சென்னை, ஆக. 23 –
சென்னை வடகிழக்கு மாவட்டம் திருவொற்றியூர் கிழக்கு பகுதி தி.மு.க. சார்பில் தவெக அரசின் சட்டம் ஒழுங்கு சீர்குலைவை கண்டித்து மாபெரும் கண்டன பொதுக்கூட்டம் திருவொற்றியூர் எழுத்துக்காரன் தெருவில் நடைபெற்றது. பகுதி செயலாளர் தி.மு.தனியரசு இக்கூட்டத்திற்கான ஏற்பாடுகளை செய்து வரவேற்புரையாற்றினார். வட கிழக்கு மாவட்டச் செயலாளர் மாதவரம் சுதர்சனம் தலைமையுரையாற்றினார் .
இக்கூட்டத்தில் தி.மு.க. அமைப்புச் செயலாளர் ஆர்.எஸ்.பாரதி பங்கேற்று சிறப்புரையாற்றி னார், அவர் பேசியதாவது.
தி.மு.க. ஆளுங்கட்சியாக இருந்தபோது இதே இடத்தில் பல பொதுக்கூட்டம் நடைபெற்றது, ஆனால் அப்போதெல்லாம் இல்லாத எழுச்சி திமுக எதிர்க்கட்சியாக உள்ள போது இங்கு நடைபெறுகின்ற இந்த கூட்டத்தில் காண முடிகிறது, நலத்திட்ட உதவிகள் என்ற பெயரில் கூட்டத்தை கூட்டாமல் இக்கூட்டம் வெறும் கொள்கை மறவர்கள் நிறைந்த கூட்டமாக இக்கூட்டம் நடைபெறுகிறது. அதுவும் இரண்டே நாளில் இக்கூட்டம் சிறப்பாக ஏற்பாடு செய்யப்பட்டுள்ளது,
முதலில் இக்கூட்டத்தை வழக்கறிஞர் அணிமூலம் நடத்தலாம் என்று நினைத்திருந்தோம், ஆனால் தனியரசு நானே நடத்துகிறேன் என்று கூறி இக்கூட்டத்தைச் சிறப்பாக ஏற்பாடு செய்துள்ளார்.
தி.மு.க.வினரை பற்றி கலைஞர் அவர்கள் சொல்லும் பொழுது ஒரு கருத்தை சொல்லுவார், திமுக காரன் தூங்கினால் கும்பகர்ணன் எழுந்தால் இந்திரஜித் என்பார், அதேபோல் இன்று திமுக தோற்றப்பிறகு தான் திமுகவினர் அனைவரும் இந்திரஜித்தாக வீறுகொண்டு எழுந்துள்ளதை காண முடிகிறது.
அந்த எழுச்சியை நமது இளந்தலைவர் சட்டமன்ற எதிர்க்கட்சித் தலைவர் உதயநிதி ஸ்டாலின் அவர்கள் கைது செய்யப்பட்டபோது கண்கூடாக காண முடிந்தது, அவர் கைது செய்யப்பட்ட. ஒரு சில மணி நேரத்திலேயே தமிழ்நாடு முழுவதும் நடைபெற்ற போராட்டங்களில் சுமார் ஒரு லட்சம் பேர் கைது செய்யப்பட்டனர், ஒவ்வொரு திமுககாரனும் தானாக களத்தில் வந்து நின்றான், கட்சிக்கு மட்டும் அல்ல தமிழ்நாட்டிற்கு ஒரு ஆபத்து என்றாலும் முதல் நாளாக காப்பாற்றுவதற்கு களத்தில் இருப்பது தி.மு.க.காரன் மட்டுமே.
நமது சட்டமன்ற எதிர்க்கட்சித் தலைவர் உதயநிதி ஸ்டாலின் கைது என்பது இந்த மைனாரிட்டி அரசுக்கு பெரிய பின்னடைவு.
சம்பந்தமே இல்லாத பிரிவு களில் வழக்குப் பதிவு செய்து, அதிகாலையில் இருந்து ஒரு பெரும் போலீஸ் படையே தஞ்சாவூரில் இருந்து புறப்பட்டு உதயநிதி ஸ்டாலின்வீட்டிற்கு வந்து கைது செய்ய முற்பட்டது, உடனே திமுக சட்டத்துறை சென்னை உயர்நீதிமன்றத்தில் வழக்கு ஒன்றை தொடர்ந்தது, அவசர வழக்காக எடுத்துக் கொண்ட நீதியரசர்கள் உதயநிதி ஸ்டாலினை 12 மணி வரை கைது செய்யக்கூடாது என்று உத்தரவு பிறப்பித்தனர், ஆனால் அந்த உத்தரவையும் மீறி தவெக அரசின் அராஜக போலீசார்உதயநிதியை கைது செய்து தஞ்சாவூருக்கு அழைத்துச்சென்றனர்.
