#Title

தமிழ்நாட்டில் 4,208 நீர்நிலைகளில் நீர் இல்லை! காவிரி டெல்டாவில் குடிநீர், பாசனத்திற்கு கடும் நெருக்கடி!

சென்னை, ஆக. 25–

தமிழ்நாட்டில் 4208 நீர்நிலைகள் முற்றிலும் வறண்டுள்ளது. காவிரி டெல்டா பகுதிகளில் குடிநீர், பாசனத்திற்கு கடும் நெருக்கடி ஏற்பட்டுள்ளது. இதனால் ஆழ்குழாய் கிணறுகளை ஆழப்படுத்தும் பணியில் விவசாயிகள் இறங்கியுள்ளனர். தமிழகத்தில் பருவமழைபொய்த்ததாலும், கோடை வெப்பத்தின் தாக்கம் அதிகரித்ததால் நீர்நிலைகளில் நீர் இருப்பு கடுமையாக சரிந்துள்ளது. தமிழ்நாடு முழுவதும் உள்ள 14,141 நீர்நிலைகளில் 4,208 நீர்நிலைகள் முற்றிலும் வறண்டுள்ளது.

மேலும் 5,814 நீர்நிலைகளில் 1 முதல் 25 சதவீதம் மட்டுமே நீர் இருப்பு உள்ளது. இதனால் தமிழகம் முழுவதும் 10,000க்கும் மேற்பட்ட நீர்நிலைகளில் நீர் இருப்பு குறைந்துள்ளது. நீர்வளத்துறை பராமரிப்பில் உள்ள 14,141 நீர்நிலைகளில் மதுரை மாவட்டத்தில் மட்டும் 1,340 நீர்நிலைகள் உள்ளன. அதில் 1,123 நீர்நிலைகள் முற்றிலும் வறண்டுள்ளன. இதேபோல் பல மாவட்டங்களிலும் ஏரிகள், குளங்கள் மற்றும் பாசனத் தொட்டிகள் நீரின்றி காணப்படுகின்றன.

அதிலும் குறிப்பாக தஞ்சாவூர், திருவாரூர்,நாகப்பட்டினம், மயிலாடுதுறை மற்றும் புதுக்கோட்டை ஆகிய காவிரி டெல்டா மாவட்டங்களில் நிலைமை இன்னும் மோசமாக உள்ளது. இந்தப் பகுதியில் நீர்வளத்துறையின் பராமரிப்பில் 737 நீர்நிலைகள் உள்ளன. இவற்றில் 694 நீர்நிலைகளுக்கு அணைக்கட்டு கால்வாய் மூலமாகவும், 41 நீர்நிலைகளுக்கு வெண்ணாறு மூலமாகவும், 2 நீர்நிலைகளுக்கு காவிரி ஆறு மூலமாகவும் தண்ணீர் கிடைக்கிறது. இதுதவிர 27 அமைப்பு சாரா நீர்நிலைகளும் உள்ளன.

கடந்த ஆகஸ்ட் 7ம் தேதி நிலவரப்படி, டெல்டா மாவட்டங்களில் உள்ள 764 நீர்நிலைகளில் 720 நீர்நிலைகள் முற்றிலும் வறண்டு காணப்பட்டன. கடந்த ஆண்டு இதே நாளில் வெறும் 24 நீர்நிலைகளில் மட்டுமே தண்ணீர் இன்றி காணப்பட்ட நிலையில், இந்த ஆண்டு அந்த எண்ணிக்கை 720ஆக உயர்ந்துள்ளது. மேலும், இந்த 764 நீர்நிலைகளில் 50 சதவீதத்துக்கும் அதிகமான நீர் இருப்பு கொண்ட ஒரு நீர்நிலையும் இல்லை. ஒரே ஒரு நீர்நிலையில் மட்டும் 25 முதல் 50 சதவீதம் வரை நீர் இருப்பு உள்ளது. 43 நீர்நிலைகளில் 25சதவீதத்துக்கும் குறைவான நீரே உள்ளது.

