சென்னை, ஆக.24–
அமைச்சர் நிர்மல் குமார் பேச்சிற்கு கழக முன்னாள் அமைச்சர் செந்தில் பாலாஜி பதிலடி கொடுத்துள்ளார். “எதிர்க்கட்சிகளின் கேள்விக்குப் பதிலளிக்க திராணி இல்லாமல் குதர்க்கமாகப் பேசி குழப்பத்தை ஏற்படுத்தி வருகின்ற னர். நான் கேட்ட கேள்விக்கு கடைசி வரை அமைச்சர் பதில் சொல்லவே இல்லை” என்று அவர் குறிப்பிட்டுள்ளார்.
செந்தில் பாலாஜி கூறியதாவது:–
த.வெ.க. அரசு அமைந்த பிறகு ஆட்சி நடத்துவதை விட எதிர்க்கட்சிகள் மீது வழக்குப் பதிவு செய்வதில்தான் சிறப்புக் கவனங்களை செலுத்திக் கொண்டிருக்கின்றார்கள். அவர்கள் ஒரு வழக்கல்ல 10 வழக்குகள் அல்ல எத்தனை வழக்குகள் போட்டாலும் அதைச் சந்திப்பதற்கும் , சட்டப்படி எதிர்கொள்வதற்கும் நாங்கள் தயாராக இருக்கின்றோம்.
ஒரு சட்டமன்றத்தினுடைய நிகழ்வு என்பது அங்கு ஆரோக்கியமான விவாதம் நடக்க வேண்டும். நாட்டினுடைய நிலைகளை குறித்து சட்டமன்றம் நடைபெறுகின்ற பொழுது உறுப்பினர்கள் கேள்வி எழுப்புவதும் அதற்கு சம்பந்தப்பட்ட துறைகளைச் சார்ந்த அமைச்சர்கள் பதில் சொல்வதும் முதலமைச்சர் பதில் சொல்வதும் இதுவரை இருந்த ஒரு நடைமுறை. ஆனால் இன்றைய த.வெ.க. அமைச்சர்கள் எதிர்க்கட்சிகள் கேட்கக்கூடிய கேள்விகளுக்குப் பதிலளிக்க முடியாமல் பதில் தெரியாமல் வேறு விதமாக அவர்கள் அந்த பதில்களைச் சொல்லி அந்த இடத்தில் ஒரு கூச்சல் குழப்பத்தை உருவாக்குவதற்கான முயற்சிகளை முன்னெடுக்கின்றார்கள்.
நான் நேற்று என்ன கேட்டேன். மின்சாரத்துறை அமைச்சரிடம், “18 ஹார்ட் டிஸ்க் காணாம போயிடுச்சு, கண்டுபிடிச்சது 38 ஹார்ட் டிஸ்க்ன்னு சொன்னீங்க – மீதி இருக்கற 20 ஹார்ட் டிஸ்க் எங்க இருந்து கண்டுபிடிச்சது? உரிய விளக்கம் என்ன?” என கேள்வி கேட்டால், அதற்கு கடைசி வரைக்கும் அவர் பதிலே சொல்லவில்லை. திரும்பவும் ஒரு கேள்வி கேட்டேன், “நீங்க வெள்ளைஅறிக்கையில தி.மு.க. ஆட்சியில எங்களுடைய முதலமைச்சராக இருந்த திராவிட மாடல் ஆட்சியினுடைய நாயகர் மாண்புமிகு தளபதி அவர்கள் முன்னெடுத்ததிட்டங்களை வெள்ளை அறிக்கையிலே சுட்டிக் காட்டி இருக்கறீங்க, 99000 மின்மாற்றிகள் மாற்றப்பட்டிருக்கின்றன,
புதிதாக தி.மு.க. ஆட்சியில் அமைக்கப்பட்டிருக்கின்றன. 2020-–21ல் 14,500 கோடி இருந்த மின்வாரியத்தினுடைய ஓராண்டு கடன் கடந்த 2025–-26–ல் 933 கோடியாக குறைக்கப்பட்டிருக்கிறது என்பதை வெள்ளை அறிக்கையிலே சொல்லி இருக்கீங்க.
