுக்கு நன்மை தரும் இலவசத் திட்டங்களை நிறுத்த வலியுறுத்திய விஜய், எம்.எல்.ஏக்களுக்கு இலவச கார் வழங்கும் திட்டத்தை அறிவித்திருக்கிறார். 12 கார் வைத்திருக்கும் த.வெ.க எம்.எல்.ஏ.வுக்கும் மக்களின் வரிப்பணத்தில் ஓசி கார் வழங்கி ஆகாயத்துக்கும் பூமிக்குமாக பல்டி அடித்திருக்கிறார் விஜய்.

பல்பு – ரேஷன் கடையில் தற்போது வழங்கப்படும் அரிசிக்குப் பதில், சன்னரக அரிசி வழங்குவதற்காகத்தான் சன்னரக நெல்லுக்கு அரசின் ஆதார விலை உயர்த்தப்பட்டுள்ளதாகவும், டெல்டா விவசாயிகள் இனி சன்னரக நெல்லைப் பயிரிடுவார்கள் என்றும் பேரவையில் ஆதவ் அர்ஜூனா ஏக்கர் கணக்கில் அளந்து விட்டார். அதற்குப் பதிலடி தந்த முன்னாள் அமைச்சர் கே.என்.நேரு, “டெல்டா மாவட்டங்களில் குறுவை, தாளடிப் பருவங்களில் சன்னரக நெல் விளைவிப்பது சாத்தியமில்லை” என்பதை ஆதாரத்துடன் எடுத்துக்கூறி, தற்போது விளையும் அரிசிதான் ரேஷனில் வழங்கப்படுவதையும், அது சர்க்கரை நோயைக் கட்டுப்படுத்தக்கூடியது என்கிற மருத்துவக் காரணத்தையும் விளக்கிய தால் ஆதவ் அர்ஜூனா ஹைவோல்ட்ஸ் பல்பு வாங்கினார்.