சென்னை, ஆக.25 –
சென்னையில் நேற்று, பொதுக்கூட்டம் ஒன்றில் அரசியல் நாகரிகம் சிறிதுமின்றி தமிழ்நாடு பாடநூல் கழகத் தலைவர் லயோலா மணி, அநாகரிகமாகப் பேசியதை அடுத்து, தம்மைச்
சந்தித்த செய்தியாளர்களுக்குப் பேட்டியளித்த முன்னாள் அமைச்சர் பி.கே. சேகர்பாபு எம்.எல்.ஏ., “இந்த நாட்டிற்கே பெரிய கேடாக அமைந்துள்ள
மக்காத குப்பைகளான த.வெ.க.வினரை வருகின்ற காலங்களில் அகற்றுவதற்கு மக்கள் தயாராகிக் கொண்டிருக்கிறார்கள்” என்று குறிப்பிட்டார்.
அவர் செய்தியாளர்களிடம் கூறியதாவது:–
மக்களால் தேர்ந்தெடுக்கப்பட்ட ஒரு மக்கள் பிரதிநிதியை, “குப்பைகள்” என்று சொல்லுகின்ற அளவிற்கு தரம் தாழ்ந்திருக்கின்ற ஒரு அரசியல் சூழல் இன்றைக்கு நிலவிக் கொண்டிருக்கிறது.
அவர் கூற்றுப்படியே குப்பை என்றாலும் கூட, இது ஆரோக்கியம் உள்ள மக்கும் குப்பை. மக்கும் குப்பை எப்போதுமே உரமாக அடுத்து பயிர்களுக்கு பயன்படும்; பயிர் விளைச்சலுக்கு பயன்படும். மக்கா குப்பை எதற்கும் பயன்படாது. மற்ற உயிர்களைத்தான் பறிக்கும்.
எங்களைப் பொறுத்த அளவில், அவர்கள் சொன்ன பாணியிலேயே சொல்கிறோம்... நாங்கள் குப்பைகள் தான், மக்கும் குப்பைகள்; அவர்கள் மக்கா குப்பைகள். இந்த நாட்டிற்கு பெரிய கேடு. இந்த மக்கா குப்பைகளைத்தான் வருகின்ற காலங்களில் மக்கள் அகற்றுவதற்கு தயாராகிக் கொண்டிருக்கிறார்கள் என்பதைத் தெரிவித்துக் கொள்கிறேன்.
இவ்வாறு அவர் குறிப்பிட்டார்.