சென்னை. ஆக.23–
தமிழக சட்டப் பேரவையில் நேற்று சிறப்பு திட்ட செயலாக்கத் துறை, சட்டத் துறைகள், மின்வாரியம் ஆகிய மானியக் கோரிக்கைகள் மீதான விவாதத்தில் கலந்துகொண்டுஆலங்குளம் தொகுதி உறுப்பினர் மனோஜ் பாண்டியன் (திமுக) பேசியதாவது: தாய்மாமன் சீர்’ திட்டத்தின்கீழ் தங்கம் கொள்முதல் செய்வதற்கான டெண்டர் தமிழ்நாடு மருத்துவ சேவை கழகம் மூலம் கோரப்பட்டுள்ளது.
இந்த நிறுவனமானது மருந்துகள், மருத்துவ உபகரணங்கள் வாங்குவதற்கும், மருத்துவக் கட்டிடங்களைக் கட்டுவதற்கும் மட்டுமே சட்டப்படி உருவாக்கப்பட்ட ஒரு கழகம். தங்கத்தை‘மருத்துவ உபகரணம்’ என்று வகைப்படுத்தி டெண்டர் கோருவது இந்த நிறுவனத்தின் அடிப்படைநோக்கத்திற்கு எதிரானது மற்றும் உச்ச நீதிமன்ற தீர்ப்புகளுக்கு முரணானது.
இதற்கு பதிலளித்த அமைச்சர்: தாய்மாமன் தங்க மோதிரம் திட்டம் முதல்வர் அறிவித்த பின்பு எந்ததுறை மூலம் இந்த திட்டத்தை செயல்படுத்த வேண்டும் என்பது தொடர்பாக ஆலோசிக்கப்பட்டது. மருத்துவத் துறையே இந்த திட்டத்தை அமல்படுத்தும். மேலும், தமிழ்நாடு மருத்துவ சேவை கழகம் மூலம் தங்கத்தை கொள்முதல் செய்யும் ஏற்பாடுகளை செய்து வருகிறோம். தங்கத்தை வாங்குவதற்காக ஒரு தனிக்குழு அமைக்கப்பட்டுள்ளது என்றார்.