#Title

தலைவரின் முடிவும் –- தொண்டர்களின் மனதும்!

தே ர்தல் முடிவுகளால் நிலைகுலையாத இயக்கம் திராவிட முன்னேற்றக் கழகம். இந்தியாவின் அரசியல் போக்கைத் தீர்மானிக்கும் வலிமை கொண்ட தி.மு.க.வின் தலைமைச் செயற்குழு 22–8–2026 அன்று அண்ணா அறிவாலயத்தில் கூடியது. அதில் கழகத் தலைவர் ஆற்றிய உரையும், நிறைவேற்றப்பட்ட தீர்மானங்களும் தி.மு.க.வின் கடைக்கோடித் தொண்டர்களின் மனதில் உள்ள உணர்வை வெளிப்படுத்தக்கூடியதாக அமைந்துள்ளன.

தலைவர் எடுத்த முடிவும் தொண்டர்களின் மனதும் ஒரே அலைவரிசையில் இருப்பதைத் தலைமைச் செயற்குழு உறுதி செய்துள்ளது.

தலைவர் முடிவு– தலைமுறைகளைக் கடந்து 75 ஆண்டுகாலமாகக் கழகம் நிலைத்து நிற்பதற்கு காரணம் அதன் அமைப்பு பலம்தான் என்பதை தனது உரையில் எடுத்துக்காட்டிய கழகத் தலைவர், கழகத்தின் அமைப்பு முறையில் உரிய சீர்திருத்தங்கள் மேற்கொள்ளப்படும் என்றும் தெரிவித்தார். கிளைக்கழகம் முதல் மாவட்டக் கழகம் வரை கழகத்தின் அமைப்பு முறையில் உரிய மாற்றங்கள் கொண்டு வருவதற்கானத் தீர்மானம் நிறைவேற்றப்பட்டுள்ளது.

தொண்டர்கள் மனது– “இதை..,இதை..இதைத்தான் எதிர்பார்த்தோம்” என்று தமிழ்நாடு முழுவதுமுள்ள தொண்டர்கள் இந்த முடிவுகளை மனதார வரவேற்கிறார்கள். தகுதியுள்ள கழகத் தொண்டர்கள் கட்சியில் பொறுப்பான பதவிகளுக்கு வரவேண்டும் என்று விரும்புகிறார்கள். கழகத் தலைமை நிறைவேற்றியுள்ள அமைப்பு சீரமைப்பு என்கிற தீர்மானம் தொண்டர்களின் நீண்டகால எதிர்பார்ப்பை நிறைவேற்றும் வகையில் அமைந்துள்ளது.

தலைவர் முடிவு– தலைமைச் செயற்குழுவில் ஆற்றிய உரையில் கழகத் தலைவர் அவர்கள், “மாவட்டச் செயலாளர் ஒருவரால் மட்டுமே கழகம் வளர்ந்து விடாது” என்பதை வெளிப்படையாக எடுத்துக்கூறி, கொள்கையில் உறுதியாக செயல்படக்கூடிய நிர்வாகிகள்கூட, பல இடங்களில் தொண்டர்களை புறக்கணித்ததால் தேர்தலில் தி.மு.க தோல்வியை சந்திக்க நேரிட்டது என்று கூறினார்.

தொண்டர்கள் மனது– “நாங்க மனதுக்குள் நினைத்ததை நீங்க வெளிப்படையா பேசிட்டீங்க தலைவரே” என்பதுதான் தொண்டர்களின் குரல். கழகத்தின் அனைத்து மாவட்டச் செயலாளர்களும் அப்படி இருப்பதில்லை என்பது எந்தளவு உண்மையோ, அதே அளவுக்கு, தலைவர் சொன்னது போல செயல்படக்கூடிய மாவட்ட– ஒன்றிய– நகர– பேரூர் கழகச் செயலாளர்கள் இருக்கிறார்கள் என்பதையும் தொண்டர்கள் தொடர்ந்து சுட்டிக்காட்டி வருகிறார்கள். தங்களின் மனதை வெளிப்படுத்திய தலைவரின் உரையைத் தொடர்ந்து நிறை வேற்றப்பட்ட தீர்மானங்களில், மாவட்டச் செயலாளராக 3 முறை மட்டுமே இருக்க முடியும். ஒன்றிய–நகர–பேரூர்–கிளைக் கழகச் செயலாளர்களாக 2 முறை மட்டுமே இருக்க முடியும் என்பது நிறைவேற்றப் பட்டிருப்பதுடன் வயது வரம்பும் அந்தத் தீர்மானங்களில் குறிப்பிட்டிருப்பது தொண்டர்களிடம் பெரும் வரவேற்பைப் பெற்றுள்ளது.

