#Title

எது நம் திருமண முறை? சிந்தனையைத் தூண்டிய திராவிட எழுத்துகள்

‘த மிழர் திருமணமும் இனமானமும்’ என்ற தலைப்பில் வெளியான நூலில் இனமானப் பேராசிரியர் க.அன்பழகனார் அவர்கள் எழுதியுள்ள கருத்துகள் திராவிட இயக்கம் முன்னெடுத்த சுயமரியாதை இயக்கத்தின் சிறப்பையும், அதனால் ஏற்படக்கூடிய நல்வாழ்வையும் எடுத்துக்காட்டுகிறது.

புரோகிதத் திருமணங்களின் தன்மை என்ன என்பதை விளக்கியபிறகு, தமிழர் மரபைப் போற்றும் சுயமரியாதைத் திருமணம் குறித்து பேராசிரியர் அந்த நூலில் விளக்குகிறார்.

புரோகிதத் திருமணச் சடங்குகள் பலவும் ஒரு வழக்கமாக இடம்பெற்று வருபவை. ஆதலின் அது எதற்காக என்பதோ, அதன் கருத்தோ, நோக்கமோ, பயன் யாது என்பதோ விளங்குவதில்லை. வடமொழியில் கூறப்படும் ‘மந்திரம்’ தமிழர்கட்கு விளங்காத நிலையில், அந்த மந்திரம் எதுவும் விடப்படாமலோ, தவறு நேராமலோ கூறப்பட்டதா என்பதையும் எவரும் அறிய முடிவதில்லை. வைதிக முறையில் முன்னர் நிகழ்ந்த திருமணங்கள் பலவற்றில் நடைபெற்ற சடங்குகளை நினைவிற்கொண்டே பலரும் திருமணச் சடங்குகள் நிறைவேறியதாக எண்ணிக் கொள்வர்.

பரபரப்பு மிகுந்த இக்காலத்திலோ எவரும் சடங்குகளைப் பற்றி ஆர்வம் கொள்வதில்லை. புரோகிதர் ஏதோ மந்திரம் கூறுவார், மணமக்களுக்கு மணமகன் ‘தாலி’ கட்டுவார். மணமக்கள் அக்னி வலம் வருவார்கள். அந்த அளவில் திருமணம் நிறைவேறியது என்று சொல்வது அன்றி சடங்கு முறைகளைப் பெரிதாகக் கருதுவதில்லை. ‘சடங்குகளை’ ஒட்டுமொத்தமாக கைவிடத் துணியாதவர்களும்கூட சடங்கு என்றாலே பொருளற்றது, பயனற்றது, வீண் வேலை என்று எண்ணும் நிலை காலப்போக்கில் வளர்ந்து வருகிறது. ஆனால், புரோகிதர்களோ தங்கள் தொழிலையும், குரு நிலையையும் காத்துக் கொள்ளவே அந்தச் சடங்குகளை விரிவாகச் செய்து வைப்பதில் ஆர்வம் காட்டு கின்றனர்.

மணமக்களுக்கு எதிரில் புரோகிதர் ஓமாக்கினியை வளர்ப்பார். அதிலிருந்து எழும் புகை சில நேரங்களில் மணமக்களுக்குக் கண் எரிவதையும் மூச்சு திணறலையுங்கூட ஏற்படுத்தும். ஒரு திருமணத்தில் மணமகள் -இந்த ஓமப் புகைச்சலால் கண்ணைக் கசக்கிக்கொண்டே இருந்ததைக் கண்டவர்கள் “அந்தப் பெண்ணுக்கு இந்த மணமகளை ஏற்க விருப்பம் இல்லை. அதனால்தான் கண்ணீர் சிந்துகிறாள்” என்று பேச முற்பட்டு, அது பலரிடமும் பரவி, மண உறவு கொண்ட இரு வீட்டாரிடையிலும் ஒரு மாறுபாட்டினை உருவாக்கிவிட்டது.