வழக்கு விசாரணை மீண்டும் பிற்பகல் 2 மணிக்கு வர இருந்த நிலையில், யாரோ ஒரு மூத்த வழக்கறிஞர் அரசுக்கு அறிவுரைத்ததின் பெயரில் உயர் நீதிமன்றத்தில் அரசின் சார்பில் உதயநிதியை நாங்கள் விசாரித்து அனுப்பி விடுவோம் கைது செய்யவில்லை என்று அறிவிக்கிறார்கள், இது தவெக அரசுக்கு ஏற்பட்ட பெரிய தலைகுனிவாகும் .
உண்மை நிலை எப்படி இருக்க இந்த அரசில் அமைச்சராக உள்ள ஆதவ் அர்ஜுனா கைது செய்ய போலீசார் வந்த பொழுது இரண்டு மணி நேரமாக உதயநிதி வீட்டை விட்டு வரவில்லை என்று ஒரு அப்பட்டமான பொய்யான தகவலை அளிக்கிறார், இது முற்றிலும் அயோக்கியத்தனமான செயலாகும். இதனை நாட்டு மக்கள் புரிந்து கொள்ள வேண்டும்.
த.வெ.க. ஆட்சிப் பொறுப்பேற்று இந்த நூறு நாட்களில் சட்டம் ஒழுங்கு முற்றிலும் சீர்குலைந் துள்ளது, பள்ளி கல்லூரிகளில் மாணவர்கள் கொலை செய்யப்படுகிறார்கள், மாணவர்களுக்கு கஞ்சா மற்றும் போதைப் பொருட்கள் எளிதாக கிடைப்பதாக சொல்லப்படுகிறது, இதனை தடுக்க திராணியற்ற அரசு, கடந்த கால தி.மு.க. ஆட்சியை குறை சொல்கிறார்கள், அதற்கு சட்டமன்றத்திலேயே எதிர்க்கட்சித் தலைவர் உதயநிதி உடனடியாக பதிலடி கொடுத்துள்ளார். கடந்த திமுக ஆட்சி காலத்தில் போதைப் பொருள் தடுப்புத் துறைக்கு தலைவராக இருந்த அமல்ராஜைதான் தற்பொழுது சென்னை மாநகர கமிஷனராக நியமித்துள்ளார்கள்.
அப்படி என்றால் கடந்த காலத்தில் போதைபொருள் தடுப்பு நடவடிக்கைகளில் திமுக அரசு திறமையாக செயல்பட்டதை அவர்களை ஒப்புக்கொள்கிறார்கள்.
அதுமட்டுமல்லஇந்த அரசு பொறுப்பேற்று 100 நாட்களில் பல்வேறு குற்ற சம்பவங்கள் தினம் தினம் அரங்கேறி வருகின்றன, குறிப்பாக சொல்ல வேண்டும் என்றால் இந்த குற்றச்சம்பங்களில் பெரும்பாலானோர் ஈடுபடுவோர் தவெகவை சார்ந்தவர்களாகத்தான் இருக்கிறார்கள், அது மட்டுமல்ல தற்பொழுது காவல் நிலையங்களில் எந்தப் பொறுப்பிலும் இல்லாத த.வெ.க.வினரின் அத்து மீறிய செயல்பாடுகளால் போலீஸ் அதிகாரிகளே குமுறி வருகிறார்கள்.