தலைவர் உரை– “படைக்கு இளையோர் வரும்போது, அவர்களை மூத்தோர் வரவேற்று வழிநடத்துவதுதான் படைக்கு அடையாளம்” என்ற முத்திரைச் சொற்றொடரை தலைவர் தனது உரையில் பதிவு செய்தார். தி.மு.க என்பதே இளைஞர்களால் தொடங்கப்பட்ட இயக்கம். காலந்தோறும் இளைய இரத்தம் பாய்கின்ற இயக்கம். அதனால்தான், கழகம் தொடங்கப்பட்டு 30 ஆண்டுகள் கடந்த நிலையில், 1980ஆம் ஆண்டு இளைஞரணி தொடங்கப்பட்டது. அதனை வழிநடத்தியவர் நம் கழகத் தலைவர். அதனால்தான், 75 ஆண்டுகால இயக்கத்துக்கு இளம் இரத்தம் பாய்ச்சும் வகையில் கழக நிர்வாகிகளின் பதவிக் காலத்திற்கு வயது வரம்பைநிர்ணயித்துத் தீர்மானத்தை நிறைவேற்றியிருக்கிறார்.

தொண்டர்கள் மனது– கழகத்தில் ஆர்வமாகப் பணியாற்றும் இளைஞர்களுக்கு இளைஞரணி உள்ளிட்ட கழகத்தின் சார்பு அணிகளில் பணியாற்றும் வாய்ப்பு கிடைப்பது போல, முதன்மைக் கழகத்தின் அமைப்புகளிலும் இளைஞர்களுக்குரிய அளவில் வாய்ப்புகள் வழங்கப்பட வேண்டும் என்பதே தொண்டர்களின் எதிர்பார்ப்பாகும். அதற்கேற்ப வயது வரம்பு நிர்ணயிக்கப் பட்டிருப்பதுடன், வட்டம், பகுதி, நகரம், ஒன்றியம் ஆகியவற்றில் வாக்காளர் எண்ணிக்கைக்கேற்ப செய்யப்படவுள்ள மாற்றங்கள் இளைஞர்களுக்கு வாய்ப்புகளை அளிக்கும் என்பதால் தங்கள் உணர்வைப் புரிந்து தலைவர் செயல்பட்டிருப்பதை சமூக வலைத்தளங்களில் இளைஞர்கள் வெளிப்டையாகவே பதிவிட்டு வருகின்றனர்.

தலைவர் உரை– “ஒவ்வொரு தொகுதியா பார்த்து குறைகளைக் கண்டுபிடிச்சு ஆள மாத்துறத விட, முழுமையான ஒரு சுயபரிசோதனைவேணும்னு நான் முடிவெடுத்தேன். இதெல்லாம் கடுமையானதாதான் இருக்கும். சிலருக்கு கசப்பானதாகவும் இருக்கும். கசப்புதான் உடம்புக்கு நன்மை செய்யும்” என்று தலைமைச் செயற்குழுவில் தலைவர் உரையாற்றினார். கழகத்திற்குக் கசப்பு மருந்து தேவைப்படும் காலம் இது என்பதைத் தொண்டர்களின் உணர்விலிருந்து உணர்ந்த தலைவரின் சொற்கள் இவை.

தொண்டர்கள் மனது– கழகத்தின் அடி முதல் நுனி வரை உரியளவில் மாற்றங்கள் தேவை என்பதுதான் தொண்டர்களின் மனது. சமூக நீதி இயக்கமான திராவிட முன்னேற்றக் கழகத்தில் இளைஞர்கள், பெண்கள், சிறுபான்மையினர், பட்டியல் இனத்தவர், பழங்குடியினர் உள்ளிட்ட அனைத்துத் தரப்பினருக்கும் கழகப் பொறுப்புகளில் உரிய பிரதிநிதித் துவம் வேண்டும் என்பதே தொண்டர்களின் குரலாகும். அந்தக் குரலைத் தலைமைச் செயற்குழுவில் கழகத் தலைவர் அவர்களால் தேர்ந்தெடுக்கப்பட்டு, பேச அனுமதிக்கப்பட்ட நிர்வாகிகள் சிறப்பாக எடுத்துரைத்தனர். தொண்டர்களின் மனதை தலைமைக்கு மட்டுமின்றி, தலைமைச் செயற்குழுவுக்கும் தன் பாணியில் தலைவர் எடுத்துரைத்தது தொண்டர்களுக்குப் பெரும் நம்பிக்கைளை உண்டாக்கியுள்ளது.