ஆக முழுசா வெள்ளை அறிக்கையில தி.மு.க. அரசின் சாதனைகளைப் பட்டியலிட்டுச் சொல்லிவிட்டு நேற்று சட்டமன்றத்தில் வந்து தி.மு.க. ஆட்சியில் எந்தவிதமான பணிகளும் நடக்கவில்லை என்கிறது போல ஒரு தோற்றத்தை உருவாக்குவதற்கான முயற்சிகளை முன்னெடுத்தார்கள். நான் அதைத்தான் கேள்வியாகக் கேட்டேன், நீங்களே வெள்ளை அறிக்கையிலே சொல்லிருக்கீங்கன்னு இப்ப அதுக்கு பதில் சொல்லணும். அதுக்கு சட்டமன்றத்தில் பதில் சொல்வதை விட்டுவிட்டு வேறு விதமான வார்த்தைகளைப் பயன்படுத்துவது இது போன்ற நிகழ்வுகளை சில அமைச்சர்கள் சட்டமன்றத்தில் முன்னெடுக்கின்றார்கள்.
ஒரு கேள்விக்கு பதில் தெரியாமல் சட்டமன்றத்தில் பதிலளிக்கத் திறமை இல்லாமல் திராணி இல்லாமல் இதுபோன்ற குதர்க்கமான வார்த்தைகளைப் பயன்படுத்தி சட்டமன்றத்தை நடத்திக் கொண்டிருக்கின்றார்கள். மக்கள் பார்த்துக் கொண்டுதான் இருக்கின்றார்கள். உரிய நேரத்தில் மக்கள் அவர்களுக்கு உரிய பதிலைத் தருவார்கள்.
ஒரு முதலமைச்சர் தான் எடுத்துக்கொண்ட பதவிப் பிரமாணம் என்பது என்ன? யாரிடமும் எதுவும் மறைக்க மாட்டேன். உண்மையாகநேர்மை யாக நடந்து கொள்வது தானே அவருடைய உறுதிமொழியில் பதவி ஏற்று இருக்கார். அப்ப கையில இருந்தா நீங்க வெளியிட வேண்டியதுதானே.?
எந்தத் துறையில் தவறு நடந்தது எவ்வாறான தவறு நடந்தது? யார் தவறு செய்தார்கள்? அவர்கள் மீது நாங்கள் வழக்கு பதிவுசெய்கிறோம் என்று அப்படி நடவடிக்கை எடுக்க வேண்டியதுதானே.? இதுல என்ன நேரம் காலம் ஜோசியம் பார்த்து நேரம் காலம்பார்த்தா அதை வெளியிட முடியும். அதான் எங்களுடைய எதிர்க்கட்சித் தலைவர் மிக தெளிவாகச் சொன்னார். அப்படி ஏதேனும் உங்களிடம் இருந்தால் வெளியிடுங்கள் என்று நேற்று கேட்டார். இப்ப வரைக்கும்அவங்க வெளியிடல. மூணு பைல் கட்டி வச்சிருக்கு, முடிச்சு போட்டு வச்சிருக்கு, அந்த பைல அவிழ்த்தால் வெளியில வந்துரும்னு சொன்னவங்க 24 மணி நேரம் ஆச்சு நேற்றே அதை வெளியிட வேண்டியதுதானே. அவங்ககிட்ட இருந்தாதானே வெளியிட முடியும்.
இந்த ஆட்சி 100 நாள் கடந்து போயிருக்கு மக்களுக்கு எந்தவிதமான ஒரு பயனும் இல்லாத அரசாக இந்த த.வெ.க. அரசு உள்ளது.
இவ்வாறு அவர் குறிப்பிட்டார்.