அரியலூர், ஆக.23–-
ஜெயங்கொண்டம் பொதுமக்களின் நீண்டநாள் கோரிக்கையை ஏற்று தமிழ்நாடு முன்னாள் முதலமைச்சர் மு.க. ஸ்டாலின் அவர்கள் காணொலிக்காட்சி வாயிலாக ஜெயங்கொண்டம் அரசு மாவட்ட தலைமை மருத்துவமனை ரூ.25 கோடி மதிப்பீட்டில் கட்டப்பட்ட புதிய கட்டிடத்தை திறந்து வைத்தார்கள்
அரியலூர் மாவட்டம் ஜெயங்கொண்டம் அரசு மாவட்ட தலைமை மருத்துவமனையில் ரூ.25 கோடி மதிப்பீட்டில் 80,000 சதுரஅடி பரப்பளவில் 7 தளங்கள் மற்றும் 100 படுக்கைகள் வசதி கொண்ட சிறப்பு அவசர சிகிச்சை பிரிவு கட்டடம் திறந்து வைக்கப்பட்டு பொதுமக்கள் பெருமளவில் சிகிச்சை பெற்று வருகின்றனர்.
இப்புதிய மருத்துவமனை கட்டடத்தின் கீழ் தளத்தில் (Ground Floor) சமையலறை, நோயாளிகள் உடனிருப்போர் காத்திருக்கும் இடம், மருந்தகம் மற்றும் மருந்து கிடங்கு, CSSD, முதலாவது தளத்தில் விபத்து மற்றும் அவசர சிகிச்சை பிரிவு, குழந்தைகளுக்கான உயிர்த்தெழுதல் மற்றும் அவசர மருத்துவ சிகிச்சை பிரிவு, இரண்டாவது தளத்தில் விபத்து மற்றும் அவசர சிகிச்சை பிரிவின் பச்சை மண்டலம் (TAEI Green Zone) மூன்றாவது தளத்தில் சித்த மருத்துவ பிரிவு, ஆயர்வேதா, யோகா மற்றும் நேச்சுரோபதி, யுனானி சித்தா மற்றும் ஹோமியோபதி பிரிவுகளும் செயல்பட்டு வருகிறது. நான்காம் தளத்தில் ஆண்கள் பொது மருத்துவ உள்நோயாளிகள் பிரிவு, ஆண்கள் அறுவை சிகிச்சை உள்நோயாளிகள் பிரிவு, ஐந்தாவது தளத்தில் பெண்கள் பொது மருத்துவ உள்நோயாளிகள் பிரிவு, பெண்கள் அறுவை சிகிச்சை உள்நோயாளிகள் பிரிவு மற்றும் ஆறாவது தளத்தில் அலுவலகம், பொது அறுவை சிகிச்சை அரங்கம், எலும்பியல் அறுவை சிகிச்சை அரங்கமும் செயல்படும் வகையில் பொதுமக்கள் பயன்பாட்டிற்கு திறந்து வைக்கப்பட்ட மருத்துவமனை இன்று போதை மன்னர்களின் கூடாரமாக மாறிவருகிறது.
மாவட்ட தலைமை மருத்துவமனைக்கு ஜெயங்கொண்டம் சுற்றியுள்ள சுமார் 69 க்கும் மேற்பட்ட கிராமங்களில் இருந்து சிகிச்சை பெறுவதற்காக சுமார் ஆயிரத்திற்கும் மேற்பட்டவர்கள்தினந்தோறும் இம் மருத்துவமனைக்கு வருகின்றனர்.
இந்த தலைமை மருத்துவ மனையில் உள்நோயாளிகள் நூற்றுக்கும் மேற்பட்டவர்கள் சிகிச்சை பெற்று வருகின்றனர். நோயாளிகளின் உடன் வருபவர்களை நோயாளிகளின் பாதுகாப்புக்கு ஒருவரை தவிர தங்கவிடுவதில்லை,
மிகவும் பாதிக்கப்பட்ட நோயாளிகளை பாதுகாக்க இரண்டு நபர்கள் தேவைப்படுவார்கள் அவர்களை மருத்துவ மனையில் அனுமதிக்கப்படுவதில்லை.