தற்பொழுது தமிழ்நாடு சட்டமன்ற நடவடிக்கைகளை பார்த்தால் மிகவும் வேடிக்கையாக உள்ளது, நமது சட்டமன்ற உறுப்பினர்கள் ஒரு துறையின் மீது கேள்வி கேட்டால் அதற்கு சம்பந்தமே இல்லாத ஒரு அமைச்சர் அதற்கு பதில் அளிக்கிறார், தமிழ்நாடு சட்டமன்றத்தின் மரபுத் தெரியாமல் அமைச்சர்கள் உளறுகிறார்கள், இந்து சமய அறநிலைத்துறை அமைச்சர் ரமேஷ் சட்டமன்றத்தில் ஆணவத்தோடு பேசுகிறார்,
முதல்வர் வரும்பொழுது உதயநிதி எழுந்து நிற்க வேண்டுமாம்,
சபாநாயகர் ஒருவருக்கு மட்டும்தான் எழுந்து நிற்க வேண்டும் என்ற மரபு கூட தெரியாதவர்கள் இவர்கள், அதுமட்டுமல்ல மரியாதை என்பது கேட்டுப் பெறக் கூடாது தானாக கிடைக்க வேண்டும், இதற்கெல்லாம் காரணம் தனது சட்டமன்ற தேர்தலின் போது
தமிழ்நாட்டு மக்கள் தெரியாம வாக்களித்த காரணத்தால், தமிழ்நாடு பல்வேறு தலைகுனிவுகளை சந்தித்துக் கொண்டுள்ளது , தமிழ்நாடு பல்வேறு வகைகளிலும் பின்னடைவை நோக்கி சென்று கொண்டிருக்கிறது,
குறிப்பாக திருவொற்றியூரில் நடைபெற்ற மாணவர் கொலை வழக்கில் உரிய நடவடிக்கை எடுக்காத போலீஸ் அதிகாரிகளை கண்டிக்க கூட த.வெ.க. கூட்டணி கட்சிகளுக்கு தைரியம் கிடையாது,
தற்பொழுது முதல்வர் விஜய்தன்னுடன் இருக்கும் எம்.எல்.ஏ.க்களை தக்க வைத்துக் கொள்வதற்காகத்தான் எம்.எல்.ஏ.க்களுக்கு கார் வழங்கும் திட்டத்தை அறிவித்துள்ளார், தமிழ்நாட்டில் எவ்வளவோ பிரச்சினைகள் இருக்கிறது, அதற்கெல்லாம் நிதி இல்லை என்று கையை விரித்து காட்டும் விஜய்க்கு இத்திட்டத்திற்கு மட்டும் நிதி எப்படி கிடைத்தது,
அதுமட்டுமல்ல நேற்று சட்டமன்றத்தில் முதல்வர் விஜய் சவால் விடுகிறார், நான் பேசினால் என்ன ஆகும் தெரியுமா என்று, என் மேசை மீது மூன்று பைல்கள் உள்ளது, அதைப் பிரித்தால் அவ்வளவு தான் என்று பூச்சாண்டி காட்டுகிறார், இதுபோன்ற எவ்வளவு பூச்சாண்டி களை, அதாவதுகீரிப்பாம்பு மோடிமஸ்தான் வித்தை களையெல்லாம்,எம்.ஜி.ஆர். ஆட்சிக் காலத்தில் இருந்தே பார்த்துவந்த இயக்கம் தான் தி.மு.க., தி.மு.க.வை பழிவாங்க வேண்டும் என்பதற்காக
எம்.ஜி.ஆர். சர்க்காரியா கமிஷன் என்ற வழக்கை கலைஞர் மீது தொடுத்தார், ஆனால் அதில் ஒன்றுமில்லை என்ற காரணத்திற்காக அவரே திரும்பப்பெற்றார் என்பதெல்லாம் வரலாறு, அது மட்டுமல்ல 2001 இல் ஜெயலலிதா ஆட்சிக்கு வந்தவுடன், தி.மு.க. ஆட்சி காலத்தில் கட்டிய மேம்பாலத்தில் ஊழல் என்று கூறி கலைஞர் அவர்களை இரவோடு இரவாக கைது செய்து சிறையில் அடைத்தார்கள், 25 ஆண்டுகள் ஆகிறது இதுவரை அந்த வழக்கில் எதையும் அவர்களால் நிரூபிக்க முடிய வில்லை, இந்த வரலாறு எல்லாம் நேற்று முளைத்த காளான்களுக்கு தெரிய வாய்ப்பு கிடையாது , இப்பொழுது விஜய் பூச்சாண்டி காட்டுகிறார், நீயும் அந்த மூன்று பைல்களை பிரித்துக் காட்டி முடிந்தால் தி.மு.க. குற்றம் செய்திருந்தால் நிரூபித்துக் காட்டு, நாங்களும் ஊழல் பட்டியலை தயார் செய்து வருகிறோம், கடந்த ஞாயிற்றுக்கிழமை நடைபெற்ற தி.மு.க. சட்டத்துறை கூட்டத்தில் பேசிய
எங்களது இளந்தலைவர் உதயநிதி ஸ்டாலின் தி.மு.க. வழக்கறிஞர்களுக்கு ஒரு கட்டளை இட்டுள்ளார், ஒவ்வொரு ஊரிலும் ஆட்சியாளர்கள் செய்யும் தவறுகளை ஊழல்களை ஆதாரத்துடன் சேகரிக்க உத்தரவிட்டுள்ளார், இப்பொழுது 10 15 ஊழல் பட்டியல்கள் தயாராகி