-இவ்வாறு புரோகிதத் திருமணத்தின் நடைமுறையை விளக்கும் இனமானப் பேராசிரியர் அவர்கள், தமிழர் வாழ்வியலுக்கேற்ற சுயமரியாதைத் திருமணம் எப்படிப்பட்டது என்பதையும் தெளிவாக விளக்குகிறார்.

சீர்திருத்த நோக்கத்தை ஏற்றவர்கள், திருமணத்தை மிகவும் சிக்கனமாக நடத்த முடியும். ஒரு தலைவர், இரண்டு பூமாலைகள் அளவில் செலவை சுருக்கமாகவும் செய்யலாம். அதற்கு மேற்பட்டவை எல்லாம் அவரவர் வசதி- வாய்ப்பு- செல்வாக்கு ஆகியவற்றையும் உறவினர், நண்பர்கள், தொடர்புடையோர் எண்ணிக்கையையும் பொருத்ததாகும்.

இத்திருமண நிகழ்ச்சிக்குப் பெருந்தொகை செலவு செய்ய இயலாதாரும், மாத ஊதியத்தைக் கொண்டே வாழ்க்கையை நடத்துவோரும், செலவையும் திருமண வேலைகள் பலவற்றையும் குறைத்திடப் பதிவுத் திருமணம் செய் வதும் விரும்பத்தக்கதே . மணமக்களின் நெருங்கிய குடும்பத்தாரும் நண்பர் சிலரும் கலந்து கொண்டாலே போதும்.

கோவை அதிபரும் தொழிலதிபருமாக விளங்கிய ஜி.டி.நாயுடு அவர்கள் பகுத்தறிவுச் சிந்தனையாளர். பெரியாரின் நண்பர். அவர் தம் மகளுடைய திருமணத்தை 50 ஆண்டுகட்கு முன்னர் நடத்திய போது விழாவிற்கு அன்றைய ஆளுநர் தலைமை வகித்தார். மணமகள் எளிய குடும்பத்துப் பெண்ணைப் போன்று குறைந்த விலையுள்ள கூறைப்புடவை கட்டியிருந்தார். மணமகனும் பருத்தி ஆடையே உடுத்தியிருந்தார். மணமக்கள் ஒரு வருக்கொருவர் மோதிரம் அணிவித்துத் திருமணம் செய்துகொண்டனர். திருமணத்தில் நாதசுரங்கூட முழங்கவில்லை. அந்தத் திருமண அழைப்பிதழில், அனைவருக்கும் உணவு ஏற்பாடு செய்யப்படவில்லையாதலின், பகல் உணவுகொள்ள விரும்புவோர் முன்னதாகத் தெரிவிக்க வேண்டுமென்று கேட்டுக் கொள்ளப்பட்டிருந்தது.

எவ்வளவு வேண்டுமாயினும் செலவிடக்கூடிய வாய்ப்பும் செல்வாக்கும் மிக்க நாயுடு அவர்கள், அந்தக் காலத்திலேயே தம் மகள் திருமணத்தை மேளங்கூட ஏற்பாடு செய்யாமல் எல்லோரையும் விருந்துக்கு அழைக்காமல், சீர்திருத்த முறையில் சிக்கனமாக நடத்தியது பலராலும், வியந்து பேசப்பட்டது. மணவிழா என்பது குடும்பத்துக்குப் பெருஞ்செலவாக அமையும் முறையால்- பல மணமக்கள், திருமணத்துக்குப் பின் வாழ்க்கையில் இடர்பட நேரிடுகிறது என்பதைக் கருதியே அவ்வாறு செய்து காட்டினார் என்பது உணரப்பட வேண்டும் -என்று சீர்திருத்த திருமண முறையின் சிறப்பையும் சிக்கனத்தையும் ‘தமிழர் திருமணமும் இனமானமும்’ என்ற நூலில் இனமானப் பேராசிரியர் எடுத்துக் காட்டுகிறார்.