அதே சமயம் நோயாளிகளுக்கு ஏதேனும் அவசரப் பிரச்சனை ஏற்படும் பட்சத்தில் அவர்களுக்கு உதவுவதற்கும் அவர்களுக்கு தேவையான பொருட்களை வாங்கித் தருவதற்கும் புதிதாக கட்டப்பட்டுள்ள தரைத்தளத்தில் நோயாளிகளின் உறவினர்கள் இரவில் படுத்து உறங்கி ஓய்வெடுத்து வருகின்றனர். மருத்துவமனை வளாகத்தில் நோயாளிகளுக்கு சம்பந்தம் இல்லாத நபர்கள், போதை மன்னர்கள் மருத்துவமனையில் இரவு ஓய்வெடுக்கும் பகுதி மற்றும் மருத்துவமனை வளாக பகுதியில் இரவு நேரத்தில் அங்கு வந்து படுத்துக்கொண்டு போதையில் சத்தம் போட்டு பிரச்சனைகளை ஏற்படுத்துகின்றனர். அந்த நபர்களால் நோயாளிகளின் உறவினர்கள் ஓய்வெடுக்கவோ, தங்கவோ மிகவும் சிரமப்படு கின்றனர். குறிப்பாக தங்கள் அணிந்திருக்கும் நகை, மற்றும் பணம், கைபேசி உள்ளிட்ட பொருட்கள் திருடப்பட்டுவிடுமோ என்று அச்சத்துடன் தூங்காமல் இரவு முழுவதும் விழித்துக்கொண்டே எப்பொழுது விடியும் என்று காத்திருக்கின்றனர். நோயாளிகள் தங்கும் அந்த இடத்தில் மருத்துவ கழிவுகள், உள்ளிட்ட குப்பைகளை கொட்டி ஒரே தூர் நாற்றம் வீசுகிறது. இத்தனை கோடி ரூபாயில் கட்டிய மருத்துவ மனை தவெக அரசின் அலட்சியத்தால் பாழ்பட்டு வருகிறது.எனவே மாவட்ட நிர்வாகம், காவல்துறை நிர்வாகமும் மருத்துவமனை நிர்வாகமும், உரிய பாதுகாப்பு வசதிகளை ஏற்படுத்தி தரவேண்டும் என நோயாளிகளின் உறவினர்கள், பொதுமக்கள் கேட்கின்றனர். மேலும் நோயாளிகளுடன் தங்குகின்ற வர்களுக்கு மருத்துவமனையில் பாஸ் வழங்கினால் தேவை இல்லாத நபர்கள் அங்கு தங்க முடியாது, எந்த பிரச்சினைகளும் ஏற்படாது.
மருத்துவமனை நிர்வாகம் செய்து தருமா எனபொதுமக்கள் கேட்கின்றனர்.
இரவு நேரங்களில் காவல்துறையினர் மருத்துவமனை வளாகத்தில் ரோந்துவந்தால் நோயாளிகளுக்கும், பொதுமக்களுக்கும், பாதுகாப்பாக இருக்கும் என்று நோயாளிகள் மற்றும் அவரது குடும்பத்தினர் பொதுமக்கள் வேண்டுகோள் விடுத்துள்ளனர்.
திராவிட மாடல் ஆட்சியில் பொதுமக்களுக்காக 25 கோடி ரூபாயில் கட்டப்பட்ட 7 தளம் கொண்ட ஜெயங்கொண்டம் தலைமை மருத்துவமனையைதவெக அரசு சுகாதாரத்தோடும், பாதுகாப்போடும் காப்பாற்றுமா பொதுமக்களின் எதிர்பார்க்கின்றனர்.