உள்ளது,
அதில் முதல் ஊழல் முதல்வர் அலுவலகத்தை புணரமைப்பதில் விடப்பட்ட டென்டரில் இருந்து தொடங்குகிறது, இப்பொழுது இருந்து தான் முதலமைச்சருக்கு கெட்ட காலம் தொடங்குகிறது, 1991 ஆம் ஆண்டு ஜெயலலிதா முதல்வராக வந்தவுடன் அரசுக்கு சொந்தமான டான்ஸிநடத்திய வாங்கியதில் கிடுக்கிப்பிடியாக மாட்டிக் கொண்டு தண்டனை பெற்றது போல், தற்போதைய முதலமைச்சர் விஜய்க்கும் அது நிச்சயம் நடக்கும்,
இரண்டாவது ஊழல் பழனி திருக்கோவிலுக்கு சொந்தமான 100 கோடி மதிப்புள்ள நிலத்தை 2 கோடிக்கு பத்திர பதிவு செய்தது தொடர்பான வழக்கில் பிரதான குற்றவாளியும் முக்கிய சாட்சியுமான ஒருவர் சிறையில் மரணமடைந்ததற்கும் இந்த ஆட்சி பதில் சொல்லியே ஆக வேண்டும்,
மூன்றாவதாக இங்கு ஆட்சிக்கு வந்து 100 நாட்களில் 6 உயிர்கள் போலீஸ் கஸ்டடியில் பலியாகி உள்ளது, இதையும் நாங்கள் சும்மா விடமாட்டோம்,
மிக முக்கியமான ஊழலாக கடந்த சில நாட்களுக்கு முன்பு 11 மதுபான கம்பெனிகளுக்கு இந்த அரசு தடை விதித்து உத்தரவு பிறப்பித்தது, ஆனால் 24 மணி நேரத்தில் அந்த உத்தரவு திரும்ப பெறப்பட்டுள்ளது, அப்படி என்றால் திரை மறைவில் நடந்தவை என்ன என்பதை நாங்கள் அம்பலப்படுத்துவோம்,
அதுமட்டுமல்ல அடுத்த ஊழலாக அரசு வக்கீலாக நியமிப்பதில் நடைபெற்ற மெகா ஊழல், இதில் எந்தெந்த பொறுப்பிற்கு எவ்வளவு பணம் கொடுத்தார்கள் என்ற பட்டியல் எங்களிடம் உள்ளது, இதையும் நாங்கள் சட்டரீதியாக கையாண்டு இந்த அரசின் ஊழலை வெளிச்சத்திற்கு கொண்டு வருவோம்,
75 ஆண்டு கால சரித்திரம் படைத்த திராவிட முன்னேற்றக் கழகத்திடம் சட்டரீதியாக மோதி எவனும் வென்றதாக சரித்திரம் கிடையாது.
தற்பொழுது நடைபெற்று வரும் தவெக அரசு எந்த ஸ்திரத்த ன்மையும் இல்லாத , நம்பகத்தன்மை இல்லாத அரசு என்பதற்கு ஒரே ஒரு எடுத்துக்காட்டு தொகுதி மறுவரையறை குறித்த விஷ யத்தில் விஜய் அடித்த பல்டி , மெக அந்தர்பல்டி ஆகும். அனைத்துக் கட்சிக் கூட்டத்தில் தொகுதி மறு வரையறையை எதிர்க்கிறோம் என்று தீர்மானத்தை நிறை வேற்றிவிட்டு, நேற்று அமித்ஷாவை கண்டவுடன் அஞ்சி நடுங்கி நியாயமான மறு வரையறை வேண்டுமென்று அந்தர் பல்டி அடித்துள்ளார், அனைத்துக் கட்சிக் கூட்டத்தில் கலந்து கொள்ளாத கட்சிகளை எட்டப்பர்கள் என்று கூறிய ராகுல் காந்திக்கு, இப்போது புரிந்து இருக்கும் யார் எட்டப்பர்கள் என்று,
கடந்த சட்டமன்றத் தேர்தலில் நம்மிடம் இருந்து கூட்டணியில் வெற்றிபெற்ற காங்கிரஸ் காரர்கள், வெற்றி பெற்ற உடனே நன்றியை மறந்து பதவி சுகத்திற்கு ஆசைப்பட்டு அணி மாறி அமைச்சர் பதவி ஒட்டிக் கொண்டுள்ள இருவரும் என்னை விமர்சிக்கிறார்கள்,
என்னையெல்லாம் விமர்சிக்க அவர்களுக்கு துளி கூட தகுதி கிடையாது என்பதை நாட்டு மக்கள் அறிவார்கள்,
அந்த காலத்தில் காங்கிரஸ்காரர்களை இரண்டு வகையாக பிரித்துக் சொல்வார்கள், ஒண்ணு பக்கா காங்கிரஸ், இன்னொன்று சொக்கா காங்கிரஸ்,
பக்கா காங்கிரஸ் என்றால் சுதந்திரத்திற்காக போராடியவர்கள்,தேசிய உணர்வு மிக்கவர்கள், சொக்கா காங்கிரஸ் என்றால் பதவிக்காக வந்த பந்தாகாரர்கள், எனவே சொக்கா காங்கிரஸ் காரர்கள் பேசியதைப் பற்றி நான் பெரிதாக எடுத்துக் கொள்ள மாட்டேன், அவர்கள் அவ்வாறு பேசினால் தான் அந்தப் பதவியில் அவர்கள் ஒட்டிக் கொண்டிருக்க முடியும்.