தலைவர் முடிவு– கழகத்தின் அமைப்பு முறையில் ஏற்படுத்தப்படும் மாற்றங்களின் அடிப்படையில் நிர்வாகிகளைத் தேர்ந்தெடுத்தப்பதற்கு கட்சித் தேர்தல் நடத்தப்படும் என்றும், தேர்தலை நடத்துவதற்கேற்ப புதிய உறுப்பினர்களை நேர்மையான முறையில், உண்மையான எண்ணிக்கையில் சேர்க்க வேண்டும் என்றும் தலைவர் தனது உரையில் தெரிவித்தார். உட்கட்சி ஜனநாயகத்தில் இந்தியாவுக்கே முன்னோடியாகத் திகழும் திராவிட முன்னேற்றக் கழகத்தினுடைய தலைவரின் அறிவிப்பும், அதற்கேற்ற தீர்மானங்களும் தேசிய அளவில் கவனம் பெற்றுள்ளன.

தொண்டர்கள் மனது– கழகத்தின் உறுப்பினர் என்பதற்கு ஆதாரமான உறுப்பினர் அட்டையைப் பெறுவதே வாழ்நாள் இலட்சியம் என நினைக்கும் கழகத் தொண்டர்களுக்கு, தலைவரின் இந்த அறிவிப்பு பெரும் உற்சாகத்தையும் ஊக்கத்தையும் அளித்துள்ளது. நியாயமான உறுப்பினர்களுடன், நேர்மையான உள்கட்சித் தேர்தலைக் கழகத் தலைவர் அவர்கள் முன்னெடுத்திருப்பது தொண்டர்களுக்கு நம்பிக்கையைப் பெருக்கியுள்ளது.

தலைவர் முடிவு– “எதிர்க்கட்சிகளைப் பார்த்தா மலர்ற முகம் , நம்ம கட்சிக்காரங்களைப் பார்த்தா மலர்றது இல்லை. எதிர்க்கட்சிக்காரர்களைப் பார்த்தா வணங்குற கை, நம்ம கட்சிக்காரங்களைப் பார்த்தா வணங்குறதில்லை” என்று செயற்குழுவில் கழகத் தலைவர் பேசியபோது, அரங்கம் முழுவதும் எழுந்த கைத்தட்டல் அடங்க சில நிமிடங்களாயின. தலைவரின் சொற்களுக்கு வலிமை சேர்க்கும் வகையில், செயற்குழுவில் பேசுகின்ற வாய்ப்புப் பெற்றவர்களும் இதையே வலியுறுத்தினர். குறிப்பாக சட்டமன்ற நிகழ்வுகளை சுட்டிக்காட்டிப் பேசினர்.

தொண்டர்கள் மனது– கழகத் தொண்டர்களைப் போலவே ஒவ்வொரு நாளும் சட்டமன்ற நிகழ்வுகளை நேரலையில் முழுமையாகக் கவனிக்கிறார் கழகத் தலைவர். அதனால் தலைமைச் செயற்குழுவில் அவை தொடர்பான கருத்துகளைத் தலைவர் முழுமையாக அனுமதித்தார். கழகப் பொதுச்செயலாளர் துரைமுருகன் அவர்கள் தனது நிறைவுரையில், தொண்டர்களின் மனதைப் பிரதிபலிக்கும் வகையில் சட்டமன்ற நிகழ்வுகள் குறித்து தனது அனுபவங்களை உரையாக வழங்கினார். கழகத்தின் அனைத்துத் தரப்பினரிடமும் இது பெரும் வரவேற்பைப் பெற்றுள்ளது. முன்னாள் முதல்வரும்–கழக சட்டமன்ற உறுப்பினருமான ஓ.பி.எஸ். அவர்கள் சொன்னது போல, கழகத் தலைவரின் தலைமைச் செயற்குழு உரையைக் கிளைக் கழகங்கள் வரை தொடர்ந்து ஒளிபரப்ப வேண்டும் என்பதே தொண்டர்களின் மனநிலை.