டெல்டா பகுதியில் உள்ள 764 நீர்நிலைகளின் மொத்த கொள்ளளவு 6.7 டிஎம்சி. ஆனால் தற்போது அதில் 0.176 டிஎம்சி அளவு மட்டுமே தண்ணீர் உள்ளது. அதாவது, மொத்தகொள்ளளவில் வெறும் 2.62 சதவீதம் மட்டுமே நீர் இருப்பு உள்ளது. டெல்டா பகுதியில் உள்ள நீர்நிலைகள் வெறும் பாசன ஆதாரங்களாக மட்டுமல்லாமல், நிலத்தடி நீரைச் சேமித்து வைக்கும் முக்கிய ஆதாரங்களாகவும் உள்ளன. குறிப்பாக தஞ்சாவூர் மாவட்டத்தின் பல பகுதிகளில் ஏரிகள், குளங்கள் வறண்டுள்ளதால் நிலத்தடி நீர்மட்டம் வேகமாகக் குறைந்து வருகிறது.

அதிலும் பட்டுக்கோட்டை முதல் சேதுபாவாசத்திரம் வரையிலான பகுதிகளில் நிலத்தடி நீர்மட்டம் வெகுவாக குறைந்துள்ளது. நெல் உற்பத்தியின் முக்கிய மையமாக விளங்கும் காவிரி டெல்டா பகுதியில், மேட்டூர் அணையில் இருந்து ஜூன் 12ம் தேதி வழக்கம்போல் பாசனத்திற்கு தண்ணீர் திறக்கப்படாததும், கர்நாடகத்திலிருந்து காவிரி நீர் வரத்து தாமதமானதும் நீர்நிலைகள் வறட்சிக்கு முக்கிய காரணம் என விவசாயிகள் தெரிவிக்கின்றனர்.

இதுகுறித்து விவசாயிகள் கூறியதாவது: பல கிராமங்களில் சுமார் 180 அடி ஆழத்தில் கிடைத்த நிலத்தடி நீர் தற்போது 210 அடி வரை கீழிறங்கியுள்ளது. பயிர்களை காப்பாற்ற விவசாயிகள் ஆழ்குழாய் கிணறுகளை மேலும் ஆழப்படுத்தி வருகின்றனர். நீர்நிலைகள் வறண்டதாலும் ஆறுகள், கால்வாய்கள் வழியாக கிடைக்கும் பாசன நீரை நம்பியிருந்த விவசாயிகள் தற்போது நிலத்தடி நீரை நாட வேண்டிய நிலைக்கு தள்ளப்பட்டுள்ளனர்.

இதற்காக ஏற்கனவே அமைக்கப்பட்டுள்ள ஆழ்குழாய் கிணறுகளை மேலும் ஆழப்படுத்த வேண்டியுள்ளது. இதனால் துளையிடும் செலவு, மோட்டார் மற்றும் மின் உபகரணங்களுக்கான செலவு என தொடர்ந்து பொருளாதாரச் சுமை அதிகரித்து கொண்டே வருகிறது.

நிலத்தடி நீர் மேலும் கீழிறங்கினால்தற்போதைய ஆழ்குழாய் கிணறுகளும் பயனற்றுப் போகும் அபாயம் உள்ளது. மேலும் கால்நடைகளை வளர்க்கும் விவசாயிகள் தங்கள் மாடுகளுக்கு குடிநீர் கிடைக்கும் இடங்களைத் தேடி தொலைதூர பகுதிகளுக்கு அழைத்துச் செல்ல வேண்டிய நிலைமையும் ஏற்பட்டுள்ளது. இதனால் கால்நடைகளை பராமரிப்பதற்கான நேரமும் செலவும் அதிகரித்துள்ளது. இவ்வாறு அவர் கூறினார்.

* கடந்த ஆண்டு இதே நாளில் வெறும் 24 நீர்நிலைகளில் மட்டுமே தண்ணீர் இன்றி காணப்பட்ட நிலையில், இந்த ஆண்டு அந்த எண்ணிக்கை 720ஆக உயர்ந் துள்ளது