தி.மு.க. ஆட்சிப்பொறுப்பில் இருந்தபோது தகைசால் தமிழர் விருது சங்கரய்யா அவர்களுக்கும்,
நல்லகண்ணு அவர்களுக்கும், ஆசிரியர் கி.வீரமணி, குமரி ஆனந்தன் ஆகியோருக்கு வழங்கப்பட்டது, தி.மு.க. மீண்டும் வெற்றி பெற்று இருந்தால் நமது தலைவர் அவர்கள் இந்த வருட தகைசால் விருதை பாமக நிறுவனர் ஐயா ராமதாஸ் அவர்களுக்கு வழங்கலாம் என்று என்னிடம் தெரிவித்திருந்தார், நாம் வெற்றி பெற முடியாததால் அந்த வாய்ப்பு நழுவிச் சென்றுள்ளது.
நிச்சயம் விரைவில் ஆட்சி மாற்றம் ஏற்படும், நிர்வாக திறன் இல்லாத, ரீல்ஸை மட்டுமே மூலதனமாக கொண்ட இந்த மக்கள் விரோத ஆட்சி நீண்ட நாள் நீடிக்காது, நமது கட்சியினர் உற்சாகத்தோடு இருங்கள், விரைவில் உள்ளாட்சித் தேர்தல் வரவுள்ளது, அந்தத் தேர்தலையே நாம் தான் நடத்தும் அளவில் கூட ஆட்சி மாற்றம்
ஏற்படும்,
இந்த ஆட்சி நீடிக்கும் ஒவ்வொரு நாளும் தமிழ்நாடு பின்னடைவை நோக்கித்தான் சென்று கொண்டிருக்கிறது என்பதை தமிழ்நாட்டு மக்கள் தற்பொழுது நன்றாக உணர்ந்துள்ளார்கள்,
தேர்தலுக்கு முன்பு அளித்த வாக்குறுதிகள் எதையுமே நிறைவேற்றவில்லை என்பதை மக்கள் நன்கு புரிந்து கொண்டுள்ளனர்,
முத்துவேல் கருணாநிதி ஸ்டாலின் தலைமையில் நடைபெற்ற திராவிட மாடல் ஆட்சியில் பெற்ற நன்மைகளை எண்ணிப் பார்க்க தொடங்கியுள்ளனர்,
அதையெல்லாம் மறந்து வீட்டில் குழந்தைகள் சொன்னார்கள் என்பதற்காக வாக்களித்ததை எண்ணி வருந்துகிறார்கள்.
தமிழ்நாட்டு மக்கள் தான் செய்த தவறுக்கு உரிய பரிகாரத்தை நிச்சயம் வழங்குவார்கள்.
இவ்வாறு அவர் பேசினார்.
இக்கூட்டத்தில் முன்னாள் சட்டமன்ற உறுப்பினர் கே பி சங்கர், மாநில நிர்வாகிகள் கண்ணதாசன், ஜி சந்திரபோஸ், என் மருதுகணேஷ், வீ.கவி கணேசன், மாவட்டத் தலைவர் குறிஞ்சி கணேசன், பகுதி செயலாளர்கள் வை.ம. அருள்தாசன், ஏவி ஆறுமுகம், வட்ட செயலாளர்கள் வி.சதீஷ்குமார், மற்றும் கழக நிர்வாகிகள் பொதுமக்கள் திரளாக பங்கேற்று சிறப்பித்தனர்.